Хутхосьяң няврэм вуӆы хотат эӆты утаӆтаты ёхатсат
Хащам (щохар тыӆащн) этлийм ханты лопасн муң ашкулаята ёхтам няврэмат эӆты ханшиӆысув. Иса няврэмат ёхатсат, туп Щаня тащатн няврэмат хащиӆысат.
Ханты лопсэв этам юпина няврэмат ищипа ашкулая тусаят. Атом турам ураңна тохӆаң-хоп ант веритмаӆ Кев пеӆа яңхтыя. Сус пораян Кев ӆыпина ивеван мораӆ, питы паӆңат ты-тохи яңхӆат па нэмоӆты ант ныӆа. Ерт такан ертаӆ, щи онтасн ёханат роман эпатӆат. Туп ям турма йис, кум шитман тохӆаң-хоп пурӆыман манас няврэмат ураңан.
23 па 24 щохар тыӆащ хатӆатн хутхосьяң няврэм Овкурта ёхатсат. Тохӆаң-хоп эӆты ким этман мохты леккаратн вантсаят па ёӆӆы эсаӆсаят. Утаӆтыты нэңатан ӆаваӆсаят, па ӆухасӆаӆ ищи марэмасаят. Ин няврэмат таӆаң таӆ утаӆтаты питӆат. Таӆн аңки-ащийн ёхи каникулы сыс ёхи вуйӆыӆаят. Ат яма па ошаңа утаӆтыӆат!
