Ун нётапса вер Воӆаң Отечественной ляльн версат Овс мув шимӆаң рут мур хоятат. Овс мув рут хоятат уӆапсаеӆ хуват иса унтан яңхиӆысат. Сишн щи уӆты вераӆ ӆувеӆаӆ ляль порайна шеек нётап верас. Камн хорпи унтат ӆыпиян ант тапӆат. Пушкан ёшн катаӆты па нёӆ эсаӆты айтэӆн хошӆат. Щи ропахн ӆув соӆтана арпелк пушан эӆты ортты тутӆисаят.
Муң семьяев рут Тарасоват ищи ляля китыӆысаят. Ун аңкем Евдокия Степановна Шульгина (Тарасова) кат ай апщиӆаӆ кинтак ляля тусаят. Ӆув эӆтыӆаӆ ун аңкем иса сэм йиңк эсаӆман потартыяс.
Йи апщеӆ – Филипп Степанович Тарасов. Ванхатӆап 15-мет хатаӆн 1920 таӆн Асов куртан сэма питас (ин там уӆты Асов курт Тарасоват рут меет оӆаңн уӆты питсат). Ашкула етшам юпина Пулңавта утаӆтаты яңхас. Щи юпина 1943 таӆ оӆаңн ляля туса. Лялясас 1321 стрелковый полкан 415 стрелковый дивизияян. Командира противотанковой истребительной пушки поныӆыса. Белорусский, Украинский, Прибалтийский фронтатн немпщат пиӆан лялясас. Чехословакат, Польша хоятат ӆыӆ аратыты нётас. Германия мув Берлин нэмпи вооша ёхтыӆыяс.
Самаңа па тармат лялясам ураңна ар тынаң ишканщап па орденат медалят пиӆн мойӆам. Щит: орден Славы III степени, хуӆм орден Красной Звезды (хуӆметӆ парам юпина семьяяӆа 1963 таӆн маса), медалят – «За отвагу», «За взятие Варшавы», «За взятие Берлина», «За Победу над Германией в Великой Отечественной войне 1941-1945 гг.»
Ляль юпина Филипп Степанович иймеӆ Анна Михайловна (эви опращнэм – Конева) пиӆн яң няврэм энмаӆсатан. Ляльн мушмаӆтыйм нюлмӆаӆ ивевн кашия ювантысат. Щи онтасна ӆув туп 43 таӆ вус. 1963 таӆн антома ювмаӆ.
Кимет апщеӆ – Никита Степанович Тарасов. Ищи Ванхатӆап тыӆасьн сэма питас, туп 11-мет хатаӆн 1922 таӆн. Ашкуӆа етшам юпина Пулңавта вуӆы леккара утаӆтыты манас. Туп ант етшаптас – ляль пора ёхтас. Ӆуңн 1941 таӆн Омск вооша китса, хота артиллерийский ашкулаян таӆшуп утаӆтыяс. Па мохты Москва пеӆа стрелковый девизияя китса. Сталинградский битвайн ӆув пиӆ ёхӆаӆ пиӆн немпщат дивизия фельдмаршал Паулюс ая версэӆ. Па щи юпина 17-мет танковый армия Манштейна па 4-мет воздушный флот Рихтофена шитама вермеӆ. Щи эӆты камтса книгаят ханшамат па кина хор верам.
Щи Сталинградский лялясам лотан Никита антома йиӆ. Ёхи нэпек ёхатӆ, хота ханшам: «Нын похен, Никита Степанович Тарасов 1922 таӆн Омской областьн Ямало-Ненецкий национальный округан Ӆорвоош районан Кушеват утхотан Асов куртан сэма питам хоят. Советский Союз мув аратыман 19-мет хатаӆн Ванхатӆап тыӆасьн 1942 таӆн паратам». Волгоградской область Верхне-Кумский станица пуңаӆн иӆ лоттыман уӆ. Мамаев курган мемориальный комплексан «Героям Сталинградской битвы» ӆув нэмӆ ханшман уӆ.
Симась каркам акиӆам эӆты муңев потартыяс муң ун аңкев. Там йис па муң щи эӆты няврэмӆува потарӆув. Щиты щи тамщ потрат еӆӆы туты па нумман тайты мосаӆ.
Людмила Шульгина ӆэщатам потар.
Иван Сандрин ханты ясңа толмащсаӆӆы.
