Утща унт суԓаман, утща йиӈк суԓаман имеӈан-икеӈан устан. Йи пох тайсатан. Похан энмаԓман хуват энмаԓсаԓан. Каман ёнтты ԓовата йис. Товия йиԓ, ащеԓ ики кашӈ хатԓ каман пун сэваԓ. Таԓа йиԓ, вой веԓаԓ, хуԓ веԓаԓ. Похаԓ ԓув вой веԓты ԓоватаԓа, ԓув хуԓ веԓты ԓоватаԓа йиԓ. Ащеԓ пиԓн вой веԓты, хуԓ веԓты яӈхты питас. Похан уна йис.

Имоԓтыйн ащеԓ ястаԓ:

– Похие, тамиты утща муй щирн уԓԓан, мин, – ястаԓ, – уна йисман, наӈен, – ястаԓ, – хоԓща, воша яӈхԓув па, хоятан каншԓэв.

Похаԓ ястаԓ:

– Манэм нын каншты хоятан ант мосаԓ, – ястаԓ, – матты иԓмаԓ хащам хоят мосаӈ па ма хощаем ёхатаԓ. Ещаԓт хоты ант манԓам. Щи кеман аӈкеԓ ими ястыйԓ:

– Иԓмаԓ хащам хоят наӈ ещаԓтэн хун йиԓ, – ястаԓ, – ху хоят, антпаԓ ярам хоят, ԓув ещаԓт манаԓ.

– Анта, – ястаԓ, – ма ант манԓам.

Аӈкеԓ ястаԓ:

– Тащен хота уԓ, ёхи каншиԓые-са, минэман ухаԓ кира, мин воша яӈхԓаман.

– Нын манэм хоят аԓ каншатан, ма, хун номпсэм ёхатаԓ, щи порайн хоят туԓам.

Я, щи, аӈкеԓ-ащеԓ воша мантсатан.

Ԓув па ащеԓан партса:

– Ма ёхаттэм унты, щи щарԓан иса нёхрыяԓан, ёхатԓаман па, пун сэвԓаман.

Я, щи, щиӈанща, щёл нёхарман омасаԓ, ащеԓан ԓэратан хайм, ԓэрԓаԓ ушийс. Щиӈанща, ԓэс, муй верас. Имоԓтыйн оԓмаԓ щикем йиԓа. Ёхи ԓоӈас па, япсыя иԓ оԓтыя вутщийс. Иԓ оԓты еԓпийн, нумасаԓ: «Ма ким яӈхԓам». Ким этас, муԓ хот щуӈ пеԓа аӈкармас па: «Я, моԓхатԓ щита хот ант тайсув, амуй хотые?» Воԓԓы щулпиԓаԓ, аԓ хомпалмаԓ. Муй хот? Щиӈанща, ԓув щираԓан, тохеԓ унт пеԓа яӈхас. Ёхтас, щуӈ пеԓа аӈкармас па, щи хорпи нэ ԓойԓ. Ин щи нэӈаԓ ястаԓ:

– Номпсэн ки уԓ, ма хощаем ёхи ԓоӈа. Ԓэԓман-йинщԓаман па тата омасԓаман. Ма, – ястаԓ, – кашен ки уԓ, номпсэн ки уԓ, наӈ хощаен хоята щи ёхатсам.

Ин пох нумасыйԓ: «Мунты щи аӈкем ястаԓ, иԓмаԓ хащам хоят ма хощаем хун ёхатаԓ, ант ёхатаԓ. Таӈха иԓмаԓ хащам хоят ма хощаем щи ёхтас». Ёхи ԓоӈԓатан. Ай хотые. Ԓыпеԓ воԓԓы аԓ хомпалмияԓ, щумпалмияԓ.

– Наӈ, – ястаԓ, – аӈкен-ащен щаха ёхатԓатан па, ма тата уԓтэм аԓ яста. Наӈ номпсэн ёхатаԓ ки, иса ияха уԓты питԓаман.

Ԓув ястаԓ:

– Ма хоты муя номпсэм ант ёхатаԓ, наӈ ки номпсэн питаԓ. Наӈ мосаӈ ма хорпем ханты хоща уԓты ант ԓытԓан.

– Ма ант ки ԓытсам, наӈ хощаен хун ԓуԓан ёхатсам. Аӈкеԓ-ащеԓ вошн хуԓам хатԓ яӈхԓаан. Щи сыс эԓты щи хотанан яха уԓԓатан.

– Щаха, – нэӈаԓ ястаԓ, – аӈкен-ащен ёхатԓатан па, там хотэн тата ант питаԓ. Ма сэм сайн уԓты питԓам. Аӈкеӈаԓан иԓ оԓты юпийн, ким этԓан па, хотэм кащаԓаԓэн, – ястыйԓ, – наӈ тохи, ма хощаем ёхта, аԓаӈсахат, най этты еԓпийн, ёхи манԓан.

