Тампуш емаң хатԓ Овкуртан па Питԓорн верыԓыса
Кашң таԓ тащ шавиты ёх ияха уйтатыԓат. Ар тахаят эԓты йи лота актащԓат. Щит, ванты, шеек ям пора, рахаԓ рутԓан па ԓухасԓан пиԓн ияха потремиты па мойԓыты. Таԓаң таԓ сыс марэмаԓа. Сишн щи там емаң хатԓ меет самаңа хоятатн тайԓа.
Овкурт
Каш верты пора еԓпина, оԓаңн, собрани верԓа. Щита манты верат эԓты потарԓа. Рупатты ёх еԓпина кущаят омасԓат па потарԓат муй хоты верԓаԓ мантсат, па муй мосаԓ верты верԓаԓ туңа-щиры питты ураңна. Мужи вош сельхозпредприятие хоща тащ хотат воԓԓы шимԓа йиты питмеԓ. Уна питам хоятат нох вуямат, хойтат хуԓ веԓты понамт. Моԓха кашң тащ хот вуԓы леккар тайс, ин па йи леккар антом, иса хотмеԓ. Щи тумпина ястаԓат, кат тащ па ияха ԓыԓатты – тащԓаԓ нох ант этԓат.
Вуԓэт пиԓан хув рупатам хоятат потарԓат, хоты мосаԓ ямашк верт тащ хотатн верты. Щиты Емельян Куртямов ястал: мосаԓ кат хоятн пелтащман тащ шавиты рупатая этԓыты. Щи щирн катра тэԓн рупитысат. Йи хоятн ԓавартшак, кат хоятан ищипа кеншак. Хой вантаԓ, утча каман тахая питыԓыԓа, мосаң хоят атмащ раканԓ, мосаң па муй моԓты. Тащен ищи ямашк акатԓэн, нэмоԓты ант луттыԓэн. Ястам потраԓ щикуш хуԓантса, туп кущаят ястаԓат ох сохаптаты щи арат антом.
Щи тумпина Ԓорвош район куща Олег Попов ястас хоты кимет таԓатн емаң хатԓэԓ поснтаты питԓа. Папуш эԓты кашң таԓ Мужи вошн вуԓэң ёх хатԓ гуляйтты питԓа. Щи щирн-ки кашаң таԓ ямшак па тынаңшак мойԓапсаят шитты рахаԓ. Щи тумпина каш верты харԓ меет ямашк ԓэщатты питԓа, аршак мояң хоят веритаԓ ёхтыԓыты. Щаԓта па вуԓэң ухаԓн ищи шеек хув манты ант мосаԓ: Щаня эԓты йиты, ищи хорпи Питԓор эԓты. Сишн аршак вуԓэң ухаԓ рахаԓ туты. Щиты меет ямашк па умащшак вантыя.
Щиты такан потремиман юпина тащ хотатн рупитам хоятат, хой пенсияя питман уԓԓат, хой юбилей сэма питам хатԓат поснтас иса мойԓапсаятн мойԓасаят па ишканщап нэпекатн хойсаят. Щит Андрей Артеев, Владимир Озелов, Емельян Пырысев, Анатолий Талигин, Акулина Артанзеева, Антон Лонгортов, Екатерина Лонгортова па Эдуард Сандрин.
Щи сыс каман Щаня ёхан питаран ар хоятат ёхатмеԓ: тэԓыя тынасты хар ԓарпиям, камтса вуԓы хот ԓонщам, ариты па якты таха эԓты хорамаң сый щащаԓ, касты лотат ԓэщатамат. Хоятат ԓавԓасԓат хун район куща ху мойԓапса ясаң китаԓ.
– Вущат тынаң хоятат! Шеек умащ ванты муй арат хорамаң сохаң тащ хотаң ёх ёхатмеԓ, муй хорпи хорамаң вуԓэң ухԓат тувмеԓ, – ястас Олег Попов. – Там хув ԓавԓам емаң хатԓэв. Там хатԓ турмев ям найаң хатԓ вермаԓ, щит шеек ям! Мосаң ԓуңхԓувн нётԓаюв емаң хатԓэв туңа-щира порыԓыты. Вуԓы энмаԓты вер щит антом туп иса нёха, щит – катра йис ханты уԓапса па ханты ясаң. Там уԓапса щи еԓԓы туԓэв. Вуԓэң ёх емаң хатԓ пиԓн! Еԓԓы тумтака!
