Марк Иванович па Зинаида Васильевна Рохтымовңан сот таӆ шуп ияха уӆӆатан
Ар таӆ ӆын Овкурт ашкулаян рупатсаңан. Зинаида Васильевна няӆъяң таӆ ашкуӆана няврэмат утаӆтаман рупатс. Имеңан-ийкеңан няӆ няврэм энмаӆсатан. Щи тумпина хоӆна вет шукащты няврэм нох паватсат. Ин ӆын хиӆыӆаӆ энмаӆты нётӆатан. Ӆын катхосьяң внук тайӆатан па йи правнучка.
Марк Иванович опращӆаӆ вуӆы хотатн яңхсат. Ӆув ай пора эӆты ӆохан касты вер самаңа тайӆаӆы. Ин ки ӆояпӆ ай ёх эӆты ёхи ат хащяӆ. Хув пораян, 1976 таӆн ӆув кимет ёх хоятат пиӆан Пуӆңават эӆты Москва унты ӆохатн хухаӆсат. Кат щорс нийӆсот километра ӆув тыӆащ моӆтас хатаӆ мантсат. Аратаӆн яртьяң спортсмен этсат, Москва унты туп ӆапат хоят ёхатсат. Юш хуватн манмам ӆув ар муватн хойӆысат, Ямал мувев эӆты потарсат. Щи тумпина Марк Рохтымов ӆохн Пуӆңават эӆты Тюмень вош унты па яңхас. Ищи ӆохна.
– Муң таӆаң тыӆащ ӆохатн шушсув. Щит хольма хатӆ. Щи тумпина хуӆам хатӆ сютчасув. Щит Сейдаян, Ухта па Ярославль нэмпи вошатн. Кашң вошн йи хатӆ. Иса ияха няльяң пеӆа хуӆам хатӆ, – нумаӆмаӆ Марк Иванович. – Щи арат хатӆ сыс муң кащң хоят вет ӆох пара нэрсув. Там вер эӆты няврэмлама потарӆам. Ат ищи касты вер яма уйтӆат.
Поры верам хатӆ юбилей ураңна ӆувеӆаӆ Ямал мув куща эӆты 50 таӆ ияха уӆам кеша 50 щорс ох мойӆасаят. Ат па ищиты еӆӆы тумтака уӆӆат!
