Пулңаватан, айтахаят потты тылащ олаң ӆапат соханты хатӆатан няльяң пеӆа оӆаңмет Съезда Ассоциации «Ямал – потомкам!» хоща хоятат ёхтыӆысат
Меет оӆаң ёхтам хатаӆн кущаят ияха актащисат па щос щирн нэпека ханшсат хоты рупатты па муй верты питӆат ёхтам хатӆат кеша. Меет ун вер мосмаӆ верты – щит яӆап хоят пирытыя Асоциацияя ӆоңты ураңан. Кашң район округев ӆоват эӆты ӆув хоятӆ пирытыя сараӆасӆы
Щи юпина «еңта пасан» ӆарпиӆыса, хота потарса хоты верат манӆат па верӆаят шимӆаң мир хоятат йи ун нэпекаӆоңаӆтантыты щир эӆты. Ин там унты Россия хон мувев эӆты Москва вош унты ёхатмаӆ 29 363 заявление. Щи эӆты 12 361 заявление муң Ямал мувев эӆты ханшам. Щит ям па хоӆна мосаӆ кашң хоят эӆты нэпек ханшты. Кашң шимӆаң рут мир хоята мосаӆ йи ун нэпека ӆоңаӆтантыты. Щи щир ун нётапса версат Ассоциация «Ямал – потомкам!» хоща уӆты хоятат.
– Округев ӆоватан хуӆамхосьяң филиал Ассоциации уӆ. Кашң филиалн уӆты хоятат туняӆ таӆ сус эӆты щи рупата туңмаӆты питсэӆ. Ай куртата, тащ хотата, веӆпасты паната яңхсат па нэпек ханшты нётсат. Ин па хоӆна мосаӆ яңхты, рупата ар, – ястаӆ Ассоциация ӆаңкар кущая уӆты ху Эдуард Яунгад.
Ямал мувев ӆоват аратӆ ветьяң-кем щорс шимӆаң шоши мир хоятат нэпек щирн уӆӆат. Хуӆмет шупӆ щит вуӆы хотатн па вой-хуӆ веӆпасман уӆты хоятат.
Щи хатӆ хоӆна ханты мирэв кутн яма уйтты хоятэв ун мойӆапса ишканщап нэпекан мойӆаса. Овас мув шимӆаң мир хоятат департамент куща нэ Инна Сотруева Благодарность Совет Федерации РФ эӆты Зинаида Лонгортова пеӆа ястас па мойӆас. Зинаида Викторовна уӆтаӆ хуват, рупатмал хуват ар ям нётапса ханты мирэв ураңна верас па ин хоӆна вераӆ.
Щи тумпина Эдуар Яунгад ястас ешауӆ ин уӆты законат шоши мир кеша яӆаптаӆаят. Ин хой шимӆаң мир хоят йи нэпека ӆоңаӆтантыӆат ӆув щаха вой па хуӆ веӆты ураңна нэман нэпек ханшты па акатты ант питӆат. Охотничий билет хоща нэман щимащ отметка понӆа. Па щи щир рахаӆ вой веӆты яңхты па нэмоӆты разрешение ханшты ант мосты питаӆ. Хуӆ веӆты ищиты.
Айнайн оӆаң сыс нумам вера ёхатсат. Ассоциация хоща пирыйм хоят нэпек ханшмаӆ Правление эӆты пуңӆа мантыя. Сишн кимет хоят мосаӆ. Там Съездан Иван Сандрин муң районэв эӆты Ассоциация Правление хоща пирыса. Ӆув энамты няврэмат пиӆан яма хувтэӆан рупатс. Щиты шоши мир хоятат вер па уӆапса ванан тайӆаӆы. Ин ӆув нумас тайӆ еӆӆы шоши ясңаӆа па хоятӆаӆа нётап верты.
Хащам хатаӆн шимӆаң мир хоятат емаң тахая – Ӆуңх Авта – порыӆыты яңхсат. Яма пойкащман яӆап ӆэтот каварсат, шай инщсат па порыӆысат. Ат шоши мир ясаң па уӆапса хув еӆӆы сыемийӆ!
