Щимащ нэмпи вантапса каш верты ураңна шимӆаң рут мур хоятат емаң хатаӆ кеша ӆэсятса
Туняӆ иты тампуш яӆап коронавирус нэмпи муш ураңна емаң хатӆата мояң хоятат йи лотатн ант акатӆыӆаят. Хоятат воӆӆы марэмасаят. Кашӆы питсат ёӆан омасты. Сишн каш верты хотатн рупатты ёх арсыр мутра верӆат хоты хоятӆува сютчаты пора яма верты.
Кашң таӆ 9-мет хатӆ Унтӆор тыӆасьн шимӆаң рут мур хоятат емхатӆ поснтаӆа. Там емхатӆ Генеральная Ассамблея Организации Объединённых Наций ястам щирн 1994 таӆ эӆты кашң таӆ самаңа поснтаман тайӆа. Тампуш мур ӆоватн 27 тал щимащ емаң хатӆ поснтаӆа. Кашң шимӆаң рут мур ӆув ясаң таяӆ. Ясңаӆ ёрэматы ант мосаӆ.
Туняӆ ищи там емаң хатӆ онлайн верса. Тапуш па емаң хатӆ ураңна онлайн-этноквест нэмӆ «Наследие» верса. Туняӆ эӆты тампуш аршак семья ӆув кутӆаӆн касапсаян юр понтсат. Кашң шимӆаң рутат эӆты – хантэт, урт, саранат па охалят – иса яха актащисат. Кашң командая па семьяя онлайн щирн мосмаӆ вет этап верты па иса хора па нёхты хора верты. Кашң рута мосаӆ лудв катра йис уӆапсаеӆ яма па туңа-щира уйты па нумты. Щит меет самаңа вантса конкурс жюриян.
Жюри хоща няӆ хоят омассат хой шимӆаң рут мур хоятат уӆапса яма уятаӆ. Щит Дина Тарагупта, Татьяна Ануфриева, Дмитрий Тарагупта па Иван Сандрин.
Онлайн-этноквест щирн хоятат таӆаң няӆ щос ӆувеӆаӆ этаӆтысӆаӆ. Кашң этап щос щирн мосас ӆэщатты. Туп ёхи хащсан-ки мохты жюрийн нэпека пос понӆа. Энамты ёх сорашк па хорама хорт ӆэщатсат. Уншак хоятат еша ёхи хащамтысат. Па интернет ищи туп-туп рупатс.
Кашң семья яма па туса кассат. Кашң хоят хорам ернас ӆумтас. Жюри вантас па тамиты местаят понас:
оӆаң места – семья Паршаковых, «Ван рутат/дубль два» Лопхари курт эӆты, кимет места – семья Коневых, «КолХоз Эдуарда» Васьёханов курт эӆты, хуӆмет места – семья Шияновых, «Пухар Ёх» Ӆорвош эӆты.
Щи тумпина жюри хоӆна нэман номинацияят:
– «Самая веселая команда» – «Сынская радуга», Овкурт;
– «Самая дружная команда» – «Три сестры», Касум нёӆ;
– «Самая ловкая команда» – «Родники жизни», Ямкурт;
– «За сохранение традиций» – «К истокам», Суматвош; «Ер Яха тер», Кутопёхан; «Ван рутыет», Питӆор; «Хота каӆтэм», Ӆопхар.
– Пумащипа ястаӆув! Шеек ям вер! Югра па Ямал мув шимӆаң мур рут хоятат ияха пиӆаңа ат уӆӆат, – умащӆыман потарӆат семья Табун Сумат вош эӆты. – Ат ханты рутӆув ясаң па уоллапсу еӆӆы тумтака манаӆ!
