Тампуш Ӆорвош районэв ӆоватн меет олаңн Аканьӆэвм нэмпи тахаян веӆпасты ёх ияха ёхтыӆысат, щи юпина Горки воша па яңхсат
Ям найяң хатаӆн, уйтӆор 6-мет хатаӆн, нуманшак ӆойты Аканьӆэвман, аӆансахат эӆты хорам арат сый щащты питас. Иӆаншак уӆты Аканьӆэвм эӆты мояң хоятат йиӆат, щаӆта Асов эӆты веӆпасты ёх ёхатсат. Овкурт па Ямкурт эӆты ищи мояң хоятат рутӆаӆ пиӆна уйтантыты сора кеша ёхтыӆысат. Хуӆ веӆты ёха каш верӆа. Ӆув щи хатаӆн тови эӆты веӆщи сютчаты кум мощатсат.
Мужи вош эӆты каш верты, ариты па якты ёх ёхатсат. Ӆорвош район куща ху ищи ёхтас: «Муң районэвн хув тэӆн хуӆ веӆман хоятат уӆӆат. Ям щи энамты ёх щи вер еӆӆы туӆат! Шек умащ ватты ай нявремиет пеӆа, хой опращӆаӆа нётӆат!»
Емаң хатӆ кеша хоятат хорамаңа ӆуматӆыӆат. Нэңт щи кеша нэман ёнтасӆат. Яӆпа ёнтам ернасӆаӆ нох ӆуматӆыӆаӆ. Ай эвиет ищи ернасӆаӆ ӆуматмеӆ па хорам саклакат нох понмеӆ.
– Кум шитман ма ёнтасӆам, иса хун хуӆ веӆӆам. Еӆн рупата ар. Няврэмӆам нётӆат. Емаң хатӆэв кеша нэман сяшкан ӆутыӆысам: манэма, ийкема па няврэмӆама яӆап ернас ёнтсам, – ястаӆ Татьяна Рохтымова.
Ёх хоятат аӆаңсахат яңхсат хоӆапӆаӆ сора валэмасат па мощатам хуӆаӆ лашкупа тусӆаӆ. Ямшак па уншак хуӆ емаң хатӆ кеша пуңӆа понтсат нярхуӆа ӆэты ураңна. Хошьйиңки пут каварты ищи мосаӆ, па эпӆаң хуӆ сопасӆысат.
Хуӆ каварты эӆты нэңат ун пасанат омассат. Щикут куща ёх эӆты ишканщап мойӆапса нэпекатн хуӆ веӆпасты ёх мойӆасаят. Эмма Юрьевна Еприна па Илья Афанасьевич Нензелов Благодарность Районной Думы эӆты масайтан. Щиты Вячеслав Прокопьевич Лонгортов катпуш хойӆыса сельзозпредприятие «Мужевское» эӆты.
– Ма опращӆам ищи хуӆ веӆман рупатсат. Сишн щи юш ма еӆӆы туӆэм. Хус моӆтас таӆ щиты рупатӆам. Няврэмӆам иса хошӆат, иса нётӆат. Мойӆапсаятн мойӆасаюв, – ям нумасн ястаӆ Вячеслав Лонгортов. – Муң иса рупатман уӆӆув па тамщ емаң хатаӆн воӆӆы каш, рутӆув, ӆухасӆув пиӆн уйтантыӆув, потремиӆув. Па щи, хоӆапӆув ванты мосӆат. Рув кутн хуӆ сора шакаӆ.
Хуӆ веӆты ёха каш верты ураңна мояң хоятат ёхатсат Пулңават эӆты. Валентин Вальгамов кашң ханты хоятан уятӆа. Веӆпасты ёх ӆув хорам арӆаӆ самаңа хуӆантсат па такан ёшпат сэңксат.
Ун хоятат па нярэмат кеша касапсаят ӆэщатсаят. Кашаң хоят веритас щи тахаян ӆув юрӆ поныӆытыя.
