Туняӆ, вуӆэң ёх емаң хатӆ иты Ворңа хатӆ ищи ант поснтаса. Тампуш па ӆавӆам Ворңа хатӆ Ӆорвош районэв ӆоватн Ӆорвош Емаң ӆор питарн ар хоят актас, куш рупатты хатӆ ус.
Актащм хоятат вантапса хар ӆэщатсат. Катра щирн ӆуңхӆув пеӆа вуӆы хорсат. Якты па аремиты ӆойӆысат. Каш версат. Касты па юращты па ӆойӆысат. Щи юпина эпӆаң шарку па хуӆ ӆэсат.
– Катра эӆты хантэт потарӆат, хун ворңа кащаӆыӆа – щит хошам найяң хатӆат йиӆат. Тампуш щиты щи уӆ, камтса хащм хатаӆн ворңа ими вантсам. Ин па хошам хатӆат ӆойӆат. Ям, камн умащ, – потарӆ район куща ӆаңкар иӆпи Степан Борисович Семяшкин.
Щи тумпина кашң куртан районэв ӆоватн ищи шоши хоятӆув ияха актащисат.
Щи хатӆ районэв куща Олег Николаевич Попов рупатайӆ щирн Лопхария яңхмаӆ. Ӆув ищи щита Ворңа емаң хатӆа яңхас, шоши хоятат пиӆна уйтантыяс. Ям ясаң ястас.
Там сютчаты хатӆатн, субботайн 10-мет хатӆ Ункер тыӆащн Ханты-Мужи куртан Ворңа хатӆ поснтаты питӆа. Хой вератӆ ёхтаты, уйтантыяты, каш вераты!
