Вуԓэӈ ёх емаӈ хатаԓн кашӈ хотан щимащ нэ вуԓмаԓ па мояӈ хоятат ԓапатмаԓ па хошмаԓтмаԓ
Емаӈ хатаԓн хус моԓтас вуԓы-хот ԓонщман вус. Сишн организаторат нэман касапса ԓэщатсат па пирысат хой меет каркамшак, ошаӈшак па тус ёшаӈ нэ. Щи касапса нэмԓ «Хозяйка чума» айԓты питса.
Касапсайн жюри вантсат хоты вуԓыхот верман уԓ: хоты улат ԓонщман уԓԓат, муйн лаӈкман уԓԓат, муй щиран хот ԓыпи ԓэщатман уԓ, хоты мосты пормасат понман па муй тахаян уԓԓат, муй арат хот сыстам, хорам па хошам. Вантсат муй хорпи ёшан верам па ёнтам пормасат хот ԓыпийн уԓԓат па пирысайт меет тус отат. Щаԓта щи юпина ԓэты пасанат ванты питсаят: муй хорпи ԓэтот кавартман уԓ, муйн мояӈ хоятат нэӈат ԓапатԓат. Мет юухат па камн ун концертный сцена эԓты кашӈ нэ ԓув эԓтэԓ па ԓув хоттэԓ хоятԓаԓ эԓты потар тус: маты рут эԓты па хоԓща ԓув ёхатсат па уԓԓат, муй арат няврэм тайԓат, хой хота рупитаԓ па утаԓтыйԓ. Щи юпина па хой муй веритас арияс, монщ монщас па якас. Аратԓ вет номинация ԓэщатом.
Аратԓ яртьяӈ тус ёшаӈ нэ ԓонщам хотԓаԓ па ԓувиԓаԓ этаԓтысԓаԓ. Вет номинацияят кутан нох питас Любовь Владимировна Русмиленко.
– Ма оԓаӈ пуш тамащ касапсаян кассам. Ма пиԓэман похԓам, яем, менем, апщиԓам, яха арыты эвиԓам па усат. Мет такан нётты хоятэм Игорь Ильич, ма ийкем. Хот пормасԓаман Горка вош эԓты тусԓаман, манты юшеман 80 километра хуват. Емаӈ хатԓ верты хоятат карты ԓэрат таԓсат па ԓонщам вуԓы хотатан нови тут ԓэщатсат, кур аԓты юх тусат, – потарԓ Любовь Русмиленко. – Творческой номера ай хиԓыем ишканщап ар арысам. Сценая вохмем порайн, хоттэԓ мохиԓам пиԓан хоԓыена яха этԓысув.
