Тампуш Леонтий Иванович Нензелов нийԓъяӈ таԓ сэма питам хатԓаԓ эԓты поснтас
Кашӈ хоят уԓтаԓн самаӈа тайты вер мощатаԓ. Хой муй пеԓа номпсаԓ оԓаԓ щи вер верты питчаԓ. Леонтий Иванович ай пора эԓты вантас хоты ԓув опращԓаԓ хуԓ веԓпасман рупатсат. Мосаӈ щи ураӈна ԓув ищиты опращԓаԓ вер еԓԓы туты питас. Ма ԓувеԓ шеек яма нумԓэм хун ма ай вусам. Муӈ антем-ащем пиԓн вуԓы тащ хотатн вусув, вош пеԓа манты юшев Ёханкурт эԓты верман уԓ. Сишн муӈ кашӈ пораян ԓув хощаеԓ хойԓысув. Муй арат ма нумԓэм Леонтий Иванович, ԓув иса каркам хоят, верԓаԓ тус ёшԓаԓн иса туӈа питԓат.
Леонтий Иванович, ханты щирн Левантия айԓԓа. Ԓув 13-мет хатаԓ Курктыԓащ 1944 таԓн Ёханкуртан сэма питас. Опращԓаԓ па ащеԓ Иван Ефремович (Ипры Ванька) хуԓ веԓпасман рупатсат, сишн ԓув айтэԓн утԓас ԓуп катаԓты, хуԓ хоԓап эԓты пайтты па яӈ таԓ ԓоват эԓты утча хоԓпа яӈхиԓыты питас.
Ашкуԓая манты пора ёхтас. Оԓаӈн кат класс Мужи вошн утаԓтымаԓ. Щаԓта Васьёхановн еша утаԓтыяс, па ёхԓы Мужия китыԓыса. Ԓапат-мет класс ашкуԓа эԓты ёхи сютчаты эсԓыям па щи, ёхи хащас. Ащеԓ щи порана мушн ёхатса, ԓаварт ԓувеԓ рупатты питас. Сишн Леванти еԓԓы утаԓтыты ант эсԓам, ястам – хуԓ веԓты нётты мосаԓ. Щиты ԓув хуԓ веԓты рупатты ханшантас.
– Ашкуԓаян ма яма утаԓтысам. Ашкуԓа-ки етшасам, мосаӈ еԓԓы утаԓтыты мантсам, мосаӈ ун кущая йисам, – няхиԓыяԓ Леонтий Иванович. – Па хой хуԓ веԓты питаԓ? Щиты щи еԓԓы рупатсам. Ащем айтэԓн мушаӈ вус, хув шушты ант веритас, пораян ваӈкман яӈхас. Шаншаԓ каши вус. Щи порана воԓаӈ леккар антом, хой нётаԓ. Щиты щи шукащман муӈев ёша-кура паватсаԓԓы. Хуԓам апщиԓам ай пораян парсат. Сишн ма ёх няврэм утча хащсам. Антема-ащема шек нётап мосас.
Хутхосьяӈ таԓпи Леванти 1960 таԓн «Красный путь» нэмпи колхоз рупатты ԓоӈас. Щита 21 хатԓ айтахаят потты тыԓащ 1961 таԓ унты рупатас. Щаԓта ищи хатаԓн кимет тахая рупатая вуԓа – рыбак Восяховского отделения Мужевского совхоза. Щита ԓув пенсияя этты унты (1993 таԓ) рупатас. Пенсияя этас па самаӈа тайты верԓ ант вощкасԓы, ант ёрэмасԓы, инты унты хуԓ веԓты яӈхаԓ.
– Катрашк рупатты ԓаваршак вус: тарам ищкет, так вотат поԓсат, ԓоватн па ампатн хоԓпа яӈхсув. Маты планԓ ищи аршак вус па ищипа хоятат веритсат, – нумаԓмаман ястаԓ Леонтий Иванович. – Нэмоԓты мотор антом. Иса ԓовԓасман яӈхсув. Ёханкуртэв эԓты Тапсыкурт унты камтса хатԓ пелтащман яӈсув. Там йис щиты папуш хоят манаԓ. Хоԓапԓув аԓ хоԓпат (фельтикосовые): етна пелка понԓэн, аԓаӈсахат нох вуԓэн, сораԓԓэн, ант-ки сораԓԓэн – ԓыйԓат па тохты питԓат.