Щи ин аӈкеӈаԓаԓ ёхатԓатан. Етан, аӈкеԓ-ащеԓ иԓ оԓԓатан, похан ким этаԓ, муԓ хот щуӈ пеԓа вантыйԓ. Яна, хотаԓ омасаԓ. Тохи манаԓ, имеԓ хоща. Аԓаӈсахат, хун таӈха хутԓаԓ, нох киԓтаԓа:

– Я, ёхи мана, аӈкеӈаԓан хоща. Щи, ин ху ёхи манаԓ.

– Ма, – ястаԓ, – хатԓ уԓԓам, щаха ёхатԓам.

Хатԓ уԓ. Ким этԓыйԓ, нэмоԓты хот ант ныԓа, аӈкеӈаԓаԓ нэмоԓты ант уятԓатан.

– Щаха, – нэӈаԓ ястаԓ, – мин хув уԓԓаман, ван уԓԓаман, похан ёхатԓайман. Похен, – ястаԓ, – муԓ хот щуӈан, камаԓта нох тахарԓэм па, щита ԓойты питаԓ. Хун хоԓԓыты питаԓ, наӈ нёхаԓты. Щиты яста: «Апи кеԓэм, турщ-турщ, онтап кеԓэм, турщ-турщ». Па щирн ки ястаԓан, похен па ант вантԓэн.

Хув устан, муй ван щиты устан, хой уятаԓ. Щиӈанща, имоԓтыйн, ким этас па, муԓ хот щуӈан нуман, щи хорпи онтапаӈ няврэм нох ярам па, онтапаԓ муйԓ иса аԓ щулпийԓ. Йи курнат кеԓаԓа тохи щакаԓ, няврэмаԓ нёхаԓтыя: «Апи кеԓэм, турщ-турщ, онтап кеԓэм, турщ-турщ. Аӈкен ма пеԓаем моԓхатаԓ щиты ястас».

Ин похиеԓ, щиӈанща, щи вояпса. Похан щиты энмаԓсаԓԓан. Аӈкеӈаԓԓаԓ, щиӈанща, воԓԓы пирщематы питсатан.

– Похие, – ястаԓтан, – мин воԓԓы шанш юрԓы, мевԓ юрԓы питсаман. – Па нын щёмԓы питсатан, хойн парԓайтан, опсатан ёԓан. Ма унта манԓам – унт воем веԓԓэм, йиӈка манԓам – йиӈк хуԓэм туԓэм.

Самԓан хун вохԓайтан, эԓԓан хун потԓайтан, ԓэтотан тэԓые туԓайтан.

Я, щи, щиӈанща. Имоԓтыйн, таӈха, нумасыйԓ: «Амоԓты щирн, моԓхатаԓ уԓтэман, ким этԓам – хотэм щита уԓ, хоятэм ус. Ин па хоятэм ахоԓта манас? Няврэмем хоты, нуман ԓойты кеԓаԓан щи ԓойԓ». Па щи ин нёхаԓԓаԓԓы. «Муй хоԓԓаԓан? – няврэмаԓ инщасԓаԓԓы. – Наӈ ханты ху вур сэм эԓты тыйм хоят. Ма наӈен хоԓта унты нёхаԓԓэм, аӈкен па ахоԓта манас? Аӈкен век антом».

Щи эԓты, ин, нэӈаԓ аӈкеԓан моштаԓа – эвеԓ ханты ху эԓты похан ёхтам. Аӈкеԓ паканаԓ, щаԓта эви катԓапԓа па ёхи туԓа. Ёԓан кат эви па тайԓ.

– Щаха, – ястаԓ, – опиен аԓаӈсахат нох киԓаԓ, па охаԓ куншты питаԓ. Тута, муԓ таха ԓаращ шанш пелакан, куншап оԓаԓ. Опиян куншап вуты аԓ эсԓаԓан, нын куншпан ԓувеԓ мияԓан.

Я, щи, аԓаӈсахата йиԓ.

– Ма, – аӈкеԓ ястаԓ, – эвем курт тэԓ, похем курт тэԓ ԓарыттыя па щи манԓам, нын ёԓан уԓаты.

Ин, щиӈанща, эвеԓ нох киԓаԓ, охаԓ куншты питаԓ, апщеӈаԓаԓ пеԓа ястаԓ:

– Тута, муԓ таха ԓаращ оԓаӈан куншпем ты туваԓан, ма охем куншԓэм.

– Моԓхатаԓ хоты, наӈен куншапан мин хун мийԓыԓэман, мана па, наӈ вуи.

– Я, ма мунты аӈкеман муԓ тахая манты ант эсаԓсайм, ма муя манԓам.

Иԓ омасаԓ па щи хоԓԓаԓ, щи хоԓԓаԓ.

Хуйԓ каман ԓэр ушиман омасаԓ: «Там, амуй соԓаӈ йиӈкат ёш патэма, ёш ԓоӈԓэма ракныԓыԓат». Щи эпсантыԓԓы: «Там хоты ма вур сэмием, ма нэ нёхи самием щи хоԓԓатаԓ. Ахота уԓ па хоԓԓаԓ? Сэм йиӈкԓаԓ тый рыйԓат».

Еԓԓы па ул, кимет лопасн ԓуӈтаԓн.