Ун емаӈ хатԓ Ханты-Мужи куртан ԓарпиԓыса
Таԓаӈ кат хатԓ, нийԓмет па яртьяӈмет айкер тыԓащ хатԓатн вуԓэӈ ёх па мояӈ ёх ияха уйтантысат, кассат па каш версат. Оԓаӈ хатаԓн аԓаӈ эԓты ёх хоятат касты ԓойԓысат: Мужи вош ёханан ԓув ԓохна хухаԓсат, ухаԓ щоппи наварсат, хуԓампуш хой хувашк наварса па юх катна таԓман юращсат. Оԓаӈ хатаԓ щит мир ԓоватан уԓты нэӈат емаӈ хатԓ вус, сишн щи хатаԓн туп ёх хоятат юращсат. Нэӈат па сютчасат, каш версат.
– Там хатԓ емаӈ хатԓ, вуԓы шавиты ханты ёх касты хатԓ, щаԓта па щиты питас, тамхатԓ нэӈат емаӈ хатԓ – 8 марта, – оԓаӈмет тащ бригадир МСП «Мужевское» Виталий Озелов мойԓапса ясаӈ ястас. – Щаԓта щи ураӈна ма учиԓам ястаты – яма па тумтака ат уԓԓат, яма ат касԓат па каш верԓат!
Кимет хатаԓн Ханты-Мужи курта ар хоят ар-сыр тахаят эԓты таԓасты питсат. Хой муйн веритас щитан ёхтас, хой ԓув машнаятԓаԓн – щи кеша ун машнаят ԓойԓтыты хар ԓэщатам, хой автобусан – нэман мояӈ хоятат кеша Мужи вош эԓты кашӈ щос-шуп ты-тохи яӈхас, хой ԓонщхопан ёхатсат, хой ԓув курԓаԓн па вуԓэӈ ёх ԓув вуԓэӈ ухаԓԓаԓн.
Щи хатаԓ ищкишак уԓмаԓ. Аԓ рущ сохн мохты аԓ ԓойман потԓайн. Вуԓэӈ ёх па ястаԓат – меет ям: шеек ищки антом па шеек мелак ищи атом – вай морԓа. Сишн касты па гуляйтты ураӈна меет ям хатаԓ. Ёхтам мояӈ хоятат хой потты питсаят, веритсат вуԓы хотата ԓоӈтыты па хошмаԓтыты. Щи тумпина щита хоятат яԓап эпԓаг кавартам вуԓы нёхайна ԓапатсаят, каврам хошйиӈкна па каврам шайна инщԓтасаят. Щи кеша каш верты харн таԓаӈ хольмаӈ пеԓа йи вуԓы хот ԓонщам.
Емаӈ хатԓ пуншса ун онас манты юпина: Ханты-Мужи каԓнаӈ эԓты пан папелка, хота каш верты лот ԓэщатам, нох этсат шушман ун пелка питам, вуԓы тащ хотатн ар таԓ рупитам имет-икет, ԓув юпаԓн вуԓэӈ ухԓат ваттаман шушсат тащ хотатн рупатты ёх. Ун концертный сцена эԓты кашӈ шушты хоят эԓты потарса. Щи юпина Ԓорвош район куща ху мойԓапса ясаӈ ястас па емаӈ хатԓ еԓԓы ԓарыты питас. Каш верты ёх ариты па якты питсат, вуԓэӈ ёх па касапсаята ԓэщатыты питсат. Мояӈ ёх па рутԓаԓ аматман ԓув пеԓаеԓ увты па нётты питсат. Щаԓта касапса щи питас!
Тэԓыя ԓутасты па тынасты харт ԓарпитамт, муй ԓытԓаян иса рахаԓ ԓутты, туп ох щепан тая. Щи тумпина камн ун путан вуԓы нёха эԓты шарку кавартам па сорт хуԓ эԓты хошьйиӈк. Шарку путаԓ катсот моԓтас литрая хояԓ. Кашӈ хоят хой вана ёхтыԓыяс иса ԓапатсаят па шеек ун самовар эԓты каврам шайн инщԓтасаят.
Хотаӈ нэӈат кутан «Хозяйка чума» нэмпи касапса верам. Мет тус хотаӈ нэ уԓмаԓ Любовь Русмиленко. Энамты па ай няврэмат кеша ищи ар ёнтапса ԓэщатом. Айшак няврэмат кеша таԓаӈ кат утча вуԓы-хот ԓонщам. Щита вуԓэӈ ёх яврэмат шависаят, ԓапатсаят па ԓув урӈаԓн каш верса.
Щиты таԓаӈ кат хатԓ емаӈ хатԓ поснтаса. Па етна пелка мойԓапсаят мойԓаты питсаят вуԓэӈ ёхата хой касапсаятн нох питсат.
Меет тынаӈ мойԓапсаят – хуԓам ԓонщ-хоп – шитсат:
– Ёх кутан вуԓэӈ ухаԓ навраԓтыман – Юрий Артанзеев;
– Нэӈат кутан вуԓэӈ ухаԓн – Юлия Лонгортова;
– Юращман – Эдуард Лонгортов.
Этнобиатлонан меет сорашк уԓмеԓ: Константин Талигин, Максим Талигин, Вячеслав па Эдуард Лонгортовӈан. Семьяят кутан касман меет каркамшакат вусат – Станислав Лонгортов семьяяԓ.
Хуԓампуш хой хувашк навармиман нох питсат – Алексей Пугурчин па Эдуард Лонгортов.
Юх катна таԓман юращман ур ики Иван Пырирко нох питмаԓ.
Ухаԓ шоппи наварман па ур ики оԓӈа питмаԓ – Давыд Окотэтто.
Тынщаӈ меет яма ёваԓмамаԓ – Вячеслав Лонгортов.
Ԓохн хухаԓман оԓаӈ местаят тамиты питсат: нэӈат кутан 40 таԓ унты – Юлия Максарова, 40 таԓ эԓты па уншакт – Марина Максарова.
Ёх кутан 40 таԓ унты – Давыд Окотэтто, 40 таԓ эԓты па уншакт эԓты – нох питас Станислав Лонгортов.
Щиты пора сора хащас. Хоятат рутԓаԓ па ԓухасԓаԓ пиԓан ияха уйтантысат, мойԓыты яӈхиԓысат. Ин па там иты кимет таԓн ияха уйтантыԓув. Вуԓэӈ ёх ат самаӈа тайты верэԓ еԓԓы туԓэԓ, вуԓы тащԓаԓ яма шавиԓԓаԓ па уна энмаԓтыԓԓаԓ!
