Щимащ нэмпи нётап туняӆ эӆты Ямал мувев ӆоватан мойӆаӆа вуӆэң ёх энамты семьяята
Ямал мувевн уӆты ёхата арсыр нётап верӆа. Щиты, туняӆ губернатор ЯНАО Дмитрий Андреевич Артюхов ястас – мосаӆ нёттыя энамты хоятата хой семьяян хуӆмет няврэм сэма питаӆ. Няӆмет, ветмет па, па еӆӆы сэма питам няврэм ураңан ищи щимащ нётап митаӆыӆа. Тащ хотатн яңхты семьяята щит мосты пормасат.
Туняӆ таӆ эӆты округев ӆоватан сот-кем арат семья щимащ нётапн мойӆасаят. Тампуш па муңӅорвош районэвн ищи щимащ мосты пормасат мойӆасаят. Чумовой капитал – щит таӆаң хот-тэӆ: няӆъяң-кем ул, кат нюки, кат тащ ёнтам парщин, хотхар сохӆат, карты кур турпайӆаӆ пиӆан па кат ватухаӆ.
– Оӆаңн, яӆпа этам семья аңкиӆаӆ-ащиӆаӆ пиӆна уӆӆат-касӆиӆат. Хоӆща ӆув роман пормас вуӆат хот ӆощты ураңна? – потарӆ депутат Эдуард Хабэчевич Яунгад. – Ма нумастэмн, тамщ нётап шеек мосаӆ энамты хоятата, хой нумасӆ еӆӆы вуӆы тащ пиӆан рупатты.
Тампуш яӆап таӆн кат семья нэпек ханшсат чумовой капитал ураңна. Щи юпиян ворңа хатӆ леп хоӆна йи семья заявление ханшас. Ӆув тови сыс Кев уншсат, па айкеӆан ёхатсаят – Мужи вошан ӆаваӆӆаят хот-тэӆ ёша-кура мойӆаты ураңна. Ӆуң-сыс тащ хотатн рупата ар, ивевн тащ шавиты мосаӆ. Сишн туп кат семья кум шитсатан ёхаттыя. Щит Максароват па Серасховат. Ӆув иса «Горковский» сельхозпредприятие хоща рупатӆат. Хуӆмет семья ищи щита рупатӆат.
Виталий па Кристина Серасховат хуӆам няврэм энмаӆӆат. Леонид па Юлия Максароват семья хоща няӆмет няврэм сэма питас. Ӆув айтэӆн вуӆы хотатн энамсат. Сишн опращӆаӆ вер еӆӆы туӆат.
– Муң семьяем пиӆн ихосьяң таӆ Кев тум пелка касӆыӆув. Щит муңева шеек ун нётап. Ӆуңсыс муң кентат касӆыӆув. Таӆн щит яӆап хот ӆонщӆув. Яма нюкиян лакӆэв, хошам питаӆ, – потарӆ Леонид Максаров. – Катра нэмоӆты щимащ нётап антом вус. Там йис еша уӆапсаев кеншак. Маӆаюв-ки муя ант вуты.
Хуӆмет семья щит Иван па Кристина Серасховат. Кат Кристина йи опращнэм тайӆатан. Итӆ – Владимировна, киметӆ па – Никитична. Кристина Никитинчна ийкеӆ, Иван Евгеньевич пиӆн ёхатты кум ант шитсатан. Тащ шавиты ищи мосаӆ. Ӆын таӆн, Кев уншты юпиян ты ёхатӆатан.
Няӆмет семьяян ищи ай няврэм сэма питмаӆ – щит Николай па Елена Максаровңан. Ӆын ищи «Горковский» сельхозпредприятие хоща рупатӆаңан. Ӆув ищи нэпек ханшӆатан па чумовой капиталан маӆаят.
Тамщ ям айкеӆатн, нумасӆув, хоӆна энамты ёх еӆӆы вуӆы тащат энмаӆты питӆат па тумтака еӆӆы касӆыты питӆат!
