Ӆуңев ёхтас
Па щи, мохет, ӆуңев ёхтас,
Еша кепа ищки вус.
Кашң хоят хошам ӆавӆас,
Ущ тыӆащна ущев тус.
Хуӆ веӆты ёх кашаң куртна
Ӆуң мув эӆты нумасӆат.
Аӆ па таңха ям номасна
Касӆаптыӆат ӆуң курта.
Тата вусат хув йистэӆна
Ун опращӆаӆ хуӆ веӆман.
Яӆпа энамты няврэмӆана
Номпса понат щи верӆан.
Мосы хутсы ищи питӆат
Нын итанна касӆыӆыты.
Мосы ищи номас понӆат
Рут мувийӆаӆ валэмиты.
Ӆуң пораев – щюняң пора,
Хоя кепа йиса ям.
Еша тахты пеӆңа кепа
Щит ӆув хоты хун паӆщам.
Ӆуңан хоты мурах вощӆа,
Шумах эӆты вой верӆа.
Тамащ тынаң хатаӆна,
Камн вер хоӆ уятӆа.
Тухаӆ ёхӆув неш морта,
Хоӆап хушӆат аяӆта.
Хойтэм хопаӆ ӆэщатаӆ,
Хой моторӆаӆ ӆэщатаӆ.
Уншак имет вонщап ётӆат,
Щаӆта хуӆ вой такан паӆӆат.
Нявремиет ищи нётӆат:
Юх сэварӆат, йиңк аӆэмаӆат.
Щиты щи ӆув ӆуңеӆ хащаӆ:
Хуӆ веӆты ёх хуӆ такан веӆӆат,
Планӆаӆ сора тэкаптаӆат.
Щаӆта хоты ям номасан
Ёхӆы манӆат аматмаман.
