Там ванан информационно-просветительский портал «Дети Арктики» пуншса
Алёна Лонгортова ищи щита вус. Ӆув тохи ёхтам хуӆамхосьяң няврэм эӆты туп йи ханты эвие. Кимет няврэмат ищи шимӆаң рут мир хоятат эӆты.
Щит – ур ёх, эвенкат, эвенат, чукчаят, охалят па кимет рутат. Щи портал «Дети Арктики» потарты питал ветхосьяң шимӆаң рут мир хоятат эӆты. Хоты ӆув уӆӆат потам муватн, щи эӆты иса потарты па ханшты питӆа. Портал пуншты еӆпи рупатты ёх веет тыӆащ яңхсат па мосты хорат версат, шимӆаң рут мир ёх ясңат ханшсат, катра нэпекат ӆуңатсат па музеята ӆоңтысат.
Алёна антеӆ па ащеӆ вуӆы тащ хотан рупатӆат. Сишн ӆув ай эӆты ханты уӆапса щирн энмас. Рут ясңаӆ самаңа тайӆаӆы па яма потарӆ. Россия мувев Минвостокразвития куща Алексей Чекунков пиӆн ханты ясаңна вуща верас па ӆувеӆ утаӆтасӆы хоты туңа-щира мосаӆ ханты ясаңн ястаты – «пумащипа». Куща пеӆа ястас хоты ӆув хошаӆ вуӆы хот ӆонщты па вуӆыян навраӆтыты.
Алексей Чекунков ястас: «Там пораян Арктика муват пеӆа иса мир вантаӆ. Нын ты ёхатсаты нын уӆапсаен па ясңан уйтты щирн. Кашң таӆ рут ясңат шимӆа йиӆат па ёрэмаӆаят. Сишн хой ясңат уйтӆат, мосӆат еӆӆы туты па ант ёрэматты! Щит шеек тынаң па мосты вер! Пумащипа!»
