Там ԓапатн сельхозпредприятие «Мужевское» оԓаӈмет тащ хорсты ԓоӈаԓса
Яԓап таԓ тыԓащн хоԓна хуԓам тащ план щирн хорсты понам. Меет оԓаӈн оԓаӈмет тащ хорстыя хорты вуԓыэт пирысаят. Щаԓта ԓув юпаԓн катмет па хуԓаммет тащат ԓэщатыты питсат. Аратԓ план щирн ԓапатсоткем вуԓы ох хорты нумас понтса.
Яԓап таԓ еԓпина, ванхатԓап тыԓащн няԓмет па ветмет тащатн ветхосьяӈ-кем тонна вуԓы нёха ԓэщатом, щит 511 вуԓы. Щаԓта «Горковское» сельхозпредприятие хоща няԓ тащ хорсмеԓ. Ԓув няԓъяӈ тонна нёха миймеԓ – щорскем вуԓы.
Там ԓапатн Мужи вош хорсты лота няԓсот-кем вуԓы воштам. Щит олаӈмет тащ. Ԓув меет ун сельхозпредприятие «Мужевское» хоща. Хащам таԓн ԓув яма рупатмеԓ, па рущ ясаӈна-ки ястаты: сохранность поголовья – 95 процентов. Хоты рупатсат – щиты йиты охԓаԓ этԓат.
– Муӈ тащэв Ворча ԓор эԓты воштасэв, щит сот хус километра. Аратԓ пирысув хорсты кеша няԓсот вуԓы: хуԓмсот ветъяӈ – совхозныйт, ветъяӈ – шошет. Таԓаӈ няԓ хатԓ ты, Мужи унты воштыслудв, Манты юшев хув, воштам вуԓыԓув метсат, ԓонщ куԓ, суювԓув юрԓы питсат па ёхи хащты питсат. Щита щи юш кутапн хус вет-кем суюв нох хорсув, – потарԓ вуԓы леккар, Алексей Озелов. – Ма нумастэмн, катра иты каралан хорсты ямшак вус – хоятата кеншак па вуԓэн вояӈшак. Ин па забойный комплекс унты вуԓэн воштаты эԓты воԓԓы керияԓ, но хат этаԓ. Щикуш тампуш муӈ тащев яма тайсэв, веԓмаӈа энамсат. Вомту ёхан карала тащэв ԓоӈаԓтысэв. Щита хорсты вуԓыԓув пуӈԓа пирысԓув. Таԓаӈ кат хатԓ рупатсув па ты, Мужи пеԓа этсув.
Олаӈмет тащн, аратԓ кат щорс ветсом-кем вуԓы ԓуӈатман уԓ: щорс хутсот – щит совхозныйт, па ярсот моԓтас – шоши вуԓэт. Щи тащн ин хуԓам пастух рупатԓат – Артеев Пётр, Олег Озелов, Михаил Озелов па бригадир Виталий Озелов. Хоты ястаԓ вуԓы леккар, рупатты хоят воԓԓы ат тармаԓ. Алексей Озелов вуԓы леккара рупатԓ, па ищипа тащ шавиты, ат ԓаваԓты яӈхаԓ, хоятԓаԓа нётты мосаԓ. Ищиты-ки совхоз куща ху рупатты хоятԓаԓ эԓты нумасас, щи пораян ԓуԓн шек ям вус. Ин па, там йис, щимащ куща пиԓн хоятат рупатты воԓаӈ ат ԓытԓаят па хоты верты, ԓув шоши вуԓыԓаԓ ураӈна касԓыман яӈхԓат. Туп щиты опращԓаԓ вер еԓԓы туты вератԓат.
Там яԓап таԓн ат еԓԓы тумтака уԓԓат па тащԓаԓ ат уна энамԓат. Щи тумпина, мосаӈ, Турам ащийн хуԓԓаят па ям кущаян понԓаят. Ин па шоши хоятԓув, хорсыт юпина, ԓув ун емаӈ хатԓэԓ кеша ԓэщатыты пиԓат. Хорам, аня сохԓаԓ, нэман ԓэщатам ухаԓԓаԓ па пормасԓаԓ ияха акатты питԓыԓԓаԓ. Айкер тыԓащ 8-9 мет хатԓатн ԓув пиԓаԓн ияха уйтантыԓув Ханты-Мужи курт лепан. Щита ун каш верты па гуляйтты лот ԓэщатԓа.
