Кашң таӆ кашң мувн нэңат емаң хатӆ поснтаӆа па нэңат эӆты ханшӆа, потарӆа па ариӆа
Вуӆы тащ хотатн рупатты нэңат – щит юраң нэңат. Ун вошатн па па муватн щимащ рупата эӆты воӆӆы ант уйтӆа. Туп тата, хоӆна муң мувӆувн вуӆы тащат шавиӆаят, нэңат ищи ар нётап верӆат. Нэ-ки антом тащ хотатн маты-ки нушая питӆа. Нэ ӆонщам хот хошма ӆэщатӆаӆы, сыстамӆаӆы па эпӆаң ӆэтот кавартаӆ. Иса муй мосаӆ иса вераӆ. Ӆув юх эватаӆ па халатаӆ, ёхи ӆоңаӆтаӆ па кур аӆаӆ. Щит иса ӆув рупатайӆ.
Иӆ омасты кум антом. Сох татаӆты мосаӆ, вай па сох ӆукарматы омпсыӆыты па мосаӆ. Щикут няврэмӆаӆ вощхемиты па ӆапатты. Етна пелка ёх тащ эӆты ёхи йиӆат – ӆув кешаеӆ ӆэты пасан омасты па щи юпина шакйиңка ювам сох сораӆты па пусты. Вуӆы хотатн сох пусты па ан ӆёхатты машна антом. Сишн щи вер иса ёшн верӆа. Муй арат йиңк мосаӆ – иса нэ ёшатн аӆӆаят. Касаӆты пораян хот лосатты па лонщты вер иса нэ ёша питаӆ. Щи арат юраң нэңат вуӆы тащ хотатн рупатӆат!
Римма Васильевна Пырысева сэма питмаӆ 1967 таӆн. Ашкула етшам юпина ху сая манас па вуӆы хотан рупатты питас. Сельхозпредприятие «Мужевское» хоща 1987 таӆ эӆты рупатаӆ. Ийкеӆ пиӆан кат эви энмаӆсаңан. Айшак эвеӆ Зеленый Яр нэмпи вошан уӆ па рупатаӆ. Уншак эвеӆ па ищи аңкеӆ иты вуӆы хотан рупатаӆ, туп кимет тащан ищи сельхозпредприятие хоща.
Римма Пырысева шеек хорамаңа па туса ёнтасаӆ. Ӆув ёнтам сохӆаӆ еӆта ныӆаят. Вуӆэң ёх емаң хатӆатн ӆув верам хорамӆаӆ ар-пуш нох питыӆысат па мойӆапса шитыӆысат. Ищиты хорамаңа ёнтасты ӆув эвеңаӆаӆ утаӆтасӆы. Ин па вет хиӆые таяӆ. Ӆувеӆа ураңан меет хорам порхаят па вайиет ёнтаӆ. Аңкими ёнтам сох мохты еӆта ныӆа.
Валентина Алексеевна Кондыгина 15 хатаӆ айтахаят потты тыӆащ 1947 таӆн Катравошн сэма питас. Опращӆаӆ уӆтэӆ хуват вуӆы тащ хотатн рупатсат. Щиты Валентина ашкуӆайн нийӆ класс утаӆтаты етшам юпина мохты ёхи хащас. Аңкеӆа па ащеӆа касаӆты нётап верас. Опращӆаӆн шек яма утаӆтаса хоты мосаӆ туңа-щира рупатты па мосты вер верты. Щаӆта 1979 таӆн ӆув рупатая «Горковский» оленеводческий совхоза хашӆтаӆа. Щита ӆув 2001 таӆ унты рупатас па уйтӆор тыӆащн пенсияя сютчаты этас. Намн еша ус па сютчас. Аӆ омасты каш. Щаӆта товиян 2010 таӆн па рупатая этас. Ищи тахая рупатая вуса сельскохозяйственное предприятие «Горковское» хоща. Инты унты ӆув хоӆна рупатаӆ. Энамты ёх эӆты ёхи ант хащаӆ.
Рупатты тащаӆн Валентина Алексеевна самаңа тайӆа па ишакӆа. Ӆув вещкат рупатаӆ, верӆаӆ иса туңа-щира ӆэщатӆаӆы. Нэ рупатайӆ тумпина ёх хоятата нётаӆ тащ ӆойӆтыты па мушмаӆтам каӆаңат нох паватаӆ. Хота мосаӆ энамты хоятата нётаӆ па ястаӆ хоты там па тум вер верты. Ӆув ийкеӆ пиӆан хут няврэм энмаӆсаңан. Кат похӆаӆ ищи вуӆэт пиӆан рупатӆаңан. Ун похаӆ вуӆы леккара рупатаӆ. Айшак отаӆ ӆув пиӆэӆан касаӆаӆ.
Валентина Кондыгина пеӆа энамты ёх хуӆантыӆат па иса муй мосаӆ инщасыӆат. Яма рупатам ураңан ӆув ар-пуш ар-сыр мойӆапсаятн мойӆыӆыса. Щит Благодарность Ӆорвош район куща эӆты 2011 таӆн. Почетная грамота Ӆорвош район куща эӆты 2015 таӆн па Благодарность Ӆорвош район Дума эӆты 2019 таӆн. Туняӆ Почётной грамотой Губернатора Ямал мувев эӆты юкантам. Тампуш сус пораян Валентина Алексеевна 75 таӆ сэма питам хатаӆ поснтаты питаӆ. Щи арат таӆа ванамамн ӆув хоӆна вератӆ рупатты. Энамты хоятата щимащ хоятата вантман пеӆа мосаӆ уӆты па рупатты.
Яна щи нэ ёшатн уӆапса еӆӆы хатаӆ. Хота нэ ёш катӆасаӆ иса туңа манаӆ. Тамщ юраң па вещкат нэңиет вуӆы тащ хотатн уӆӆат па рупатӆат. Хоӆна ар ӆув эӆтэӆаӆ рахаӆ ханштыя. Ат еӆӆы тумтака уӆӆат!
