Тапмуш хуԓам энамты семьяя Чумовой капитал митаԓыԓа
Вуԓэӈ ёх хоятат пеԓа айнайн яԓап нётопсайт этԓат. Ин там йис округев эԓты кашӈ таԓ хоятат мосты пормасатан маԓайт: щит курат, нюкет, парщинат па нуйят. Щи тумпина тут машнаят па юх эватты машнаят мийԓыԓаят. Ин па яԓап вер этас – рахаԓ ԓапкайн мосты юх эватты машна па тут машна ԓутты, щаԓта кассовый па товарный чекԓаԓ утхота туты. Щи нэпекԓаԓ пиԓн заявление хашԓа па посатам охԓаԓ ёхԓы китԓайт. Щит мосты нётопсайт.
Камтса таԓ хащамн муӈ округев губернатор Дмитрий Артюхов яԓап нётопса верты питас. Щи нётопса щирн энамты семьяята, хота хуԓмет няврэм па аршак сэма питԓат, таԓаӈ хоттэԓ пормасатн митаԓыԓаят – щит хот ԓонщты кеша няԓъяӈ-кем улат, тащ ёнтам парщинат па ԓэщатам нюкет, щаԓта карты кур турпайԓаԓ пиԓна па. Щи тумпина кат ухаԓ: щопув па ул-ухаԓ. Щалта сохԓат ищи морт-кем арат маԓаят. Тармаԓ хотхара верты па яԓап ухԓата понты. Щимащ пормасат мощатамн рахаԓ мохты хот ԓощты па уԓты. Веԓщи ияха уԓты вуԓэӈ хоятата щит шеек ям нётопса. Холща ԓув сораян щи арат пормас мощатԓат, сишн щимащ нётопса верамн уԓапса еша кенашк йиԓ.
Щиты, туняԓ таԓаӈ хуԓам семьяятан, хой вуԓы тащ хотатн касԓыман яӈхԓат, хуԓмет няврэмат сэма питсат. Щи онтасн ԓув заявление ханшсат «чумовой капитаԓ» митаԓыты ураӈна. Тампуш па щи ханшам отԓаԓ ԓувиԓаԓ ёша-кура маԓаят.
Ин там хащам ԓапатн Ԓорвош район куща ху Олег Попов щаня тащат пеԓа яӈхас па энамты семьяята «чумовой капитал» сертификатат мойԓас. Сельхозпредприятие «Мужевское» няԓмет тащ хояща кат семья щимащ сертификатат мощатсат. Щит Лоӈортоват: Вячеслав па Юлия, Роман па Светлана. Ԓув опращԓаԓ вер еԓԓы туԓат па щимащ нётопса ԓувиԓаԓ шеек мосаԓ.
– Нын хощайн ёхатты муӈ шеек уратсув, – ястаԓ Олег Николаевич. – Ма нэман ёхатсам вантыя хоты ԓын уԓԓаты па мойԓапсаят тусам, па меет тыӈат отаԓ – щит сертификат на «чумовой капитал». Еԓԓы, тумтака, самаӈа тайты верт туваты.
– Шеек ям нётопса. Холща ԓапкайн щимащ пормасат ԓутԓан. Аԓ маԓайт, ям щи, мохты рахаԓ яԓап хот ԓощты, – потарԓ Вячеслав Лоӈортов. – Ин щи сертификат щирн Мужи вошн мосты пормасԓув уԓԓув па ёхи туԓԓув.
Ищиты, ешауԓ, хуԓмет семья щимащ нётопсайн маԓа. Щи семья кимет сельхозпредпритие хоща уԓ, «Горковское» хоща. Ԓув хощаеԓ Ԓорвош район куща ищи ешауԓ мойԓты яӈхаԓ. Сишн энамты семьяята ям нумасн еԓԓы уԓты па рупатты мосаԓ.
