Имоӆтыйн унтан Ищки аки па Шовар яха ёхатсаңан. Ищки аки ишкащты питас:
– Ма унтан меет юураң. Кашң воой нох питӆэм, потаӆтаӆэм, еңк пула верӆэм.
– Акайе аӆ ишканща, хоӆ мохет ищипа нох ант питӆаӆан! – Шовар нюхмас.
– Нох питӆаӆам щи!
– Анта ант питӆаӆан! – Шовар ёхӆы перытаӆ.
Щиты потарсатан, потарсатан. Ищкен аки Шовар потаӆтаты номас верас. Па ястаӆ:
– Ма наңен ищипа нох питӆэм.
– Яа, вантӆамен муй, – Шовар ястас.
Ищкен аки Шовар лэңки потаӆтаты питсаӆӆы. Ищки рув эсӆас, вотан поӆты питас. Шовар па наварты, хухатӆыты питщас. Хухатӆыман па анта ищки. Ӆонщ хуват хатытӆыяӆ па потартаӆ:
– Шовра хошам, Шовра руваң! Хатаӆан хошмаӆӆайм!
Ищкен аки метты питас, нумасаӆ: «Шовар щикем юураң!» Ӆув па таканшак ищки вераӆ. Щи арат ищки, юх карат халыӆыӆат, аңкӆат хэрыӆат. Туп Шовар нэмоӆтыйн ант уӆа. Рэп ӆоңӆа хухаӆман хуңхаӆ, рэп иӆпия ӆарыйӆ па нюрам хуват наварман яңхаӆ.
Ищкен аки щах метас, туп Шовар потты ант нумасаӆ.
Ищкен аки нох воӆыйс:
– Наң шеек каркам, муй щиран наңен потаӆтаты!
Ищкен аки Шовра нови сох мойӆас. Щи пора эӆты шоврат нови сохан таӆ хуват яңхӆат па сора наварӆат.
Моштанты щират
Ар ӆонщ ки питаӆ – товийн ун йиңка йиӆ.
Юхан ар пасяр – таӆаӆ хошам питаӆ.
Ӆонщ кур патыйн ки херыйӆ – хошма йиӆ.
Етан найӆ ки вуртыя йиӆ – вотасаң хатаӆ питаӆ.
Амаматсет
Нови сахалд лдарпийлд, питы сахалд юварщийлд. (Хаталд па ат)
Ӆонщ эӆты ай нови поталые хатэмийӆ. (Шоврые)
Охаӆн варас юх таяӆ. (Вуӆы оңтат)
Ликаң ики тыеӆ-тохеӆ яңхаӆ па юш ант хаяӆ. (Ов)
Таӆан па луңан йи хоптанан яңхаӆ. (Хуӆ юх)
Геннадий Кельчин.
Яӆап таӆ мойӆап ясаң
Там керыйм Яӆап таӆна,
Ханты ёх ям мурэв
Нёоӆаӆ катӆам ӆапатсот хоят ант хун тайӆ?
Юухӆаӆ катӆам сёрс хоятӆаӆ хун антом?
Хоӆап хуӆ веӆты
Ар йис пох ар тайӆ.
Пуун хуӆ веӆты
Ар йис пох араӆ уӆ.
Иӆта манты кураң сурпи воой –
Араӆ веӆӆысат.
Нумаӆта ювам тохӆаң сурпи
Ям вооен –
Араӆ мосятысат.
Вояң нёхи мухмаң ёш омасӆат.
Нуптаӆ ки хув нупат ийеӆ омасӆэӆ.
Йисаӆ ки хув йис ийеӆ омасӆэӆ.
Сэваӆ хорам сэвпи наайт,
Весьӆ хорам весьпи наайт
Ханты ёх омтам хошам хот ӆэңкетна
Тааӆ ары шумаӆ ооӆман омасӆат.
Тааӆ монси ооӆңаӆ тувман омасӆат.
Таӆ кепаӆ кат вай ӆумтам,
Турам верам кетэң иськина,
Юур ёшпи ханты похат,
Юх верты тус икет,
Эӆэӆ йир ант потӆа.
Нуптаӆ ки хув нупат па омасӆэӆ,
Йисаӆ ки хув йис па хуӆантэӆ.
Хаӆэват сорни сэм оӆтнаң Наай навина,
Сорни сэм пушмаң Наай эттына,
Хоор эсаӆман унт щанщаӆна
Сот хоораң тась ат хухаӆаӆ.
Сот хоор хухӆам ӆантаң Асс хуват
Охаӆ сэврам охаң сарах ат хуңхаӆ.
Туурам аңки сэваң Наайна
Нёоӆаң ёшпи ар похан ат парӆаюв.
Турам аңки сэваң Наайн
Тус ёӆ ёнты ар эвина ат маӆаюв.
Ханты лопас ӆэсятас Иван Сандрин.
Хорт масат Иван Сандрин, Татьяна Паршукова па интернет эӆты.
