Хасям ӆапатан ай тахайт потты тыӆасян мет ун онтас верам хоятат «Команда Путина» нэмпи премияйн мойӆасаят
Щимащ премия мет оӆаң-пуш мийӆыӆа. Хоятат, хой самаӆ па хоятат эӆты хошийӆ щимащ премияятан юкатсайт. Щи хоятат кутан муң ханты нэңев – Изольда Петровна Сорокина. Ӆув Касым-Нёӆ курт эӆты.
Куртаӆан хольмаң-кем хоят уӆ. Изольда Петровна каш верты хотан рупитаӆ, куртаң хоятӆаӆ иса яма уятӆаӆӆы. Ван кутн ияха уйтантыӆат, кутӆаӆан яма уӆӆат, хоя нётапса мосаӆ, нётаӆ. Изольда Петровна пенсияйн уӆты хоятат пенсияйн маӆӆы, куртаң мохиӆаӆа, хот, мув па па нэпекат ӆэсятты па китты иса нётаӆ. Хун коронавирус хонсяпса ус, кашаң хоятата ӆэтот, мосты пормасат ӆутас па тутӆыяс.
Имоӆтыйн ӆув куртаӆн ӆапка па нянь верты хот ӆап пентса. Няньӆы хоты еӆӆы уӆты? Няӆ таӆа йиӆ, хоты Изольда Сорокина кашң аӆаңсахат куртаң хоятӆаӆ кеша эпӆаң нянь шаритаӆ. Кашң хатӆ яӆап курӆ эӆты хольмаң-кем каврам нянь этаӆ.
– Округ внутренний политика эӆты ястасайм, ай-тахайт потты тыӆащ ӆапат-мет хатаӆан Пулңавта ёхатты мосаӆ. Ма нумасӆам амуя вохсайм, – ястаӆ Изольда Петровна. – Пулңавтан туп ястасайм, Ӆорвош район эӆты ар претендент уӆмаӆ. Районэв эӆты Пулңавта нэпекат китамт, сиӆта па Москва воша. Сита пирысайт, хой премияян поснтаӆа. Ма нэмоӆты воӆаң от ант верӆам, туп куртэма па хоятӆама нётӆам.
Изольда Петровна куртаң хоятӆаӆ самаңа тайты па нётты ураңан симась нэпекан юкатса. Пумащипа ӆувеӆа! Щимащ хоятат онтасна ай куртыетатн уӆапса еӆӆы манаӆ. Щимащ хоятат уятты мосӆат па ӆув итэӆан ям верат верты!