Мойԓапса ясаң пиԓан ԓойԓысат Районный Дума эԓты Александр Худалей, Шимԓаң шоши рут мир департамент эԓты Ренат Пяк па Ассоциация «Ямал-потомкам!» эԓты Дмитрий Тарагупта. Ԓув ям ясаң ястасат па мойԓапсаят мойԓасат. Щиты Закондательное собрание ЯНАО эԓты мойԓапсаятн хойсаят Виктор Рохтымов па Андрей Артеев. Департамент АПК ЯНАО эԓты благодарностьн хойса Ольга Куртямова – ԓув сэма питам хатԓ поснтамаԓ. Почётной грамотой Ԓорвош район куща эԓты масаят Любовь Артеева па Эдуард Макаров.
Хой вуԓэң ухаԓ тус, мохты касты ԓэщатыты питсат. Щиты няԓхосьяң-пуш вуԓэң ухԓат ԓэԓамтысат хой сорашк. Приуральский район эԓты ур икет ищи касты ёхтыԓысат. Вуԓыԓаԓ таԓаң ат ԓойсат, марэмасаят, наварты уратԓат. Щиты Роман Лонгортов нох питас, еша ёхи хащас Вячеслав Лонгортов, энамты ёх кутан хуԓмета питас Герман Лонгортов. Ԓув эԓтэԓ еша-еша ёхи хащас энамты ху Эдуард Лонгортов. Ԓув туп веԓщи хотан няԓԓэм таԓ рупатԓ.
– Ма ай пора эԓты нумас понтсам вуԓы хотатн рупатты. Няԓхосьяң таԓ эԓты кашң таԓ ԓуң-сыс ученик-пастуха рупатсам. Щаԓты ашкуԓа етшам юпина Тюмень воша утаԓтыты яңхсам. Ёхԓы ёхтам юпина мохты хота рупатты мантсам, – потарԓ Эдуард Лонгортов. – Вуԓэң ухԓэм ԓэщатсэм, вуԓыԓам воԓаң ант утаԓтысԓам, оԓңем урайң. Еша ювра тусайм. Ԓухас нэңем па меет ямашк манас, аԓ китса, туп пусаң этас. Ԓув оԓаң места шитас.
Нэңат кутан ищи морт арат ухаԓ навраԓтысат. Камтса ухаԓ мохты ёхԓы кераттысайт. Шек яма ԓэԓамтас ур нэ Марина Лаптандер. Ухԓаԓ щикем такан манас па ԓув йи тахаян пуңԓа ракныԓыяс. Щи ураңна еша ёхи хащас па катмет местая питас. Мария Рохтымова ԓувеԓ эԓты ёхатмаԓ па оԓаң места шитмаԓ. Ольга Артанзеева хуԓмет места вуймаԓ.
Ухаԓна касты юпина мохты шитам мойԓапсаят ёшата масаят. Щит грамотаят, охат па кубкат. Щи тумпина тампуш емаң хатаԓна спонсор уԓмаԓ – ОАО «ЗапСибХлеб». Ԓув кущайԓ нох питам хоятата тыңаң пормасат мойԓас.
Щиты Мария Рохтымова па Роман Лонгортов нови тут машнаят мощатсат. Щаԓта ёх па нэңат еԓԓы касты питсат. Еԓта ёхтам мояң ур ёх ищи юращты ԓойԓысат па морт-кем арат мойԓапса шитсат. Хуԓампуш хой хувашк навармаман оԓңа питмаԓ Юрий Окотэтто. Ухаԓ шоппи навармаман ищи ԓув нох питмаԓ. Тынщаң ёваԓман Эдуард Хороля нох питмаԓ, ԓув юпеԓан Иван Пырирко па щаԓта Эдуард Лонгортов.
