Щи, там таӆэв Ванхатӆап тыӆащн соханты ванамас. Щи пиӆн уӆам таӆэв ищи етшаптаӆэв. Яӆап таӆэв – 2022 таӆ ешауӆ ёхатаӆ.
Уӆам таӆэв щикем сора хащас: хой рупатс, хой утаӆтыяс, иса мосты верат версув. Па яӆап, коронавирус нэмпи муш ураңан ищи ар ант мосты вер этас. Хоты катра вусув щиты уӆты ант питӆув. Ин кашң хоята мосаӆ коронавирус эӆты хурыман укол понты. Па щи тумпина кашң тахая ӆоңман вешсай сешкан тайты мосаӆ. Симась от ант тайӆан-ки ӆапкая ант эсаӆӆаян па хоӆна штрафан понты вератӆаян. Сишн ин яӆап щирн уӆты утаӆӆув. Кашң таӆ войн юкантам уӆ. Там хащты таӆэв вой – щит ай войие (нампар войие) таӆ. Яӆап таӆэв ёхатаӆ – щит тигр нэмпи вой таӆ. Тигр – щит катет пеӆа уӆты вой. Катет эӆты ӆув меет ун па юураң. Катет емаң войят. Сишн яӆап таӆэв емаң вой таӆ. Ӆувеӆ яма порыӆыты мосаӆ. Нумасӆув яӆап таӆэвн юрңашк па ошаңашк уӆты питӆув.
Нын па еша нумасаты хоты нын хащам таӆэвн вусаты, муй версаты, щи эӆты нумасаты па потартаты:
– Муй ма меет ям версам там таӆн?
– Муй ма атом версам па хоты щимащ па ант верты?
– Рупата щирн муй ма шитсам?
– Муй ям пормас ма мощатсам па ӆутсам?
– Там хащм таӆн муй ма уштасам?
– Хоӆта ма яңхсам?
– Муй яӆап от ӆэсам?
– Хой кеша ям версам, нётсам?
– Муй атом ма вантсам?
– Муй хорпи книгаят, нэпекат ӆуңатсам?
