Щимащ нэмпи яӆап книга ханты ясаңна этмаӆ
Унтӆор тыӆащ яртьяңмет хатаӆн Овкурт каш верты хотан ар хоят ияха актащисат. Ӆув Зинаида Лонгортова пиӆан уйтантысат. Зинаида Викторовна хон мувев ӆоватн нэпек ханшты хоятат кутан яма уйтӆа. Ӆорвош районэвн ӆув ӆуңтапсайӆаӆ самаңа тайӆаят.
Тампуш ӆув яӆап ханшам книгайӆ этмаӆ. Щи книгайӆ нэм – «Няврэмӆам Посӆаңнэ унаңки монщат». Ханшты нэ ар юр понас нэпек ӆэщатман. Щи книгая нийӆхус монщ ӆоңман уӆ. Кашң монщ умащӆыман ӆуңатты рахаӆ. Кашң монщ уӆапса юш хуват ош маӆ. Щи монщӆаӆ Зинаида Лонгортова оӆңа хув ияха акатмаӆ па ӆэщатмаӆ. Анастасия Николаевна Лонгортова ӆувеӆ щи ям монщат монщмаӆ. Ин щи монщат па книга ванстат лудв няврэмӆаӆ, хиӆыӆаӆ па рутӆаӆ.
Самаңа потремиман юпина Зинаида Викторовна кашаң ёхтам хоята книга мойӆас па ям ясаң ханшсаӆӆы. Ат ӆув няврэмӆаӆа тащ актам па ӆэщатам монщат ӆуңатӆат.
Щи юпина хоятат веритсат вантыя кина. «Хон юш. Путь от Оби» хоятат шеек ольмман вантсат. Кинайӆ ищи Зинаида Лонгортова ӆэщатсаӆы.
Кимет хатӆатн яӆпа этам книга Ямкуртан па Асован этаӆтаса. Щита хоятат ищи умащӆыман хуӆантсат па вантсат.
