Ӆорвош районэв кашаң куртан щи хатаӆ поснтаса
Шимӆаң рут мир ёх емаң хатаӆ мир ӆоватан поснтаӆа. Тампуш нийӆхус таӆ хоты тамащ хатаӆ поснтаӆа. Щи рут хоятат ротая уӆӆат па щи урңа ӆув эӆтыӆаӆ мир ӆоватан потарӆа. Ӆув иса шоши ясңат тайӆат. Щи ясңат па уӆапса ант ёрэматы ураңна емаң хатӆа поснтаты питса.
Ӆорвош районэв ӆоватан онлайн-этноквест «Наследие» ӆэщатса. Кашң семья ӆувеӆ этаӆтас, хоты ӆув шоши уӆапсаеӆ па ясңеаӆ уятӆэӆ. Щиты нийӆ семья касты лота ӆойӆысат. Ӆорвош районэв тумпина хоӆна Надым вош эӆты семьяят ищи ӆувеӆаӆ этаӆтысӆаӆ. Кашң семья этаӆтас муй хорпи эплаң ӆэтот хошӆат ӆэщатты, щаӆта хорамаңа ёнтам сохат альӆысат. Еӆӆы этаӆтасат хоты каркама наварты хошӆат. Потарсат хоты шоши мувеӆ самаңа тайӆэӆ. Жюри пеӆа этаӆтасат хоты туса веранты хошӆат.
– Кашаң семья ӆувеӆ шеек яма этаӆсаӆӆы. Умащ ванты хоты хоятат ӆув шоши уӆапсаеӆ еӆӆы туӆэӆ. Ат па щиты еӆӆы питаӆ. Ин ки рут ясңевн потарӆув, щиты еӆӆы шимӆаң рут мир хоятӆув еӆӆы уӆты питӆат, – ястаӆ председатель жюри конкурса Дмитрий Тарагупта. – Хой еша нохшак питас па ямашу ӆувеӆ этаӆтасӆы муң ястаӆув там субботайн 12-мет хатаӆг катхосьяң щосн. Юган ёхан каш верты лота Мужи воша ёхтаты!
Ӆорвошан емаң хатаӆ кеша ун выставка «Сохраняя традиции» нэмпи ӆэщатыса. Кашң хоят хой туса вератӆ щи лота верам отӆаӆ тутӆисӆы. Ямкуртан ищи емаң хатаӆ поснтаса. Ӆув па «Зов тайги» нэмпи каш верты ёнтапсайн ётсат. Щи эӆты ӆув ханты па охалят уӆапса эӆты потремисат. Горка вошан па «Игры и забавы кочевых народов Севера» ӆэщатыса. Унат па аят, иса ётты па касты ӆойӆысат. Питӆор вошан па ханшет ханшсат па эватсат. Щикут ӆув оша паятсат муй хорпи ханшет уӆӆат па муя ӆув мосӆат. Овкуртан каш верты хотан «Здравствуй, праздник мира на земле» ӆэщатыса. Тата нарасӆысат, ханты па рущ ясңатан арат арисат па яксат. Вантапса хар «Краски Севера» па поныӆыса. Щаӆта щи юпина якты хар ӆарпиӆыса. Азов вошан па ёх касты ӆойӆысат. Щи касапаса нэмаӆ «Национальные игрища». Вошаң ёх ӆув кутӆаӆн еша ётсат па касса овас мир ёх касапсаятан.
Щиты яма па самаңа Ӆорвош районэван емаң хатаӆ поснтасэӆ. Ат шимӆаң мир рутат еӆӆы тумтака уӆӆат па шоши уӆапсайӆаӆ па ясаңӆаӆ еӆӆы шавиман тайӆаӆӆаӆ.
