Щохар тыӆащ оӆаң ӆапатн Кев тум пелак эӆты ёхтам шоши хоятӆув пиӆан уйтантысув

Кашң сус вуӆы тащ хотатн рупат­ты ёх кум шитӆат вошата ёхтыӆы­ты. Аӆ шиты хун, вер сахат яңхӆат. Сусн няврэмат ашкулая акатты пора. Хой ротая ияха акатӆаят па тохӆаң хопан туӆаят. Хой карты юш пеӆа ва­наншак уӆ па ӆув сахатӆ няврэмӆаӆ туӆӆаӆ. Щиты ма Мужи вошн уйтан­тысам имеңан икеңан пиӆан. Щит Мак­саровңан Олег па Марина. Ӆын эвиеӆ ашкуӆая тусӆан. Эвиеӆ Васьёханов аш­кула-интернатан утаӆтаӆ.

Олег Вениаминович утан сэма питас ванхатӆап тыӆащ 9-мет хатӆ 1979 таӆн. Сэма питам лотаӆ «рат юх сойма» ай­ӆӆа. Сэма питам нэпекаӆн ханшӆа – Питӆор.

– Питӆор вош ашкуӆаян щи утаӆты­сам, щаӆта Пулңават санаторно-лесная ашкулая китылысаям. Щита хутмет класс унты утаӆтысам па ёхи воӆысам, антема-ащема нёттыя мосас. Ванты, ма семьяевн меет ун. Хоӆна хуӆам апщи тайӆам: Денис, Степан па Маина, – по­тарӆ Олег Максаров. – Каӆаң тащ ша­виты, ат ӆаваӆты яңхты питсам, оӆңа аӆ щиты нётсам, ащем юкана. Щаӆта 1995 таӆ сусн рупатая учеником-пасту­ха ханшӆтасаям.

Еӆӆы энамты хоята мосас соӆтана манты. Щиты Олег 1998 таӆн соӆта­на вуса, Нальчик нэмпи вош Кабарди­но-Балкарский республикая питас. Кат таӆ ӆув соӆтана яңхас, 2000 таӆн ёхӆы ёхтас. Соӆтан эӆты ёхты юпина мохты ёхӆы рупатая ӆоңас, уже аӆ пастуха нэпека ханшӆтаса. Щи пора эӆты инты унты ӆув каӆаң тащ энмаӆман рупатаӆ. Ин ӆув сельскохозяйственное предприя­тие Горковское 4-мет бригадаян брига­дира рупатаӆ.

Хун соӆтана утаӆтыты китыӆыямн ӆув ляльсты лота па тутӆыйм. Щи по­рана Чечня нэмпи мувн ляль уӆмаӆ. Ар соӆтан Россия хон мувев эӆты тохи китыӆысаят. Олег Вениаминович щита тыӆащ еша антомшак ляльсмаӆ. Меда­лятан юкантам: «За службу на Северном Кавказе» па «Ветеран боевых действий».

– Иймем пиӆна муң Мужи вошн уйтатсув. Щи порана 2003 таӆ, тови. День оленевода район ӆоватан гуляй­тса, сишн ар мойяң хоят щита ёхат­сат. Щаӆта Овкурта яңхсув, ӆув рутӆаӆ пиӆн уйтатсам па веӆщи Питӆора мат­саман. Щиӆта па каӆаң хота касаӆ­сув. Тампуш хус таӆа йис хоты ты-тохи каӆаңат пиӆан касаӆӆув, – няхияӆыяӆ Олег Максаров.

Щиты сора кеша ӆув ёхтыӆысат па ёхӆы тэрмаӆаӆат. Каӆаңӆаӆ иса эӆты вантман тайты мосӆат. Щаӆта айӆта ёхӆы Кев тум пелк эӆты касаӆты акта­щты мосаӆ. Щиты щи касӆыман пора хащаӆ. Олег па Марина эвиеӆ хуван энаммаӆ, ин нийӆмет классан утаӆтыяӆ. Ащеӆ па антеӆ ӆаваӆты питаӆ хун Кев ёхӆы уншӆат па яӆап таӆ каникулыят кеша ёхатӆат…