Щи емаң хатӆ Унтӆор тыӆащ кимет хатаӆн поснтаӆа
Там емаң хатӆ хантэтн катра йис эӆты самаңа тайӆа. Моӆха па щирн айяӆса: «Иӆта мув икия поры верты щир». Щиты ястаӆ Надежда Егоровна Лонгортова. Щи хатӆ эӆты наяң хатӆат айӆта ванашк йиты питӆат па айнайн атат патлама йиты питӆат.
Катра хоятат потартысат: «Там хатӆ унты тумтака усув, щиты-ки, хоӆна еӆӆы тумтака уӆты питӆув». Там емаң хатӆа иса ияха хоятат рутӆаӆ пиӆн па па хоятат пиӆн уйтантыӆат. Порыӆыты харн актащиӆат. Мойӆыты яңхӆат. Энамты ёх ар хоят кутн эвиет пеӆа вантыӆыӆат. Еӆӆы уӆты ищи пиӆ мосаӆ. Щи кут ун ӆанты па хошьйиңки путат кавартӆат. Меет ям па эпӆаң ӆэтот пасаната понӆат.
Кашң хоят емаң лотан емаң сумта сяшкан-шук яраӆ. Щи еӆпи сяшкан пусңа шашиӆыӆа. Щаӆта, хатӆ манты щирн, сумат еӆпина хуӆам-пуш ох понӆа па ям нумасн веӆщи сяшкан юха ярӆа. Уншак нэңат ӆапат нови ернас юха ярӆат, – ястаӆ Надежда Лонгортова.
Хуӆам ан яӆап ӆэтот пиӆан юх пеӆа, тут пеӆа па йиңк пеӆа омасӆа порыӆыты ураңна. Тут-ими пиӆна потарӆа. Тут-ими – емаң. Ӆув пиӆан ёнтыя ант рахаӆ. Шоппи наварты па пурэматы ищи ант рахаӆ. Полщаң лякты ем. Хоятат Тут-ими пеӆа вантман ёш нох вощемиӆат па пойкащман потарӆат: «Ун Турам-Аңкие! Юр муңев мия!»
Порыӆыям анат пасаната омасӆаят па иса ёхтам хоятат пасан сурыя омасӆат. Ӆэӆат, инщӆат па потремиӆат хой муй айкеӆ тайӆ. Каш ищи верӆат. Няврэмат ётӆат па наварӆат. Хой якты ӆоемияӆ. Хой касты нох ӆойӆыяӆ. Нэңат арыӆат.
Порыӆыты хар эӆты ёхи манты еӆпина кашң хоят емаң сумат иӆпия карты ох ёваӆӆат. Ёх ӆапат ай нови ернас ияха ярӆат па юх тая ющтаӆат. Нэңат па кат-пуш тамиты потарӆат: «Турам Аңкев ӆапат пох тайс. Там ернасыет Турам Аңкева китӆаӆӆув». Щи юпина ёх па нэңат ияха ӆапат-пуш увӆат: «Оо!» па хатӆ манты щирн хуӆам-пуш ох понӆат па ёхи манӆат, – уйтман потарӆ Надежда Егоровна.
Щиты порыӆыӆа!
