Ханты семья президент эӆты медалян орден «Родительская слава» юкантса
Тампуш аратӆ Ямал мув ӆоватан хуӆам семьяя президент Владимир Путин щимащ воӆаң тынаң мойӆапса юкантас. Щитат кутан семья Виктор па Раиса Пырысевңан. Ӆын Ӆорвош районэв эӆты уӆӆаңан. Там таӆн хус таӆ хащас хоты ӆын поры версатан.
Раиса Романовна Ёханкуртан сэма питас. Ащеӆ Роман Сандрин вулды тащ хотатн рупатас. Семьяяӆан ӆапат няврэм энмас. Ийкеӆ па Виктор Николаевич ищи ун семьяян энмас. Сэма питас ӆув Ямкуртан. Опращӆаӆ хуӆ веӆпасман вусат.
Катңан Пулңават вошан ияха уйтатсат. Щи порана Раиса щита педагогический колледжан утаӆтымаӆ па рутӆаӆ хоща шай инщты лоңемимаӆ. Щикут тохи мойяңа Виктор ёхатӆ. Ӆув отпуска ёхи манаӆ Надым вош эӆты. Щиты щи уӆапса юшӆаӆ ияха уйтатсат. Таӆ хащаман поры версаңан. Па хоӆна кимет таӆн сэма питас Дарья эвеӆ. Хоӆна вет таӆ хащамн похие сэма питас – Матвей – нэмн понтса. Па семьяян уӆ меет айшак эвие, щит – Лиза. Уншак эвеӆ Ксения хувн пуңӆа манас па ӆув семьяял пиӆан Васьёханов куртан уӆ па похие энмаӆтаӆ. Тохи антими Раиса па ащики Виктор хун маремиӆаят яңхиӆыӆат.
Ӆув няврэмӆаӆ вещката энмаӆсыӆаӆ. Ёӆн иса ханты ясаңан потарӆат, ханты уӆапса альӆат па рутӆаӆ хоща Ӆорвош район хуват мойӆыты яңхиӆыӆат. Сишн ӆув вуӆы хотаң па хуӆ веӆпасты уӆапса яма уятӆат. Щи тумпина яма па ошаңа утаӆтыӆат.
Дарья эвеӆ ашкуӆа сорнең медаль пиӆан етшаптамаӆ. Па единый государственный экзамен меет ямашк кимет няврэматан кутан ханшмаӆ, сишн Ямал мувев губернаторан премияян мойӆам па путевкаян Хон Петра воша всероссийское мероприятие для выпускников «Алые паруса» миям. Ин ӆув университетан ун тахаян утаӆтыяӆ. Айшак эвеӆ Лиза ищи ёхи ант хащаӆ. Арсыр тахаята яңхаӆ. Туняӆ Пулңавта экскурсионно-образовательный маршрута яңхмаӆ окружной проект «Ямал – полуостров открытий» щирн. Тампуш па ӆув Ӆорвош районэва «Одиссея» нэмпи экспедицияя яңхмаӆ. Матвей похаӆ ащеӆ пиӆан хуӆ па вой веӆты яңхиӆыяӆ, ашкулайна яма утаӆтыяӆ. Ӆув иса ияха няврэмӆаӆ пиӆан ӆохна хухатӆыты вер самаңа тайӆэӆ. Кашң ӆуң ӆув ияха щарс пеӆа сютчаты па певаӆты яңхиӆыӆат. Таӆн па таӆ юшат хуват ӆув рутӆаӆ хоща Ӆорвоша район пеӆа яңхиӆыӆат.
– Муң ант йи нумасысув хун тамащ ун воӆаң мойӆапсаян маӆаюв. Муң айӆта аратӆ ханты мир хоятат иты уӆӆув, няврэмӆув энмаӆӆув. Емаң хатӆата яңхӆув, ханты мир уӆапсаев этаӆтаӆув, хоты опращӆув порыӆысат. Ёӆан рут ясңевн потарӆув па ханты пормасат ӆэщатӆув. Муң пеӆаев вантман няврэмӆув ищиты ханты мир уӆапсаев шавиман тайӆэӆ».
Туняӆ Раиса Романовна няврэмӆаӆ яма па вещката энмаӆтаӆ ураңан ЯНАО губернатор Почётной грамотайн маса па «Материнская слава Ямала» меваӆ посан юкантса.
Виктор Николаевич па Раиса Романовна Надым вошан уӆӆатан па щита рупатӆатан. Виктор капитан-механика катьран рупатаӆ, ёханат хуват Молм щарс унты яңхиӆыяӆ. Иймеӆ па няврэмат шавиты хотан воспитателя рупатӆ. Ат па там иты еӆӆы тумтака уӆӆат па няврэмӆаӆ па хиӆыӆаӆ энмаӆӆат.
