Там хащм ӆапатн Ямал мув командаев шимлаң рут мир касапсаян нох питас
Красноярск нэмпи воошан, 7-мет Аспотты тыӆась хатаӆн Чемпионат па Первенство России шимӆаң рут мир касапсаян касты ёх касты етшасат. Щи лота ун хон Россия мувев эӆты меет юраң па каркам хоятат касты ёхтыӆысат. Таӆаң веет хатӆ ӆув щита кассат па тарамӆысат: хуӆам-пуш хой хувашк наварсат, хуӆам километра хухаӆсат, ухаӆ шоппи наварсат па тынщаң па ӆаям ёваӆсат.
Тампуш Ямал мув касты хоятӆув нох питсат, оӆаң места шитсат! Таӆаң няӆхосьяң (14) таӆ щи амтат хатӆ ӆаваӆсат. Яма щи ураңна рупатсат. Моӆха туп хувн хасям 2006 таӆн нох питыӆысат. Ин па яң командаят кут эӆты нох уратсат. Красноярский край, Ёмвоош мув, Якутия, Эвенкия, Сахалин, Таймыр, Камчатка, Чукотка па Ур мувт иса ёӆта хащсат.
Ямал мувев командаян иса ур няврэмат па туп йи ханты эвие – Мария Куртямова. Маша ащел-антеӆ вуӆы хотан касӆыман яңхӆат. Сишн ӆув айтэӆн ханты уӆапса уятӆ. Ӆув 2007 таӆн Овкурт ашкуӆая утаӆтаты туса. Щита ватты питас хоты няврэмат касӆат па наварӆат. Щи тумпина ӆув акаеӆ Анатолий Куртямов ищи касман яңхиӆыяс.
– Акаем мастер спорта нэм таяс. Щит уйтман па вантман ма ищи касты нумас понтсам. Ӆапат-мет классан секцияя яңхты питсам. Оӆаң тренерэм Александр Семёнович Конев шуңат. Ӆув ар чемпионат энмаӆтас, – ястаӆ Мария. – Щиты ма ашкуӆа етшам юпина Пулңавта утаӆтаты мантсам. Еӆӆы касапса вер туты питсэм. Ин ма 3-мет курсан учителя физической культуры утаӆтыӆам.
Товиян яӆпа этам коронавирус нэмпи муш ураңан спортсменат воӆаң ант касмеӆ. Туп еша навармеӆ, тынщаң па ӆаям ёваӆмеӆ. Меет юраңшак касты хоятат Яр-Сале воошан пирысаят, хота Мария Куртямова оӆаң места шитас.
– Красноярск вооша манты еӆпина командаев эӆты тест на коронавирус вусаюв. Щаӆта щи юпина тохӆаң хопан Новосибирск воош унты тусаюв. Щиӆта еӆӆы па карты юш хуват Красноярск унты, – потарл Мария Артёмовна. – Ёхатман, ма мохты так нумас понтсам – ищипа, муй арат юр тайӆам, нохӆы уратты питлам. Ун пумащипа ястаты утчиӆам ащема па антема Куртямовым Артёму Валентиновичу па Ольге Валерьевне. Ӆын манэм вещката энмаӆсыӆэӆ. Щаӆта пумащипа ястаӆам тренерӆама, хой манэм нётапса верас, ям ясаң потартас. Щит Александр Герасимович па Денис Сергеевич Лонгортовңан.
– Чемпионат па Первенство России манты еӆпина ван кутн наварты ӆойӆысув. Вантсув па пирысув хой юраңшак. Товиян 2019 таӆн Маша Куртямова 286-пуш ухаӆ шоппи навармас. Щи ураңна тампуш сусн ёхтас приказ о присвоении Мастера спорта России, – умащӆыман па аматман потарӆ главный тренер сборной Ямала, Александр Герасимович Лонгортов. – Касты няврэмӆама кашң пораян потартыӆам, хун яма ӆэщатыты питӆан па нумас понӆан – щи порана нох питты питӆан!
Па яна, щит щи. Хой ямашк рупатӆ па юр вераӆ – нох питаӆ! Ищиты нумасӆ Мария Куртямова. Кимет таӆн Курк тыӆасьн округев ӆоватн па касапса питаӆ. Щи унты ӆув па яма ӆэщатыты питаӆ!