– Ма Ӆорвош район мува веӆщи ёхатсам. Нэмоӆты пораян тата ант уӆӆисам. Щикем хорам мув, умащ вантыя. Ям, вещкат хоятат тата уӆӆат па рупатӆат, няхман уща верӆат па потремиӆат, – умащӆыман потарӆ Галина Яковлевна Косыгина. Ӆув помощника депутат Законодательного Собрания ЯНАО Эдуарда Яунгад рупатаӆ. – Ма тата жюри хоща понтсаям, умащӆыман вантсам хоты нэңат хуӆ туса ӆэщатсат. Кашң нэ хуӆам хуӆ ӆэщатас. Щит шумах, айсоӆ па шартты хуӆ. Кашң нэ хорам па тус ёшаң. Жюри пилн йи номас понтсув па щи щирн нох питас Ольга Лонгортова.
Галина Яковлевна Ассоциация «Ямал-потомкам!» па депутат Эдуард Яунгад эӆты мойӆапса ясаң китас. Ястас ат яма уӆӆат па хуӆ веӆӆат. Ольга Лонгортова па ӆув семьяяӆа ун шай аны тэӆ ӆаращ мойӆас, ат ӆув няврэмӆаӆ пиӆн ияха йи пасан сурыйн шай инщӆат.
Председатель Законодательного Собрания ЯНАО Сергей Миронович Ямкин па ёхтыӆыяс хуӆ веӆты ёх пиӆан уйтантыты. Таӆтэӆн ӆув ищи ант ёхтас. Мойӆапса ясаң ястас па мосты пормас – набор инструментов – мойӆас Ольга Филипповна па Константин Сергеевич Лонгортовңан семьяя.
Хуӆ веӆты ёх кутан мойӆапсаян хойса Максим Петрович Тогачев. Ӆув веӆпасты ёх кутан меет ун. Ӆув инты унты ай пора эӆты хуӆ веӆман рупатаӆ. Иса Ишвар нэмпи куртыеӆа ёхтыӆыяӆ. Ӆув ясңаӆ щирн – хуӆ веӆты вер щит ма уӆапсаем, па кимет вер верты ант хошӆам.
Щи тумпина кашң веӆпасты семьяя яӆап тутсунат, рущ щирн-ки ястаты – светильникат, митаӆысаят Ӆорвош район управление по вопросам сельского хозяйства и делам народов Севера эӆты. Яӆап рюкзакатан ищи мойӆасаят.
Камтса хатӆ хащамн, кимет тахаян па веӆпасты ёх кеша ун каш верты хар ӆарпиӆыса. Щит Горки нэмпи вош. Щи пеӆа меет ар хуӆ веӆты ёх ханшман уӆӆат. Щи пеӆа Горковский рыбозавод Азовский, Лопхаринский, Шурышкарский рыбоучастокат уӆӆат. Суббота хатаӆн Горки вошан ар мояң хоятат вусат. Туп хуӆ веӆты ёх воӆӆы шимаӆ уӆмаӆ. Щи руваң хатаӆн хуӆы веӆты ёх ӆув местайӆаӆн вусат, рупатайӆаӆ ант хайсыӆаӆ.
Хошам хатаӆн хуӆ сора атма йиӆ, сишн ӆувеӆ сора мосаӆ хоӆап эӆты потам хота туты. Ищипа камтса хоят нох этӆысат, ӆув мойӆапса нэпекатан мойӆасаят. Щи хоятат эӆты Николай Русмиленко. Ӆув почётной грамотой губернатора ЯНАО маса. Кашң таӆ ӆув план щирн хуӆ маӆ. Айтэӆн утӆас хуӆ веӆман рупатты.
– Похем пиӆна веӆмасӆаман. Ӆув ищи Горковский рыбозаводан рупатӆ. Шек ям хун кущайӆувн вантман тайӆаюв, ант ёрэмаӆаюв. Губернатор эӆты грамота щит шеек ям, – ястаӆ Николай Русмиленко.
Хуӆ веӆты вер кашң семьяйна уйтӆа. Хуӆн муң уӆӆув. Сишн, турам поякӆув, Асэвн, ёханэвн хуӆ ат иса уӆ па энмаӆ па уӆапсаев еӆӆы манаӆ!
