Тамара Александровна Пырысева уӆтаӆ хуват няврэмат утаӆтыяс, щикут хорам арат па ӆуңтарат нэпека ханшас. Ин па хоӆна, кум шитман ханшаӆ. Кашң хоятан уйтты «День Победы» нэмп ар ханты ясңа толмащсаӆӆы. Ин хоятатан ариӆа. Ляльн нох питам хатӆ кеша камтса ханшам луңтарат ӆуңтаты.
Ун ляль ус
Хув порайна ун ляль ус,
Кашан хота шук ӆув тус.
Веӆси энмам ёх няврэмат,
Щяӆта еша уна ювам икет.
Иса хотӆаӆ хайсаӆаӆ
Ляля харыя хоӆыя матсат.
Хота хоӆӆап, хота ув,
Семьяйӆаӆ си хайсат ӆув.
Ёӆан хаям хоятат,
Яӆап щиран уӆты питсат.
Имет, уна ювам икет, похат,
Хоӆ рупитты тарам усат.
Хой нэңиен сойп таӆас,
Тухаӆ нэнен ӆанки веӆас.
Маты имет хуӆвой паӆсат,
Яйӆат эвет шумах версат.
Верам отӆаӆ ляля китсат,
Сэм йиңк, шак йиңк пиӆна потсат.
Атаӆ-хатаӆ, таӆаӆ-ӆуңӆаӆ.
Ляль нох питты ешасьсат.
Охаль имем ар вой веӆмаӆ,
Матра имем ар хуӆ тувмаӆ.
Ударнека ӆын понамңан,
Тынаң нэпекна ӆын мойӆамңан.
Ма Леванты акем хоӆна,
Ар хуӆ веӆмаӆ тахайна,
Си порайна рущна потса,
Мевӆ патэӆ медальна.
Ӆув пеӆайӆ мохет вантман,
Ищи яма рупатсат,
Кашң верэӆ морта версат,
Муйкем юрӆаӆ ёхатсат.
Ма няврэмӆам опрасеӆ.
Кат пуш тэкаптамаӆ планӆаӆ.
Сит ураңан понам мевӆаӆ,
Сталин хорн медальна.
Ситы мохет рупитымеӆ.
Ӆув Победа шитаптымеӆ,
Щишан ляль нох питам хатӆэв,
Метшак уна муң ӆуңатӆэв.
Яӆпа энмам няврэмиет,
Щи Победа шукаң ус.
Ляльсам верат нумман таят,
Нынан ӆуӆан щюнь ат ус.
