Там хоятэв Ӆорвош районэв ӆоватан кашаң хоятан уйтӆа. Тампуш ӆув юбилей сэма питам хатаӆ поснтаӆ
Щит Иван Ефимович Ребась. Ӆув сэма питас Ёханов куртан. Щи хатӆ – 10 мет хатӆ айтахаят потты тыӆась 1957 таӆ. Семьяйӆ хуӆ веӆпасман вусат. Ащеӆ – Ефим Егорович па антиеӆ – Анна Даниловна. Ӆын семьяяӆан яң няврэм сэма питас. Иван меет оӆаң па уншак няврэм. Ай пора эӆты ӆувеӆ мосас антия-ащия нётты. Куртан уӆман рупата ар: юх эватты, таӆты па халатты, щаӆта йиңк аӆты па мосаӆ, па па вер ар.
– Нумӆэм, щи порана хоп моторат антомат, сишн, иса ӆоваӆман яңхсув. Веӆпасты куртыев эӆты ӆашкуп унты веӆам хуӆат ӆоваӆман тутӆысӆам, – нумаӆмаман потарӆ Иван Ефимович. – Ар юр мосаӆ, ар шанш-йиңк этас. Хоты нэрыты, туты мосӆат, антом-ки – шакӆат руваң хатаӆн.
Хун ашкуӆая манты ӆовата няврэм энмаӆ, ӆув Васьёханова китӆа. Ищиты Иван ӆув ӆоватаӆ няврэмат пиӆан тохи туса. Щита ӆув интернатан кимет няврэмат пиӆан вус. Уталтаты питас нулевой класс эӆты па нийӆмет класс унты. Щи порана ашкуӆа директора Роман Прокопьевич Ругин уӆмаӆ.
Иван Ефимович ошаң няврэма энмас, ашкуӆана яма утаӆтыяс. Яма утаӆтыям онтасна ӆув еӆӆы утаӆтаты китӆа. Ун Тюмень вошан ӆув кат таӆ утаӆтаӆ, щит 9 па 10 класс. Ашкуӆаяӆ ӆапат-мет номер таймаӆ. Ӆапат – щит ям номер. Хантэт щи цифра самаңа тайӆэӆ. Ашкуӆа етшаптаты пора ёхтас, нумасты мосас хоты еӆӆы уӆты?
Щи порана шоши ханты хоятӆув утаӆтыты питсат, ар-сыр вошата мантсат. Ӆув опеӆ – Екатерина Петровна Пимнева (Ребась) – леккара утаӆтыяс. Щаӆта ашкуӆаян утаӆтыям утаӆтыты нэңан, Светлана Сергеевна Беляевайн щи нумасн понам. Щиты 1976 таӆ эӆты па 1982 таӆ унты Тюменский медицинский институтан ӆув утаӆтыяӆ. Диплом щирн ӆув врач-терапевт. Мохты Ӆапатнаңк воша интернатурая китӆа. Щи юпина Охсарка вошн инфекционист леккара рупатаӆ. Самаӆн рут муваӆа таӆӆа. Сишн, 1986 таӆн Мужи вош леккар-хота рупатты китӆа. Щиты ӆув участковый терапевта кат ӆэм таӆ рупатас, щаӆта па еӆӆы инфекциониста понӆа. Еӆӆы, 1998 таӆ эӆты па 2004 таӆ унты ӆув заместителя главного врача рупатас. Щи порана главный врач вус Владимир Прокопьевич Ругин. Ӆув пиӆэӆн Иван Ефимович ар юр понтсат Ӆорвош район больницаят туңа-щира ӆэщатты. Ар яхсат вуӆэң хотата па веӆпасты ай куртыета. Кашң тахаян ӆув хоятат ӆаваӆсаят. Инфекционист леккара ӆув пенсияя манты унты рупатас. Аратаӆн 39 таӆ леккара рупатас.
Ӆовош районэв хуват яңхман, Иван Ефимович вантас хоты шоши хоятӆаӆ уӆӆат, муй нумсат па верат тайӆат. Ӆув самӆ шоши мураӆ эӆты хошияӆ. Ӆув иса хоятӆаӆа нётап уратаӆ верты. Сишн ӆув нумас понаӆ депутата пиращты. Хоятатн ӆув мохты пирыӆа. Щиты ӆув вет-пуш пирыӆыса. Аратаӆн хоӆмаң пеӆа вет таӆ депутата рупатас. Ӆув ун тахаятн шоши рут хоятӆаӆ номпсат па верат эӆты потартас. Ар ям вер ӆув верас.
Сэма питам хатаӆн мойӆапсаят по мойӆапса яснатн пиӆан Иван Ефимович хоща ёхи ӆоңсат Районный Дума эӆты депутатат. Ӆув тамиты потарӆат: ар мойӆапсат па ям ясңат ӆув шитман тайӆ – почетные грамоты Тюменского обкома профсоюза, Законодательного Собрания Ямало-Ненецкого автономного округа, Главы Шурышкарского района, Благодарность департамента здравоохранения Ямало-Ненецкого автономного округа. Щит туп нэпекат, меет ям шитам от – ӆув хоятатн яма уйтӆа па ям нумасн нумӆа, ӆув эӆтэӆ туп ям ясаң!
– Ӆув муң шоши хоятэв, ӆув тата сэма питас, ӆув тата утаӆтас, леккара утаӆтас па ёхи ёхтас, па тата хув рупатас! Районэвн кашң хоятан яма уйтӆа! Округев ӆоватан конкурсан «Народное признание» ко Дню медицинского работника нох питас 2009 таӆн. Щи нэпек муй эӆты потарӆ? – ястаӆ председатель Думы Шурышкарского района, Александр Анатольевич Худалей. – Щитн ӆув хоятатан самаңа тайӆа па ӆув ям верам верӆаӆ ураңна нумты питӆа!
Иван Ребась рупата тумпина ӆохан яма хухатӆыяӆ. Утаӆтыман пораян ивевн спортзала яңхас. Щита самбо нэмпи юращты секцияя ванкутн яңхиӆыяс. Норматив кандидата в мастера спорта тайӆ. Ӆохн хухатӆыты шеек нётап верас хуӆ веӆты вер. Щита, ванта, хун еңк пухаӆӆан ар юр мосаӆ, ешӆан йи карӆаӆат. Ищи ӆохан мосаӆ ӆонщ эӆты еӆӆы хатмиты. Сишн куртаң няврэмат арпелк касты тахаятн нох питыӆыӆат.
Иван Ефимович иймеӆ, Любовь Тимофеевна пиӆан хуӆам няврэм энмаӆсатан. Иса уна хоята йисат. Ӆын ин пенсияян сютчиӆңан па хиӆыӆаӆ энмаӆты нётӆаңан. Иван Ефимович катра опращӆаӆ иты унта яңхаӆ, хуӆ па вой веӆаӆ. Ёханов куртаӆа ивевн яңхаӆ. Щита ӆув яма сютчаӆ!
Там сэма питам хатаӆн ӆувеӆ ар тахаят эӆты ям мойӆапса ясңат китӆаят:
– Ешак тынаң, сама мосты Иван Ефимович! Муң ӆухсэв, муң леккарэв! Сэма питам хатӆэн пиӆна! Тумтака ой пиӆн еӆӆы уӆты! Уӆты юш хуват наң пиӆэнан ат шушӆат туп ям хоятат! Турам пиӆан па Калтась пиӆан еӆӆы ям нумасна!
