Ӆорвощ район куща шоши хоятат пиӆан уйтантыяс
Там шоши мир хоятат емаң хатаӆан Ӆорвош район утхотн Олег Николаевич Попов шимӆаң рут мират пиӆан йи пасан сурыйн потремияс. Муң районэвн ар каман хорпи каш верты лотат верыӆыят. Хой ӆаңхаӆ па муй вератӆ верты щи тахая юр понаӆ. Щимащ хоятат ям мойӆапса па ишканщап ясңатн хойсаят.
Ун пасанан шай ищман айӆта потремиман куща ху хоятат хуӆантас, мосаң ӆув молты нумсат тайӆат, щи эӆты инщасас. Меет олаңна ӆув Леонид Петрович Лонгортов пеӆа сертификат катсот щорс ох мойӆас. Щи сертификат щира туса вератты ху мосты пормасат ӆутаӆ па нюмар анат верты питаӆ. Щи тумпина ханты кешет учияӆ верты. Хоп ӆупат верты па нумас таяӆ. Щаӆта щи пормасат верты ӆув няврэмат па утаӆтаты питаӆ. Шеек ям вер щит.
Хащам тыӆащн округев ӆоватан уӆмаӆ конкурс видеороликов «Мы говорим на родном языке». Хантэт, урт па саранат ӆув ясаңӆаӆн кина хорт вермеӆ. Хантэт кутн ветхосьяң мойӆапса уӆмаӆ. Арпелк мойӆапсаят Ӆорвош район хантэт шитсат. Ӆув Мужи, Васьёханов, Овкурт, Ямкурт па Касым-Нёӆ уӆӆат. Щи щирн китам мойӆапсаят Олег Николаевич ёхтам хоятата мойӆас. Опи па яй сакңан, Валентина Хозяинова па Алексей Конев олаң места шитсатан.
Няврэмат туңа-щира энмаӆтам ураңна мойӆапса нэпекан хойсаят Юлия Герасимовна па Станислав Гаврилович Миляховңан. Ӆув ай похиеӆ ашкуӆа етшам юпина Тюмень воша еӆӆы утаӆтыты манмаӆ па щита меет ямашк, няврэмат кутан, утаӆтыяӆ. Щи щирн ӆув Ямал мувев губернатор эӆты стипендияйн юкантам.
Муң шошия хоятӆув кутн хоӆна ар ошаң хоятат уӆӆат. Ат щиты па еӆӆы уӆ, ат муң хоятӆув мир ӆоватн уятӆаят!