Ԓохн хухаԓман щаня ёх иса местаят нох вусат: энамты ёх кутан – Эдуард Лонгортов, Максим Талигин па Константин Талигин; уншак ёх кутан – Станислав Анатольевич Лонгортов, Эдуард Ильич Лонгортов, Антон Ильич Лонгортов па еша ёхи хащас Емельян Кириллович Куртямов. Нэңат кутан тамиты местаят питсат: оԓаң места кат нэ вустан – Мария Рохтымова па Екатерина Еприна, кимет места – Екатерина Лонгортова, хуԓмет – Алена Артанзеева.
Юх катна таԓты юращман иса местаят мояң ур ёх нох вусат. Щаԓта юращты питсат хой мет юраңшак, хой аршак хоят иԓ перэмаԓ. Щос моԓтас юращсат. Полуфинал унты Роман Лонгортов па Алексей Куртямов ёхатсаңан. Щита Роман юраңшак уԓмаԓ, сишн ԓув хуԓмет места шитмаԓ. Кат ур икиԓан оԓаң местая ханапсатан: Нёлико Окотэтто юраңшак Роман Пырирко эԓты уԓмаԓ.
Тампуш меет оԓаңпуш яԓап касапса верыԓыса, щит этнобиатлон. Щи щирн мосас ԓохн хухаԓты па щаԓта тынщаң сува ёваԓматы. Сува ант-ки питԓан штрафной круг хухаԓты мосаԓ. Меет каркамшак уԓмаԓ энамты ху Эдуард Лонгортов, ԓув юпеԓн Максим Талигин, па хуԓметаԓ – Юрий Окотэтто.
Хой касапсаятн юращас, хой хорамаңа ёнтам па верам сохат па пормасат этаԓтыйс. Нэңат хорамаңа ԓэщатам нэңатухԓат альсат. Мояң хоятат вантсат па пирысат. Щиты меет хорамаңшака ԓэщатам нэңатухаԓ уԓмаԓ Юлия Германовна Лонгортова хоща.
Етна пелка касапаят етшам юпина вуԓэң ёх иса ун пасан сурый актащисат па яма шай ищман потремисат. Хой кум шитман рутԓаԓ хоща мойԓыты ԓоңемасат. Хой хоԓна юр тайс якты ԓойԓыйс. Щиты яма па хорамаңа емаң хатԓэԓ поснтасэԓ па ям нумасн кимет таԓн ищиты тамиты ияха уйтантыты!
Питԓор
Ԓапат хащамн, 25-мет хатаԓ айкер тыԓасьн вуԓэң ёх Питԓор куртан ияха уйтантысат. Ищи хатаԓн Пулңаватан па вуԓэң ёх емаң хатԓ поснтаса. Сишн шек ар хоят, хоты Овкуртан, воԓаң антом вус. Ищипа емаң хатԓэԓ яма версэԓ.
Ас питарн ун гуляйтты хар ԓэщатам. Вуԓы хотат ԓонщамат, хой потса па самаԓ вохты питса веритас хошмаԓтыты па яма ԓэты. Ариты хар эԓты ханты арат щащсат. Меет сыяңа щащас Валентин Вальгамов. Ԓув рутԓаԓ Питԓорн па Овкуртан уԓԓат. Сишн ԓув нэман Пулңават эԓты емаң хатԓата Ԓорвош района яңхаԓ па шоши хоятԓаԓ кеша каш вераԓ. Ԓув арԓаԓ самаңа хуԓантԓаят.
Куща ёх мойԓапса ясаң китсат па ишканщап нэпекат тусат. Щиты Пётр Сязи Ямал мувев куща ху эԓты Благодарность нэпекан хойса. Щаԓта Степан Максаров Законодательное Собрание ЯНАО эԓты па Благодарностян китса. Уна пелка питам ёх – Владимир Максаров, Вениамин Максаров па Антон Сязи – тынаң мойԓапсаятн мойԓасаят Законодательное Собрание ЯНАО эԓты.
Ԓорвош район куща эԓты Почётной грамотой юкантсаят Иван Сязи па Олег Максаров. Благодарность Думы Шурышкарского района Марина Максарова вуймаԓ. Ассоциация «Ямал-потомкам!» эԓты мойԓапсаятн масаят Владислав па Денис Максаров. Щи тумпина яԓпа этам семья Никита па Виктория Максароват ищи мойԓапсаян хойсайтан.
