Ин там пелакн ӆойӆат па ӆавӆасӆат хун ищки хатӆат ёхатӆат па ёханат яма потӆаят
Тампуш сус пора воӆӆы хошам па ӆонщ воӆаң антом вус. Арпелк тащ Кев уншсат ӆонщ нтом пораян. Няр кев эӆты кааӆман ар ухаӆ паты па нярма хирса. Ищки хатӆат ӆаваӆты ӆты вуӆэң ёх яӆап нярма ӆэщаптаӆат па понӆат.
– Иса, хут бригадайӆув тумтака ямас Кев уншсат. Вуӆыӆаӆ умтакат. Тампуш план хуват мосаӆ 38 тонна киӆа нёха хорыя, – ястаӆ начальник отдела леневодства Алексей Худи. – Щит 1100-кем вуӆы. Муй арат хорӆув ныты питӆа. Ӆуңӆ ям уӆмаӆ. Вуӆэт яма ӆэсат, морт-кем рат вояңа йисат. Сишн хорты ащ ванашк воштаты питӆа. Щи ураңна хорсты лотн ёх караль ӆэсятты питсат.
Хорсты тащ воштаты еӆпина ӆувеӆаӆ ӆуңатӆаят па утча тайты питӆаят. Хащм арпелк тащ таӆ ыс ӆойты тахаята воштаӆаят. Оӆаң па кимет бригадаят Сояхан ӆуңатӆаят. Хуӆмет па няӆмет тащат Кузь-ёлян па Пошмаю ёханатн. Меет ӆаварт тащ воштаты Щаня эӆты. Рахас щита хорстыя па яӆап щир ураңн ант эсаӆӆаят. Туняӆ Мужи воош ӆепан яӆап щир хорсты лот верам. Вуӆэң ёх ястаӆат симась хорсты вер ант шактаӆэӆ. Па хоты нэрыты, симась яӆап щир верты нумӆта куяятн парӆа верты. Хорты ант-ки маӆат йиты охн ант сохаптаӆаят.
Сусӆ мелк ураңан воошата ёхатты кум ант шитӆа. Вуӆэң ёхӆув ӆэтотӆаӆ хоӆты ванаматы питмеӆ. Совхоз эӆты ӆэтотат вездехотатн па воздушный подушкаятн хотат унты китамт хуӆмет, ветмет па хутмет тащата. Кимет тащат хоӆна сопас тайӆат. Ӆув ӆуңн карты юш ӆеп ӆоймеӆ па сишн щита яӆап ӆэтот ӆутыӆымеӆ.
Там лопс ханшты эӆты (12.11.2020 таӆ) еша ищкияшк йис па вуӆы леккар 2-мет бригада эӆты ёхтас.
– Хот ӆойты таха эӆты вуӆэң ухаӆн Паннэ нюрм унты вуӆэң ухаӆн йисам. Щиӆта па ӆонщ-хопан ӆухсэман Мужи воош унты навраӆсаям, – ястал Константин Талигин. – Конторая ӆоңтысам. Айкеӆ тусам. Тумтака Кев уншсус. Иса ям. Вуӆыӆув веӆмаңт. Ӆуңн еша иникевн тащев мохаӆтыса. Ӆув ищи ӆэты ӆытӆа. Ин ищки хатӆат ӆаваӆӆув па хоӆна ванашк касаӆты питӆув. Нумастэмн тащэв ям арат вуӆы нёха хорӆ. Щи онтасн йиты охӆ морт-арата хойӆ.
Муң па воошн омасты хоятат кашң сус ӆаваӆув хун вуӆэң ухӆат ёхатӆат па яӆап нёха хорӆат. Рутӆаӆ хося ӆоңтыӆат, айкеӆ туӆат, потремиӆат, шай инщӆат па ёхӆы манӆат. Ат тумтака рупатӆат!
