(Оӆаң шупаӆ 5-мет лопасн)

Курк-Лух-Акев-Ики амтатлийӆ. Ӆув иси хошмаӆтыйӆ каврам пусаңан нумпина. Нёрапса ёх иси тутхар пуңаӆан яха актасьмеӆ па тэӆаң пасан сурина порӆыман омасӆат.

– Катра, йис ёх потар сиран, ханты хоятат, матты-ки, каматса щорс таӆ уӆмеӆ Ӆапт-Нум- Турм-Аси хотан, – этар турм пеӆа вантман, иси моӆты турмхот ов кашман, Нёрапса-Ики айӆта по- тремас, – Шееңк ун сярс хуӆам турм ят таймаӆ. Оӆаң турмхот ятан – cелвой ховийӆ, кимет тур- мхот ятан – ар-сыр ӆэтот, хуӆмет турмхот ятан – нови вуӆы тащ ӆув сахатаӆ шушиӆимаӆ.

– Муң там хатӆ Ӆапт-Нум-Турм- Асия мойӆапса китӆув, – Унтари хиӆэӆ ястас, – Нови вуӆы йира хорӆэв.

– Ӆэваса ант рахӆ Нум-Турм-Аси нэма кетамты, – ванан ӆойм хиӆэӆ Товкурт-ики толмасьтас, – Ӆув ве- ратаӆ ӆикасьты па карэк воськиты хоята.

– Там хатӆ рахӆ? – потам шупши ӆэтаӆ сахат, Хутӆи исьмас.

– Там емаң касьтаты хатаӆн шеек рахӆ, – хахса таӆтаӆ кутн, пырсь Нёрапса-Ики нюхмас.

– Муя муң асирасьӆув па ся- сиӆув нэм ант рахӆ такан ястаты? – нох воӆийс потам нохар порты, Юван исьмас, – ӆув аӆи иси Турм хоятат?

– Ун хоята аӆ кетма, муй наң ӆув нэмаӆ хося вер тайӆан! – асирасяӆ ляватмас, – Пирась хоят ясаң так, хоты ястаӆ ситы си питаӆ.

– Уна пелка ювам пырась хоя- тат нэм ханятӆа! – ванан омпсам Киршка опрась-ики ястас, – Уна ювам хоята атом аӆ вера, нётты мосаӆ!

– Нум-Турм-Аси хотан ханты хоятат ёшн арсыр хуӆ катаӆмеӆ, – асирасяӆ аремас, – Шеңк сюняңа хоятат уӆмеӆ Лапт-Нум-Турм хо- тан!

– Мосаң инты унты хантэт ӆуӆан усат, туп… – Киршка похӆ ясңаӆ сохнамтас.

– Хантэт сюняң Ӆапт-Нум-Турм- Аси хотна камтса щорс таӆ уӆмеӆ, – ун ики Ӆар-Хиӆы ураңн потар шитаптас.

– Нум-Турм-Асина инты унты си ханты хоятат шавиӆаит, – па си потар вус Нёрапса-Ики, – Сишн си муң сюняңа па тасяңа уӆӆув ома- сты Емаң Муван.

Ӆапт-Нум-Турм-Асина ханты хо- ятат ӆапатсаит па ӆуматтысаит. Тась шавиты ант мосаӆ, хуӆ веӆты ант китӆаит, туп ёш ёваӆман шу- шиӆымеӆ. Ёнтасты па вератты ант мосаӆ. Шеңк ям ситы уӆты. Нуша вер ант уйтсат ханты хоя- тат. Кашң хоят тасяң ху.

Ёх хоятат яха актасьты пит- сат, ӆув кутӆаӆна кутармиӆат, ляватӆат. Иймет иси полась вер- ты яма хошӆат, ёх кута ӆоңӆат. Ханты хоят уӆапса Ӆапт-Нум-Турм хотна вевтама йиты питас. Торас хуӆанты, хоты хоятат кашң хатӆ ляватӆат, увӆат.

– Хоятат ушмасьты питмеӆ ӆув кутӆаӆна, – тыштыйс пырсь Нёрапса-Ики, – кашң хоят кусяя уӆты уратаӆ.

– Йимоӆтына… Ӆапат-Нум-Турм- Аси турам хот ов пелки пуншас… – айӆат апсеӆ Лар-Хиӆы ястас, – Ханты хоятат иӆӆы аңкармасат па хорамаң Емаң мув шияӆысат.

– Катра пырась икет потартыӆат: Хой шияӆыӆ пелки пуншам турм хот ов, си хоят тасяңа уӆты пи- таӆ! – Нёрапса-Ики осьхуӆ верас, – Хой шияӆыӆ турм хот ов хося нови тась, си хоят ун тась тайты питал!

– Юван, наң, хусаң турма аңкар- мия! – Товкурт-икина похлэңки хусьса, – Наң мосаң иси нови тась шияӆыӆан!

– Ханты хоят хой йишн турм эӆты питам арсыр хуӆ вантас! – Ӆар-Хиӆы няхиӆыйӆ, – Си хоят ар хуӆ веӆты питаӆ!

– Емаң тутхар вусиӆас? – Не- рапса-Ики Опонь хиӆэӆ исьмас, – Ханты хоятат Нум-Турм-Аси хотан шееңк сюняңа усат!

– Йилотн хоятат кашӆы питсат, – ванан омпсам Унтари хиӆэӆ нюх- мас, – омасты Емаң Мува шееңк уратсат.

– Емаң тутхар яма ӆэӆ! – Танько хиӆэӆ уваӆтас, – Ӆонсь ӆоӆты пи- тас, шай-путэв си кавармас.

– Турм эви Порнэ – сит Ӆапт- Нум-Турм-Аси каркам, хорасаң эви, – Карикуры нэмпи хиӆэӆ ай няврэмата толмасьтыс, – Мосьнэ – сит ӆув асэвеӆ.

– Порнэ – сит Турм эви, – рома омастаӆ сахат, Ӆар-Хиӆы нюхмас, – Нёрапса ёх сяси-ими.

Тасяң, хорамаң Порнэ эви нови тась шавиты веритас, хуӆа-ки ма- наӆ – хуӆ веӆаӆ, унта-ки шушаӆ – вой веӆаӆ. Турм эви шеңк яма ёнтасты хошас, ханты имета нёт- мал нови вай, эвтам сах ёнтты.

(Еӆӆы па уӆ)

Ханты лопас ӆэсятас Иван Сандрин.
Хорат масат: Николай Рочев, Инна Лонгортова, Аина Максарова, Алексей Конев па Татьяна Паршукова.