Вера Макаровна Нензелова 45 таӆ няврэмат пиӆан самаңа рупатас па ӆувеӆаӆ ошаңа энмаӆтас
Няврэмат туңа-щира энмаӆты ар юр мосаӆ. Няврэмат утаӆтыты па уӆты хотатн, ашкуӆа интернататн хоӆна аршак юр па ям так нумас мосаӆ тайты. Кашң няврэм пеӆа ям нумас тайты па пойкман ям ясаңн ӆув пиӆэӆн потарты. Щимащ хоятат рупатӆат няврэмат пиӆан.
Вера Макаровна Нензелова ветьяң пеӆа вет таӆ няврэмат пиӆан рупатас. Туняӆ, Ванхатӆап тыӆащ 8-мет хатаӆн ӆув 65 юбилей таӆ поснтас. Тампуш па ӆуңн ӆув сютчаты этас. Рупата эӆты нох воӆыяс.
– Шеек самаң, ошаң, ям нумсаң нэңие, – ястаӆат ӆув пиӆэӆн рупатам хоятат. – Рупатам хуват няврэматн яма нумӆа, ям ясаңн ӆув эӆтэӆ потарӆа. Кашң хоят пеӆа ӆув ям. Лик ант туӆ. Щитмащ хоятат няврэматн самаңа тайӆаят.
Сэма питас ӆув 1955-мет таӆн Ямкуртан, Макар Григорьевич па Агафья Архиповна семья хоща. Овкурт ашкуӆа-интернатан нийӆ класс утаӆтаты етшаптас. Щи юпина па 1976 таӆн Салехардское педагогическое училище имени А. И. Зверева утаӆтаты етшас. Еӆӆы Асовн кат тыӆащ рупатмаӆ. Щаӆта еӆӆы рупатты китам па мува. Толька нэмпи вош Красноселькупский район хоща утаӆтыты нэңа па пионервожатая рупатс. Щита уӆман па рупатман шеек самаӆн ёхи, ӆув Ӆорвош районаӆа уратас. Сишн, щи нумасн, ӆув Васьёханов курта китӆа. Щита 1978 таӆ сус унты рупатӆ па еӆӆы Овкурта рупатты китӆа. Щита щи ӆув сютчаты манты унты рупатас.
Ӆув пиӆэӆн рупатам хоятӆаӆ ям нумасн ӆувеӆ нумӆэӆ. Ям ясаңан ӆув эӆтэӆ потарӆат. Ат ӆув тумтака уӆ па сютчаӆ. Ин ӆув няврэмӆаӆа нётаӆ хиӆыӆаӆ энмаӆты. Вера Макаровна пеӆа ястаӆув тумтака уӆты па шук ант вантыя!
