Аӆаңсахат эӆты, Ас нопатты тыӆащ 9-мет хатаӆн кашаң куртан хоятат ёшӆаӆн хорат катаӆӆат. Щи хоратн ӆув опращӆаӆ, хой ун ляля яңхас. Ӆувиӆаӆ нумман ӆув ияха вош хулт хуват шушсат. Кашң семьяя атом ляль хойӆыяс.
– Ма семьяем эӆты ищи хоятат ляля тутӆисаят, – потарӆ Инна Романовна. – Ма унащем яйӆ, Иван Алексеевич Севли (хорн вантаӆн), ханты нэмӆ – Пещат ху ики, 1896 таӆн сэма питмаӆ. Колхоз «Красный путь» хоща бригадира рупатмаӆ. 1940 таӆн ӆув, яма рупатам ураңн, Москва воша ун Всероссиийский сельскохозяйственный выставкая китам. Ӆув нэпекаӆн ханшам: «Тов. Севли по национальности хантэ, малограмотный, беспартийный, член колхоза с 1936 года, все время работал бригадиром рыболовецкой бригады. Бригада, руководимая тов. Севли, систематически перевыполняет план рыбодобычи…».
Щиты ӆув яма рупатсат па ешауӆ ун лялян ёхатсайт. Иван акем Няниңкурт эӆты 1942 таӆн ляля туса. Ӆув щита камтса таӆ лялясас. Латвия мувн, Рига нэмпи вош пуңаӆн ӆув ар немпщат паратсаӆӆы, щиты ӆув еӆӆы питсат.
1945 таӆн ӆув мушмаӆӆа па ёхи эсаӆӆа. Иван акем хоӆна хуӆам апщи таймаӆ, Никита, Яков па меет ай ищи Иван. Ӆув ляля манамн кимет нэм таймаӆ, хун нэпека ханшты питам па Ивана ханшам. Щиты кат Иван яй па апщи сакңан устан. Ляль эӆты ёхӆы ёхтам юпина ӆув хоты утлӆам щираӆн еӆӆы хуӆ веӆпасман рупатты питас. 1962 таӆн ӆув антома ювмаӆ. Ёхановн иӆ лоттаман уӆ.
Кимет опращӆ Семен Павлович Севли 1910 таӆн Няниңкуртан сэма питас. Ищи хуӆ веӆман рупатас. Щохар тыӆащн 1941 таӆн ляля туса. Щи порана ӆувеӆ хольмаң молтас таӆ уӆмаӆ. Ӆув Ленинградский фронтан лялясас. Ӆув ар мевӆ юбилейный медалят тайс. Ӆув ищки пораян 1943 таӆн Егор Иванович Романов пиӆн ляль эӆты ёхатсатан.
Кинтак мушмаӆтамат, госпиталян ямашк ювман юпина ёхи китамат. Еӆн еӆӆы рупатты питсаңан. Семен Павлович ӆуңн хуӆ веӆас, пенсияя этам юпина Мужевский рыбкоопан ӆовн пормасат таӆиман рупатты питас.
– Хун ма ай усам, ащем потартас, ӆув Сойм папелк икия аяӆса, ун хоятатн па Куща ху икия аяӆса, – ястаӆ Инна Лонгортова. – 1981 таӆн ӆув антома йис. Ищи Ёхановн иӆ лоттыса. Щи тумпина хоӆна хут рут хоятӆам ляля китыӆысаят. 1945 таӆн ма унащем Егор Павлович Севли ищи ляля китам. Ма ун аңкем потартыяс – ӆувеӆ шеек ӆаварт ус няврэмӆаӆ пиӆн. Щи порана ма ащема кат таӆ ӆоват уӆмаӆ.
Унащем Омск вош пеӆа китыӆыям. Щиӆта ӆув 9 май юпина ёхи ёхтас. Хун ляль етшас, хоятат аматман милӆаӆ нох ёваӆты питсыӆаӆ, унащем па нумасмаӆ – муя па ма милэм ёваӆты питӆэм, хойн па щимащ хошам милна маӆаям, таӆн ищки ат уӆ. Овкурт утхот куща ху Иван Григорьевич Рочев унащеӆ эӆты потарӆ: «Унащем Павел Григорьевич Рочев ӆуңн 1943 таӆн Омск вош пеӆа тувам. Щиӆта маршевый рота пиӆн Калининский фронт пеӆа китам. Ӆув пиӆэӆн Иван Григорьевич Филиппов, Григорий Николаевич Артеев, Марк Иванович Бубин, Николай Васильевич Кондыгин, Трофим Григорьевич Валеев, Антон Дмитриевич Тарагупта па Семен Андреевич Родямов. Щохар тыӆащ 14-мет хатаӆ 1943 таӆн Духовщинско-Демидовской наступательной операцияян такан мушмаӆӆа.
Ма хоӆна нумӆэм, хоты муң яйм пиӆн унащем мушмаӆтам ӆаңкарӆ вантысэв. И.Г. Филиппов, Г.Н.Артеев, М.И. Бубин па Н.В.Кондыгин ляльн паратамат. Киметӆаӆ унащем пиӆн мушмаӆтамт па ёхи ёхатсат. Яма усат па рупатсат! Ӆув муңев, энамты ёх, муң шоши мувев шависат!»
