Кашң хоят ӆув муваӆн хоты ӆытӆ щиты уӆ па емаң хатаӆ ӆув щирэӆн поснтаӆ
Муң Яӆап таӆ емаң хатӆ поснтаӆув Ванхатӆап тыӆащ соханты хатаӆан. Щаӆта кимет тыӆащ – Яӆаптаӆ тыӆащ – ёхатаӆ. Щи тыӆащ эӆты ялап таӆ ӆуңатты питӆа. Муң хощаев уйтӆэв хоты щи хатӆэв поснтаӆэв. Хоты па муватн Яӆап таӆ поснтаӆа?
Китай. Щи мувн Яӆап таӆ – щит тови хатӆат. Щи емаң хатӆ тыӆащ щирн ӆуңатӆа. Кашң таӆ катхосьяң эӆты йи войя юкантӆа. Иса вурты ернасата ӆуматӆыӆат. Якӆат, ариӆат. Ар-сыр тутат вущатӆат па фейерверкат тохӆат. Щиты ӆув атом кулят пуңӆа воштаӆат.
Япония мувн таӆаң тыӆащ Яӆап таӆ емаң хатӆ поснтаӆат. Ванхатӆап 25-мет хатӆ эӆты поснтаты питчаӆат. Японцат бамбук юхн па хуӆ юхн хотӆаӆ хорамӆыӆаӆ. Щи юхат самаңа тайӆыӆаӆ. Рис эӆты верӆат нови па вурты щанькаят. Щитат мойяң пасана омасӆат.
Тайланд мувн Яӆап таӆ Ункер тыӆащ 13-мет хатаӆн поснтаӆа. Щи хатӆ эӆты ертаң хатӆат питты питӆат. Щи щирн ӆув турам пеӆа пойкащты питӆат. Хоятат ӆувеӆаӆ йиңкан шошамты питӆат. Хой муй эӆты вератӆ щи эӆты йиңк шошамӆ. Щиты ӆув атом нумсат нох лёхатӆат.
Индия мувн таӆ сыс камтса арат Яӆап таӆ поснтаӆат. «Гуди-падва» – щимащ нэмпи емаң хатӆ Айкер тыӆащн верӆа. Па кимет «Холи» нэмпи емаң хатӆ товиян поснтаӆа. Турам ими «Холики» нох ущатӆа па щи тут эӆты мис тащ воштаӆа. Тут лавмат эӆты хоятат няр курты яңхӆат па наварӆат. Щи юпина хоятат ӆувеӆаӆ ар-сыр хорпи оляпан оляптыӆӆаӆ па восты йиңкан шошамӆыӆӆаӆ.
Эфиопия мув хоятат Щохар тыӆащн Яӆап таӆ поснтаӆат. Щи емаң хатӆ нэмӆ – Энкутаташ. Хоятат вош харн ун паӆ тут хар ущатӆат па вантӆат маты пеӆа тут лавмат рыйӆат. Щи пелакн ӆэвпас яма энамӆ.
«Рош ха-Шана» нэмпи Яӆап таӆ евреят мувн гуляйтӆа. Сус пораян хоятат ияха актащиӆат па уйтантыӆат. Щи порана яблок мави пиӆан ӆэӆат, нумасӆат ат Яӆап таӆ саккараңа уӆ.
Итальянцат па Яӆап таӆ питтыйн ишнет эӆты катра, ант мосты сохат па пормасат ёваӆӆат. Нумасӆат, аршак пормас-ки вощкаӆан – меет ойяңа па пищаңа уӆты питӆан.
Греция мувн Святой Василий нумман тайӆа. Ӆув нуша хоятат нётман тайӆаӆы. Ӆэвпас щанька верӆа па ӆыпия карты ох-шук понӆа. Хоя щи ох-шук хойӆ – ӆув тумтака еӆӆы уӆты питаӆ. Хоятат потарӆат, Святой Василий щиты охӆаӆ щанькая поныӆысӆы па нуша хоятата мийӆысӆы.
«Самайн» – щит Шотландия мувн уӆты хоятат емаң хатӆ. Ӆув поснтаӆа Ас потты тыӆащ 1-мет хатаӆн. Щи хатаӆн хоятат етшаӆат энмаӆтам ӆэвпасӆаӆ нох уты.
Щит туп муң еша ӆуңатсув хоты хоятат Яӆап таӆ поснтаӆат. Мир шеек ун, хоӆна ар рахаӆ ӆуңатты. Нын па хоты Яӆап таӆ емаң хатӆ поснтаӆты?
