Хой хоӆна тохи ант ханштыӆыяс, ханштыӆыяты. Щи щирн митаӆыты нётап хоятата сорашк вертӆа вертыя
Статья 7.1 Федеральный закон от 30.04.1999 г. №82-ФЗ «О гарантиях прав коренных малочисленных народов РФ» щирн уйтӆа муй арат хон мувев ӆоват шимӆаң мир рутат уӆӆат па муй нётап ӆувеӆаӆ мосаӆ. Щи щирн мосаӆ кашң хоят щи учёта ханштыя. Катра щиты паспорта ханшман вус хой маты рут мира ӆуңтасӆ. Ин па яӆап щир – шимӆаң рут мир хоятат ураңна реестр верӆа.
Москва вошн уӆ ФАДН – Федеральное агентство по делам национальностей. Хой заявление реестр ураңна ханшас иса ФАДН хоща уйтты питӆаят.
Реестра ханштыӆыман ураңн сорашк мосаты нётап рахаӆ мощатты па ӆэщатты. Щи нэпек щирн рахаӆ ант хурыман хуӆ па вой веӆты. Пенсияя нётап ох сохаптыӆа. Щимащ нётап ураңн кашң пораян ант мосты питаӆ нэпекат акатты. Ипуш ханштыӆысан па щи.
Муң Ӆорвош районэвн рахӆ щимащ тахая ханштыӆыты ураңна ут хота яңхты, ассоциация «Ямал-потомкам!» па МФЦ хоща. Кашң куртан ут хотатн рупатты хоятат нётӆат нэпекат ӆэщатты.
МФЦ щирн кеншак па сорашк заявление ӆэщатты. Ункер тыӆащ эӆты щиӆта рахаӆ нэпекат Москва воша киттыя. Щиты хутсот моӆтас хоят нэпекат ӆэщатсат. МФЦ па «Ямал – потомкам!» хоща рупатты хоятат Ӆорвош районэв ӆоватн ищи яңхӆат. Ӆопхар па Асов вошата яңхсат. Хоӆна Овкурт пеӆа нумас яңхты тайӆат.
Там пора унты районэв эӆты щорс катсот моӆтас шимаӆаң мир рут хоятӆув заявление масат. Щит арпелк хантэт па камтса ур ёх.
Хой заявление ханшас ӆувеӆа ёхӆы письмо ёхатаӆ. Хой кум ант шитас заявление ханшты, хоӆна пора уӆ. Семьяйӆан, рутӆан, ванан уӆты хоятӆан иса китаӆн шимӆаң рут мир хоятат реестра ханштыӆытыя!
