Ай кер тыԓащ 4-5-мет хатԓатан Зинаида Викторовна Лонгортова Ԓорвош районэв хуват яԓап ԓуӈтап мира этаԓтыяс
Хащам хатԓатан ԓув Питԓора, Ԓорвоша, Мужия, Асова, Горки па Лопхапи вошата яӈхас па хоятат пиԓна уйтантыяс. Ин щи ԓуӈтап районэв ԓоватан хоятат ԓуӈатты, ванты па ёшан катԓыты веритԓат. Хоԓна ԓувеԓ хащас Овкурта па Ямкурта хоятат хоща яӈхтыя па яԓап нэпекԓаԓ туты.
Яԓпа этом двухтомник редакционно-издательской комиссия ЯНАО онтасан эсаԓман этас. Ԓорвош районэв куртат эԓты мир ԓоватан уятты ханшты хоятԓув уԓԓат. Меет яма уйтты ханшты хоятат щит Роман Прокопьевич Ругин, Прокопий Ермолаевич Салтыков, Микуль Иванович Шульгин, Сергей Макарович Кондыгин, Роман Григорьевич Кельчин па па хоятат. Па хоԓна уԓԓат хой ханшԓат ԓуӈатты нэпекат, арат, монщат. Нэпека ԓоӈаԓтам потрат ханшам хоятат рутԓаԓ уйтантопсая ёхтыԓысат, книгаятан мойԓаптасайт.
– Ԓорвош район эԓты хольмаӈ моԓтас хоят там нэпек этты ураӈан ԓуӈтар, монщ па потар шупат китсат. Хойтэт ханты ясаӈан, па ханты номасан ханшты хошԓат. Тамащ нэпек нэмоԓты порайн ант эсԓыса, миран ант па вантыԓыса. Щишан, там кат нэпекан, аратаԓ ханты мир ураӈан ханшам потрат щий ԓоӈаԓман уԓԓат. Ма нумастэман, ай муй ун хоят, ԓувеԓа мосты потар иса щита уятты верытаԓ, – каматса ясаӈ ястас Зинаида Викторовна.
Яԓпа этам нэпекан анта туп мир хуват уятты ханты хоятԓув ханшам отԓаԓ понман уԓԓат. Хуԓ па вой веԓпасԓаты, вуԓы шавиты, ай куртатан уԓты монщаӈ хоятат па айԓат ёх потарԓаԓ ищи тохи понман уԓԓат. Там нэпек ԓуӈатты порайн, энамты няврэмат уятты питԓат, хой хоятат усат па ин там хатԓатан уԓԓат, ханшԓат па монщԓат.
Щи ԓуӈтапсайт похла акатты ураӈна Зинаида Викторовна шеек ун рупата верас. Хоятатн ханшам, вером па монщам потарԓаԓ ԓуӈатты щира яма ԓэщатсаԓԓы. Щи еԓпи, нэмоԓты порайн ханты мирэв щимащ ун нэпек ант таиԓыйс. Тамиты похла акатман мохты ныԓа, муй арат нопсаӈа, тусаӈа ханшты па потарты хоят ханты мирэв тайԓ. Тамащ хоятат онтасан ханты мир ясӈев ант хурԓаԓ па хув уԓты питаԓ!
