Шимӆаң рут мир шоши хоятӆув самаңа тайты верӆаӆ верты ураңна нётапса ох шитсат
Кашң таӆ Ямал мувев ӆоватн губернатор верӆ конкурс на присуждение грантов хоятата, хой овас мув шимлаң мир рут хоятат уӆапса па верат еӆӆы туӆ па нумас таяӆ еӆӆы туты. Щи щирн рахаӆ мосты вер еӆӆы туты. Щи ураңна округ эӆты ох митаӆыӆа. Тампуш Ӆорвоош районэв эӆты камтса хоятат щимащ грантат шитсат. Грант щирн мосаӆ проектата ханшты, хоты мосты верӆ еӆӆы таӆанңа верты питӆаӆӆы.
Инна Лонгортова Мужи вош эӆты. Ӆув грант щирн 200 000 солкува ох шитас. Проектаӆ нэмӆ «Сумат хот». Щи проектал щирн нумас таяӆ Мужи вошн сумат хот ӆонщты. Щита, хот ӆыпиян, иса ханты мосты пормасат питӆат. Няврэмат па ун хоятат ураңна мастер-классат верты питаӆ. Хоятат утаӆӆат ханты пормасат ёшн верты па ӆэщатты.
Унтсоӆкурт эӆты Кузьма Возелов ищи грант шитас. Щит ӆапт сот щорс соӆкува ох. Ӆув утчияӆ куртаӆн кораль верты па тохи вуӆэт ӆутты па еӆӆы энмаӆты. Щимащ нумас хув тэӆн тайс. Туп ох мосас. Катра там куртан ищиты вуӆэт таиӆысайт. Ин грант щирн верӆ еӆӆы манты питаӆ.
Пулңават эӆты Зоя Озелова нумас тайӆ катра хантэт тайм сохат нох ӆэщатты па яӆаптыты. Ӆув музеятн катра хорт вантас. Щита ныӆа хоты хантэт ӆуматӆысат, муй хорпи сохат тайсат, муй хорпи сяшканат вусат. Катра ханшет ищи нох яӆаптаты мосӆат. Грант щирн ӆувеӆ 200 щорс ох митаӆыса. Катра ёнтапса верт нох паватӆаӆы па кимет хоятат утаӆтаӆӆы. Щит ханты мира шеек ям вер
