Тамащ нэм тайты литературной уйтантопса тата мосванан, ай кер тыӆащ 17-мет хатаӆн, Ёмвошн верыӆыса
Югра мув физико-математической лицей-интернат хотн ханты моньщат ханшты хоятэв Владимир Егорович Енов иса 10-мет классатн утаӆтаты похат муй эвет пиӆн хорасаңа ӆэщатас.
Киникайт ханшты хатнэху сыр-сыр айкеӆат ай ёхӆава потартас, муй щирн па хоты йис потрат, моньщат па ӆуңтарат пиӆн рупиттыя питас, муй хорасоп йис ёхат-нэңат кутн айтэӆн ус па энмас, муй щирн меңкат, йиңк кулят, ӆон верты имет, мишъёхат па най-уртат аӆ хоятат пуңаӆн усат па уӆопса щирӆаӆ версат. Щаӆта муйсыр сэмсай отат хантэт торастасат па яма уӆтыя щирн ант па масат, муй щирн най-уртат па мишъёхат муй мишнэңат хантыӆава нётсат.
Щи вер юпийн Владимир Енов ияха актащом ай ёх еӆпийн мет оӆаң кутатн ханты ясаңан ӆув ханшом ӆуңтарӆаӆ ӆуңтас. Юхат па щи отӆаӆ ищиты щи рущ ясаңан ямсыева ӆыеӆа ӆуңатсаӆы. Щимащ хорамаң, кат ясаң онтасн верум, литературной уйтантопса шеңк умща там рущ няврэматн оша паитса.
Ёхи хащом порайн Владимир Енов нюхмас, хоты «Ма рут мувем – ма уӆопса хорасэм» нэмпи уйтантопса шенк арсыр вер тамхатӆ уӆты-хоӆты щираӆа тус.
Ӆув, ванта, ар таӆ сыс па муватн муй па мир ёх кутатн ус па рупитас, рут ёхат ясаң муй ханты хоятат иса ант па вантыӆыйс. Тамхатӆ туп щи верат ураңан ӆув рут ясңаӆ, овас ёхӆаӆ уӆты-хоӆты хорасӆаӆ шеңк самаңа тайтыя питас.
Хун па яӆпа ханты ясаң потропса Ёмвош мувн палңаӆаӆ вуша ёхтас, щиты ӆув йис моньщат ханшты питас, мата отат номасн хоӆна ай пора эӆты хащсат.
