Тампуш ун емаӈ хатԓ район ԓоватан Мужи вош лепн ԓарпитԓа
Туӈашк-ки ястаты Вуԓэӈ ёх хатԓ Ханты-Мужи нэмпи куртан поснтаты питԓа. Таԓаӈ кат хатԓ: 8 па 9 айкер тыԓащ хатԓатн хоятат гуляйтты питԓат. Щи кеша нэман там емаӈ хатԓ парк-музей «Живун» лепн верты нумас понтса. Юш ванан, хантэт катра уԓты мув ванты рахаԓ, хоятат хой ԓытԓат ун вошат па куртат эԓты ёхатты вертԓат. Щи кут музей вантлԓат па вуԓэӈ ёх касапса ищи щи тахаян.
Хащам ԓапатн гуляйтты хар лонщ хирты машнаятн сыстапты па ԓэщатты питса. Вуԓэн ухԓат касты лот па ищи нэман пуртты питса – ат юш такапԓ. Ханты-Мужи папелак нёл-тайн ар ур-хот ԓонщԓаят. Щита рахаԓ хошмаԓтаты, ԓэты па каврам шай инщты. Посԓ питаран па ун касты па гуляйтты хар ԓэщатԓа. Ԓутасты па тынасты харт ищи ԓарпитԓайт. Хотаӈ нэӈат кутан «Хозяйка чума» нэмпи касапса верԓа. Энамты па ай няврэмат кеша ищи ар ёнтапса ԓэщатԓа. Меет ай няврэмат кеша утча ур-хотан няврэмат шавиты таха ԓэщатԓа. Муй рахаԓ иса там емаӈ хатаԓн веритԓа ванты, ԓутты, касты па каш верты.
Касапсаятн меет умащ вантыя хун вуԓэӈ ухԓат навраԓтыԓат. Щи тумпина ԓохна хухаԓты питԓат, ухаԓ шоппи наварты, тынщаӈ сува ёваԓматы, хуԓампуш хой хувашк наварты, юх катна таԓман юращты па хой меет харщи этнобиатлонан. Этнобиатлон – щит хун ԓохна хухаԓԓан па мохты сува тынщаӈ ёваԓԓан. Щаԓта щи юпина хоԓна эстафета семейных команд верты нумас понтса.
Парк-музей «Живун» хоща питԓат тыныты мойԓапсаят, актом-ԓэщатом вонщопсаят, эпԓаӈ ԓэтотат. Щи тумпина камн ун путан вуԓы нёха эԓты шарку каварты питԓа. Шарку путаԓ катсот моԓтас литрая хояԓ. Кашӈ хоят ԓапатты рахаԓ.
Ариты па якты хоятат ищи кашаӈ куртан емаӈ хатԓ кеша ԓыщатыԓат. Ям арԓаԓ па ԓуӈтарԓаԓ утаԓтыԓԓаԓ, якԓаԓ ԓэщатԓыԓԓаԓ. Ёмвош округ эԓты ищи нэман таԓаӈ «Най» нэмпи театр ёхатԓ, вуԓэӈ ёх па мояӈ хоятԓув кеша каш верԓат. Щаԓта ищи округ эԓты музей выставкаят пиԓан ёхатԓат. Москва вош, Пулӈават эԓты па па вошат эԓты ун кущаят, мояӈ хоятат ёхатԓат.
Вуԓэӈ ёхԓув ищи аԓ щиты ант омасԓат: нэӈат хорам ԓуматты сохат ԓэщатԓат, яԓап сохат ётԓат. Ёх па ухԓат, пормасат ԓэщатԓат. Меет юраӈ вуԓэт пирыԓат. Ин тампуш шеек ям тынаӈ мойԓапсаят маԓаят хой касапсаятан нох питаԓ-ки. Сишн щи кашӈ хоят так нумас понаԓ ям мойԓапса шитты.
Туняԓ таԓатн ар-сыр куртан па вошатн Ԓорвош районэвн ԓоватн вуԓэӈ ёх хатԓа понстыԓыса, туняԓ – Овкуртан па Питԓорн, щи еԓпи Мужийн. Ин тампуш эԓты, там таԓ эԓты иса кашаӈ таԓ Мужи вошн вуԓэӈ ёх емаӈ хатԓ поснтаты питԓа. Щиты куща ёх ястаԓат ох мосты тахая ёхатԓа па тынаӈшак мойԓапса рахаԓ мощатты. Щи тумпина вуԓэӈ ёхата ты унты йиты йи хорпи, Питԓор эԓты па Овкурт эԓты сот моԓтас километра. Туняԓ таԓатн Овкуртан-ки емаӈ хатԓ поснтаԓа, туп щаня ёх ухԓатан касԓат, мохсар ёх вуԓэӈ ухԓат ант туԓат, ястаԓат – шек хув. Хун па Питԓорн емаӈ хатԓ – туп мохсар ёх вуԓэӈ ухԓатн навраԓтыԓат. Ин па ԓув кат таха эԓты кутпа ёхатԓат. Вантԓэв маты пелакн меет харщи вуԓэт ухԓата кирԓаят.
Кашӈ куртат эԓты емаӈ хатԓ кеша ун Трэкол машнаят яӈхты питԓат. Хой мояӈ хоятат щи машнаятн вериԓта каш верты лот унты ёхатты. Щи тумпина Мужи вош па Ханты-Мужи кутатн автобус ты-тохи таԓаӈ хатаԓ яӈхты питаԓ. Щит шеек ям! Уйтатԓув ияха вуԓэӈ ёх емаӈ хатаԓн!