– Катра, совхозэв хоща ханшман вус: кашӈ хоята мосаԓ катхосьян тонна арат хуԓ маты. Муӈ щи эԓты хоԓна аршак мийԓысув, – потарԓ Леонтий Иванович. – Ий таԓ шеек ищки вус. Щи порана еӈк шеек куԓ. Хуԓ ԓаԓты ант вератԓ, шаканты питас. Щи таԓ ма 32 тонна совхоза масам. Щи ураӈна орден «Знак Почёта» (Указ Президиума Верховного Совета СССР от 10 марта 1976 г.) мевԓа ханаԓсаям.
Шитам орден тумпина хоԓна ар- пуш ԓув камн-хорпи ишканщап отатн мойԓыԓыса: медалят – «За освоение нефти и газа Западной Сибири», «К столетию В. И. Ленина», значки – «Ударник коммунистического труда», «Ударник пятилетки», «Победитель соцсоревнований 1975», «Победитель соцсоревнований 1980», «Победитель соцсоревнований 1985», ишканщап нэпекат окружной па районной администрацияяи эԓты, па нэм «Лучший рыбак». Кущаятн яма уйтты питса, инщасты, муй мосаԓ веԓпасты, муй ант тарамԓ. Айшак веԓпасты ёх ԓув эԓтэԓ инщасԓат хота па хоты мосаԓ ямашк хоԓап понты па кимет верат эԓты. Щиты ԓув ун кущаят пиԓн камтса-пуш хуԓ веԓпасты ёх собранията китыԓыса. Пуԓӈавта па Тюмень вошата яӈхиԓыяс. Арпуш пирыԓыса делегата районной, окружной па областной партийный конференцияята. Ар хоят пиԓан уйтантыяс. 2019 таԓн «Почетный гражданин Шурышкарского района» нэмн юкантса. Кимет таԓн памятной медалью «90 лет ЯНАО» мойԓаса.
Иймеԓ, Дарья Алексеевна, Щаня мув Ямкурт эԓты. Эви опращнэмԓ – Пырысева. Леонтий Иванович пиԓан вет няврэм энмаԓсатан, хуԓамхосьяӈ хиԓы тайԓат па ԓапат хиԓы-хиԓы энамԓат. Иса яма па вещката энамсат. Ин ԓув семьяят тайԓат па рупатԓат. Ун эвеԓ Галина медсестрая рупатԓ па уԓ Тарко-Сале нэмпи вошан.
Похаԓ Александр леккар-эндокринолог Мужи вош больницаян, щикут Ԓорвош районэв депутата уԓ. Елена – медсестра- анестезиолог Мужи вош больницаян. Светлана бухгалтера рупатԓ ищи Мужи вошн. Па Татьяна няврэмат иноформатикая Мужи вош ашкулаян утаԓтаԓ.
Каникулы пораятн хиԓыԓаԓ Ёханкурта ёхтыԓыԓат. Ий хиԓэԓ, Максим, ащикеԓ пиԓан айтэԓн хуԓ веԓты яӈхиԓыяс. Ԓув хощяеԓ энмас. Сишн нумас понас ищи хуԓ веԓты. Ин ԓув Ԓорвош рыбоучасток Горковский рыбозавотан рупатԓ. Ащикеԓн иса нётԓа.
– Ма хоты хун пенсияя этсам хоԓмаӈ моԓтас таԓ хащас. Па хоԓна утԓам верэм ант ёрэмаԓэм. Муй аԓ щиты омасты? Утаԓсув рупатты. Хиԓэма нётԓам веԓпасты. Таԓн катра иты пунат понԓам. Ин щи вер энамты ёх ёрэматы питсэԓ, – потарԓ Леонтий Иванович. – Муӈ куртэвн картушка энмаԓԓув, ампат па кати тайԓув. Щиты щи пора хащаԓ. Муши воша няврэмԓув хоща яӈхԓув, камтса хатԓ уԓԓув па ёхи уратты питԓув. Хошм хотн руваӈ, марэмаԓаюв, муӈ куртэвн ямшак.
Туняԓ Леонтий Иванович па Дарья Алексеевна семьяят емаӈ хатԓ кеша Ԓорвош район кущаян мойԓапсаян мойԓасаят. Ԓын ияха 58 таԓ уԓԓатан. Тампуш па Леонтий Иванович юбилей сэма питам хатԓ поснтас. Иса няврэмԓаԓ, хиԓыԓаԓ, хиԓы-хиԓыԓаԓ па рутԓаԓ ар тахаят эԓты ёхатсат па ԓувиԓаԓ ун пасан сурыйн акатсаԓԓы. Яма аматман, апаԓмиман омассат па потремисат, каш версат. Ат па щиты ияха тумтака еԓԓы уԓԓат па кимет сэма питам хатԓатн, юбилеятн уйтантыԓат.