Леонтий Иванович Нензелов муй арат ӆувеӆ нумӆаӆы ай пора эӆты хуӆ веӆман рупатӆ
Хуӆ веӆпасты ёх емаң хатӆэӆ поснтаӆат. Уна пелка ювм хоят ин шимӆ веӆпасты панат па ӆоратн ныӆаят. Леонтий Нензелов, ӆув кутӆаӆн аяӆӆа дядя Лёня, Ӆорвош районэв ӆоватн кашаң хоятн уйтӆа. Ӆув ин куш пенсияян уӆ ищипа самаңа тайты верӆ ант ёрэмаӆӆы. Трудовой нэпек щирн ӆув няӆъяң пеӆа няӆ таӆ рупатмаӆ. Нэпека ант вантман-ки хувтан ар таӆ рупатӆ, па хоӆна юр тайӆ веӆпасӆыты.
Ӆув 13-мет хатаӆ Курктыӆащ 1944 таӆн Ёханкуртан сэма питас. Иса ӆув рутӆаӆ па опращӆаӆ хуӆ веӆман вусат. Сишн щи айтэӆн кашң няврэм щи вера яма утаӆтыман вус. Ашкуӆая манты пора ёхтас па ӆувеӆ тохи китса. Оӆаңн кат класс Мужи вошн утаӆтымаӆ. Щаӆта Васьёхановн еша утаӆтыяс, па ёхӆы Мужия китыӆыса. Ӆапат-мет таӆн ашкуӆа эӆты ёхи сютчаты эсӆыям па щи. Ащеӆн еӆӆы утаӆтыты ант эсӆам, ястам – хуӆ веӆты нётты мосаӆ.
– Ашкуӆа-ки етшасам, мосаң еӆӆы утаӆтыты мантсам, мосаң ун кущая йисам, – няхиӆыяӆ Леонтий Иванович. – Па хой хуӆ веӆты питаӆ? Щиты щи еӆӆы рупатсам. Ащем айтэӆн мушаң вус, хув шушты ант веритас, ваңман яңхас. Шаншаӆ каши вус. Щи порана воӆаң леккар антом, хой нётаӆ. Щиты щи шукащман муңев ёша-кура паватсаӆӆы. Хуӆам апщиӆам ай пораян парсат. Сишн ма ёх няврэм утча хащсам. Аңкема-ащема шек нётап мосас.
Щиты ӆув оӆаңн аӆ ащеӆа нётас веӆпасты. Хутхосьяң таӆ эӆты рыбака ханшӆтаса. Колхоз «Путь Ленина» хоща оӆаңн рупатты питас.
– Щи порана ӆаварт пора вус, – нумаӆмаман ястаӆ Леонтий Иванович. – Нэмоӆты мотор антом. Иса ӆовӆасман яңхсув. Ёханкуртэв эӆты Тапсыкурт унты камтса хатӆ пелтащман яңсув. Там йис щиты папуш хоят манаӆ.
Катрашк рупатты ӆаваршак вус: тарам ищкет, так вотат поӆсат, ӆоватн па ампатн хоӆпа яңхсув. Маты планӆ ищи аршак вус па ищипа хоятат веритсат.
– Катра, совхозэв хоща ханшман вус: кашң хоята мосаӆ катхосьян тонна арат хуӆ маты. Муң щи эӆты хоӆна аршак мийӆысув, – потарӆ Леонтий Иванович. – Ий таӆ шеек ищки вус. Щи порана еңк шеек куӆ. Хуӆ ӆаӆты ант вератӆ, шаканты питас. Щи таӆ ма 32 тонна совхоза масам. Щи ураңна орденна «Знак почёта» мевӆа ханаӆсаям.
Шитам орден тумпина хоӆна ар-пуш ӆув камн-хорпи ишканщап отатн мой-ӆыӆыса: значки «Ударник коммунистического труда», «Ударник пятилетки», юбилейный медалят, ишканщап нэпекат па нэм «Лучший рыбак». Кущаятн яма уйтты питса, инщасты, муй мосаӆ веӆпасты, муй ант тарамӆ. Айшак веӆпасты ёх ӆув эӆтэӆ инщасӆат хота па хоты мосаӆ ямашк хоӆап понты па кимет верат. Щиты ӆув ун кущаят пиӆн камтса-пуш хуӆ веӆпасты ёх собранията китыӆыса. Пуӆңавта па Тюмень вошата яңхиӆыяс. Ар хоят пиӆан уйтантыяс.
Иймеӆ, Дарья Алексеевна, Щаня мув Ямкурт эӆты. Эви опращнэмӆ – Пырысева. Леонтий Иванович пиӆан вет няврэм энмаӆсатан. Иса яма па вещката энамсат. Ин ӆув семьяят тайӆат па рупатӆат. Каникулы пораятн хиӆыӆаӆ курта ёхтыӆыӆат. Ий хиӆэӆ, Максим, ащикеӆ пиӆан айтэӆн хуӆ веӆты яңхиӆыяс. Ӆув хощяеӆ энмас. Сишн нумас понас ищи хуӆ веӆты. Ин ӆув Ӆорвош рыбоучастокан Горковский рыбозавотан рупатӆ. Ащикеӆн иса нётӆа.
Ин там ӆуң-сыс па Туңӆора касаӆсат. Ёхановн па хот тайӆат. Сус унтыщи тахаятн уӆӆат. Туп ищкия йиты пораятн ёхӆы Ёханкурта касаӆӆат. Ин руваң хатӆат па хоӆпат кат-пуш йи хатаӆн вантыя мосӆат. Ант-ки вантӆэн, хуӆэн няхияӆ па шакаӆ. Щимащ хуӆ потам хота ант вуӆа.
– Ма хоты хун пенсияя этсам хоӆмаң пеӆа нийӆ таӆ хащас. Па хоӆна утӆам верэм ант ёрэмаӆэм. Муй аӆ щиты омасты? Утаӆсув рупатты. Хиӆэма нётӆам веӆпасты. Таӆн катра иты пунат понӆам. Ин щи вер энамты ёх ёрэматы питсэӆ, – потарӆ Леонтий Иванович. – Муң куртэвн картушка энмаӆӆув, ампат па кати тайӆув. Щиты щи пора хащаӆ. Муши воша няврэмӆув хоща яңхӆув, камтса хатӆ уӆӆув па ёхи уратты питӆув. Хошм хотн руваң, марэмаӆаюв, муң куртэвн ямшак.
Уӆтаӆ хуват яма рупат ураңн туняӆ Леонтий Иванович юбилейный медалян «90 лет ЯНАО» юкантса. Щит вантман мосаӆ кашаң хоята ӆув рупатаеӆ самаңа верты па ант ёрэматы. Щи пораян уӆапсаен туңа па кентат манты питаӆ.
