Щи вой ар хоят уӆапса нох павтас, па хоӆна хоята нётман уӆ
Ванхатӆап тыӆащ яртьяң-мет хатаӆн хон мувев ӆоватан емаң хатаӆ – День Героев Отечества поснтаса. Шоши хоятат тампуш лапатъяң хут таӆ нумӆэӆ хоты Ун Лялян нох питсув. Нох питты ураңна вуӆэң хоятат ищи ар юр версат. Ӆув шоши вуӆыӆаӆ пиӆан лялясмеӆ. Мир ӆоватан хоятат ант уйтсат муй арат вуӆэң ёх юр понтсат ляль ештаты ураңна. Ин щи верат эӆты веӆщи потарты питса.
Аспотты тыӆащн Ӆорвош районэва департамент по делам коренных народов Севера эӆты рупатты ёх ёхтыӆысат. Ӆув потарсат муй хорпи нётап шимӆаң рут мирата уӆ па хоты нётӆат вуӆы шавиты хоятата па веӆпасты ёха. Щи сыс ӆув кина поныӆысат. Кина нэмӆ – «Северная кавалерия». Щи кинаян морта эталтаса па потарса хоты ар юр версат вуӆы шавиты ёх ӆув вуӆыӆаӆ пиӆан. Щи кина вантам юпина вуӆэң ёх нумасӆаӆ меет така йисат ӆув войӆаӆ эӆты. Вуӆыӆаӆ па рупатаеӆ эӆты меет самаңа потарты питсат.
– Тампуш муң тумтак касӆысув Кев пелка. Вуӆыӆув щи кемн уӆӆат. Туп ёхлы касаӆтэвн тащев юпина еврат нюхӆасты питсат. Нялъяң-кем ох эватсат, – потарӆ бригадир Юрий Артанзеев. – Сишн мосаӆ муңева рация юкан мутра. Мохты ӆуӆн муң кутӆувн сора айкеӆ китсув маты пелак мохаӆматы мосаӆ, маты щуңн вой вантсуп па кимет вератн нётап.
Вуӆэт ураңна нэман емаң хатӆ камтса таӆ хащамн юкантам. Аспотты тыӆащ 20-мет хатаӆн – День памяти оленно-транспортных батальонов поснтаӆа. Щи кеша Мурманск па Нарьян-Мар вошатн нэман памятникат вуӆэт па вуӆэң ёх ураңна юкантамат.
Ин па хоӆна там йис пора унты вуӆы муңев еӆӆы уӆты нётаӆ. Ӆув хоятата уӆты ӆыӆ маӆ па ӆувеӆ ӆапатаӆ. Вуӆы нёха мир ӆоватан умащӆыман кашӆа. Па муватн ун ох сахат ӆутты вохӆа. Муң шоши мувевн вуӆы нёхаян ашкулаятн па ай няврэм хотатн няврэмат ӆапатӆаят.
Ун пумащипа ястаӆув хоятата хой вуӆэт энмаӆман па тайман рупатаӆ. Ӆув юраң хоятат. Ин воӆӆы шимаӆ щимащ хоят хащас. Сишн ӆувеӆаӆ нётты мосаӆ.
