Курк тыӆащ 21-мет хатаӆн мир ӆоватан уӆты ясңат кеша емаң хатаӆ поснтаман уӆ Ямал мувев ӆоватан няӆъяң пеӆа ӆапат ханшты хар ӆарпиӆыса. Кашң хоят муй ясаңн хошаӆ потарты па ханшты пирыяс муй ӆувеӆ верты. Саранат, урт, селькупат ӆулв ясаңӆаӆн ханшсат. Хантэт па арсыр потрапсаят тайӆат. Хоя хоӆща ямшак ханшты вус, щиӆта ханшсат – хой веритас ханшты лотата яңхас, хой кум ант шитас – веритас онлайн-трансляция хуӆантман диктант ханшты.
Мужи вошн ханты ясаңн диктант урхот ӆыпиян ханшса. Инна па Леонид Лонгортовы хот ов пуңаӆн, пушас ӆыпиян хот ӆонщмеӆ. Щикем ям, умащ ванты, курт ӆыпиян урхот ӆойӆ. Хой ӆытӆ, веритаӆ шай инщты ӆоңемиты. Ищиты диктант ханшты ёх щи мояң хота ӆоңтысат, ханты ясңеӆн диктант ханшсат па щаӆта эпӆаң каврам шай инщман ханты рут ясңеӆн потремисат. Па ищиты еӆӆы ияха уйтантыты нумас понтсат.
Ханты ясаңан ӆорвош район потрапсаян Ёмвошн ищи диктант ханшса. Щита ищи морт-кем арат муң хантыӆув уӆӆат па рупатӆат. Сишн рут ясңеӆ ант ёрэматы ураңна яңхсат диктант ханшты. Диктант луңтас Федосья Макаровна Лельхова (Лонгортова), ӆув кандидат филологических наук, шоши рут ясңаӆ воӆӆы торӆы уйтӆаӆы.
