Прокопий Герасимович Максаров уԓтаԓ хуват арпелк таԓ вуԓы тащ хотатн яӈхас па рупатс
Вуԓэӈ тащ шавиты ёх рупатайԓ кен антом. Вуԓы тащ энмаԓтыйн лэнь хоятат хув рупатты ант вератԓат. Щиты Прокопий Герасимович энамты няврэм пора эԓты рупатты питас па пенсияя этты унты рупитас. Тампуш ԓув нийԓ-мет хатаԓ ункер тыԓащн сэма питам хатаԓ юбилей нийԓъяӈ таԓ поснтас.
Мохсар ёх рут хувтэԓн вуԓы энмаԓман уԓԓат. Ащеԓ, Герасим Данилович Максаров хуԓмет тащн бригадира уԓмаԓ. 1961 таԓн колхоз имени Жданова ԓап пентом па нох вуйм. Щи юкана Питлярское отделение совхоза «Горковский» пуншам.
Айкер тыԓащн «Ленинский путь» нэмпи газет потарԓ хоты яма рупатԓат вуԓэӈ ёх Питлярский отделение совхоз «Горковский» эԓты. Щита ханшман улмаԓ: «Бригада Максарова Герасима Даниловича взяла обязательство при выходе 73 телят от 100 маток сохранить 95 процентов молодняка».
1979 таԓ эԓты Герасим Данилович тащԓ шавиты похаԓа маԓԓы. Прокопий Герасимович хуԓмет тащн ащеԓ юш еԓԓы туты питаԓ. Камтса таԓ сыс хуԓмет тащ нох питыԓыяс, аршак вуԓы энмаԓтас па хорты ищи аршак мийԓыяс. Щиты ԓув Благодарностятан «за выполнение плана и сохранности поголовья оленей» няԓпуш хойԓыса (1971, 1874, 1979 па 1987 таԓат). Щаԓта книга почета хоща ханшам (№ 149 от 09.10.1985 г.). Кимет таԓн медальн «За трудовое отличие» мойԓаԓа (1986 таԓ). Щи тумпина хоԓна ар тынаӈ мойԓапсаятан юкантыса па премияян мийԓыса. Таԓаӈ 37 таԓ кущая хуԓмет тащан рупатс!
Иймеԓ, Анастасия Архиповна пиԓан, ԓын 1965 таԓн поры версаӈан. Ияха ветьяӈ вет таԓ моԓтас уԓԓатан. Тайԓатан почетный знак «За любовь и верность!».
Хун ԓын рупатсаӈан тащеԓн хутԓэм щорс вуԓы уԓԓийс. Хорсты порайна щорс вуԓы мохты мийԓысат. Таԓн тащеԓ Питԓор лепн тайсэԓ, ԓуӈан па – Воркута вош пеԓа. Ин катӈан хус таԓ моԓтас пенсияян уԓԓатан. Самаӈа тайты вереԓ еԓԓы похԓаԓн туԓа. Ай похаԓ Владислав ищи щи хуԓмет тащаԓн бригадира рупатаԓ, ащеԓ юш еԓԓы нюхаԓаԓ.
Катӈан ияха ԓапат няврэм энмаԓсаӈан: вет эви па кат пох. Эвиԓаԓ иса ун тахаян утаԓтысат, утаԓтаты нэӈата па леккарата рупатԓат. Кат похԓаԓ вуԓы хотатн яӈхԓат. Анастасия Архиповна медаль «Материнская слава» 2 степени тайԓ.
– Пора хайман ма хуԓ веԓты яӈхԓам. Иймем па рыха яӈхиԓыяԓ. Ԓэты ищи мосал, – ястаԓ Прокопий Герасимович. – Хун марэмаԓман, актащԓаман па хота яӈхԓаман няврэмԓув хоща. Ин там йис нврэмат воԓаӈ вуԓы шавиты пеԓа ант вантԓат. Хурыԓам, ай похем пенсияя этаԓ па щи, хой хоԓна йис уԓапсаев еԓԓы туты питаԓ?
Прокопий Герасимович ун звание тайԓ «Почетный гражданин Шурышкарского района». Щи нэм ԓув шитас самаӈа рупатам ураӈна. Ин ԓув пеԓаеԓ энамты ёх вантԓат па ищиты уԓты ант уратԓат!
