Ӆорвош районэв ӆоватн фольклорно-этнографическая экспедиция щирн Любовь Возелова рупатӆ
Любовь Геннадьевна Возелова младший научный сотрудник сектора культурной антропологии Научного центра изучения Арктики Пулңават вошн рупатӆ. Ханты ясаң па ханты уӆапса щир иса нэпека па хора верӆаӆы.
– Ма рупатаем хуват Ӆорвощ район хуват яңхӆам. Тата хоятат пиӆан уйтантыӆам хой яма ханты ясаңн потарӆ. Щи тумпина ма акатӆам потрат, монщат, амаматчет. Йис уӆапса эӆты потрат акатӆам, хоты катра пормасат верыӆысаят па ин хоты ӆув верӆаят, – потарӆ Любовь Геннадьевна. – Ин па яӆап щирн тампуш муң Канада эӆты грант шитсув. Щи щирн манэм мосаӆ нэпека ханшты айкеӆат каӆаң эӆты. Муй ӆув ӆэӆ. Хоты ӆув шавиӆа па хоты хоятн тащ кутн моштыӆа. Хой муй хорпи паӆ-пос таяӆ. Хоты паӆ-пос эватӆа. Щи тумпина муй тахаята каӆаң пун верӆа. Энамты пораян, нумӆэм, каӆаң пун муң осма, подушкаята актыӆысув. Ай няврэма отпа понӆа. Ин па там йис щиты верӆа, анта? Щит иса ма оша пайтӆэм па нэпека ханшӆэм.
Там йис иса яӆап щир ханты мирэва ёхтас. Машнаятн тащ хотатн хоятат яңхты питсат. Ӆапка эӆты верам тынщяңатн ёваӆмиӆат. Иса резьна сопекана яңхӆат. Щи вер щи мосаӆ ямашк оша пайтты. Мосаң хой хоӆна катра щирт хоӆна нумӆаӆы па щит верӆаӆы.
– Ма тата Мужи вошн газета хоща рупатсам. Ханты лопсат вантсыӆам. Муй хорпи монщат щита ханшмам уӆӆат. Щаӆта районный музей хоща яңхсам, этнографический материалат акатсам. Центр народного творчества хоща яңхсам, щита ар ханшсам, – ястаӆ Любовь Возелова. – Щи тумпина утаӆтаты нэңат пиӆан уйтантысам. Васьёханован Раиса Александровна Конева пиӆан уйтантысам. Ӆув манэм ар потрас хоты няврэмат утаӆтыӆат, хоты ясңеӆ еӆӆы туӆэӆ. Ин па еӆӆы манӆам Асов вош пеӆа. Щиӆта Ун Аса па яңхӆам. Щаня мува па яңхты вер тайӆам. Ёхӆы мантэмн Ӆорвоша па Питӆора ӆойӆыӆам.
Муши вошн рупаттаӆ эӆты ӆув пиӆэӆн уйтантыяс Владимир Егорович Енов ханты ясаңна ханшты ху. Ӆув потартас хоты ӆув ханшты питас па хоты ӆув Ёмвошан рупатӆ. Щита еша па щирн хантэт потарӆат.
Щимащ ям вер вераӆ Любовь Геннадьевна. Пора сора хащаӆ, хантэт па щирн уӆты питсат. Уншак хоятат уӆтэӆ эӆты иса мосаӆ инщасты, хора верты па ханштыя. Щи актам отат йи тахая акатӆаят. Хун мосаӆ рахаӆ ванты па ӆуңатты.