Мохты, щи юпина, касапса щи питас. Туп вуԓэң ухаԓ воԓԓы шимаԓ уԓмаԓ. Туп няԓ ухаԓ. Вуԓэт куртата па вошата ант тутԓиԓаят, сишн ԓув шеек ар хоят эԓты паԓԓат. Щикут ампат наварԓат, мир шум ар. Ухԓаң отат ԓэԓапман пуңԓа наварматы утчиԓат па роман ёхԓы керԓыԓат. Щиты айнайн хой сорашк навраԓтыйс ныты питса: ёх кутан – Семён Валей, щаԓта Николай Максаров па Митрофан Валей; нэңат кутан – Олеся Сязи, щаԓта Юлия Максарова па Ольга Максарова.
Вуԓэң ухаԓн касты юпина кимет касапсаятн вуԓэң ёх юращты питсат. Щи кеша Щаня ёх па ёхатсат. Вуԓэң ухԓат ант тутԓисат, ванты, хув манты мосаԓ. Сишн муй тахаян веритԓат, щита касԓат. Яна па ар мойԓапсаят ԓув шитсат.
Хуԓампуш хой хувашк навармиман: оԓаң места – Эдуард Лонгортов, кимет – Алексей Пугурчин, хуԓмет – Максим Талигин.
Ухаԓ шоппи наварман: оԓаң места – Эдуард Лонгортов, кимет – Максим Талигин, хуԓмет – Алексей Куртямов.
Тынщаң ёваԓман: оԓаң места – Эдуард Лонгортов, кимет – Митрофан Валей, хуԓмет – Семён Валей.
Юх катна таԓман: оԓаң места – Дмитрий Валей, кимет – Василий Максаров, хуԓмет – Пётр Ледков.
Ԓохн хухаԓман (ёх): энамты ёх кутан – Эдуард Лонгортов, Василий Максаров па Максим Талигин. Уншак ёх кутан – Владимир па Олег Максаровңан.
Ԓохн хухаԓман (нэңат): энамты нэңат – Елена Максарова, Юлия Максарова па Олеся Сязи. Уншак нэңат кутан – Марина Максарова, Надежда Максарова па хуԓмет – Ольга Максарова.
Юращман хой аршак хоят иԓ перэмаԓ нох питас Эдуард Лонгортов. Ԓув юпеԓан Алексей Куртямов. Хуԓмет местая питас Дмитрий Валей.
Щи тумпина ԓохн наварты эстафета верыԓыса. Няԓ команда хухаԓмеԓ. Оԓаң места – МСП «Мужевское, кимет – СП «Горковское», хуԓмет – арсыр вуԓэң ёх, еԓта хащсат – Приуральский район эԓты ёхтам мояң хоятат.
Сельхозпредприятие «Горковское» хоща арпелк вуԓэң ёх щит Мохсар ёх рут. Олег Максаров пиԓн уйтантысув па ԓув еша рупатаеԓ эԓты ястас.
– Ма ин ешауԓ хоԓмаң таԓ ванамаԓ, хоты вуԓы хотан яңхԓам. Ин няԓмет тащн кущяя уԓԓам, – ястаԓ Олег Вениаминович. – Ма ай пора эԓты иса каԓаңԓам пиԓан уԓԓам. Катра, нумԓэм, Питԓорн касты ёхатсат ветьяң пеԓа йи ухаԓ. Ин там пуш щи арат ухаԓ районэв ԓоват ант акатԓан. Энамты ёх иса ԓонщхопата омассат.
Унт ԓыпиятн вуԓы энмаԓты ԓавартшак, сишн щи муң хощаев вуԓы тащат анта шек унат. Щи рупата кенаԓты ураңна Олег Максаров потарԓ мосаԓ кашаң таща квадрокоптер мощатты. Щи мутра пиԓн мохты кена йиԓ па ныты питԓа маты пелка тащен манас. Аԓ щиты-ки муй арат пора хащаԓ па тут-йиңк манаԓ…
Щиты щи емаң хатԓэԓ соханты ванамас. Етна пелка вуԓэң ёх кеша тэԓаң пасанат омпсапсаят, шитам мойԓапсаят мойԓасаят. Шай инщман па потремиман хорамаң арат хуԓантсат.
