Муй наң версан мирэв урңа?
Матты хоят манэм иньщмаӆ:
«Муй наң версан мирэв урңа?»
Ма па еша нумасыӆом,
Щаӆта щиты ястаӆыӆом:
Аӆ хатнэху щиран усом,
Аӆ хатнэху щиран хоӆсом.
Па мув рущат кутан уӆман,
Атом вер ант верыӆысом:
Ӆоӆмиты – ант ӆоӆмиӆысом.
Шук ма ищи вантаӆысом:
Щит хоятан хун моштаӆа,
Щит хоятан хун ястаӆа.
Щишан, хота-ки ат усом,
Щиты вертӆом потартыя,
Щиты рахаӆ ястатыя:
Хоят щиран усом-хоӆсом,
Хоят щиран потрэмисом,
Щомем кеман рупитысом.
Арсыр мират кутан уӆман,
Нумастэман, мет ям вер:
Аӆ хатнэху щиран уӆты,
Щаӆта рахаӆ ястатыя:
«Ма хатнэху щиран усом,
Щит щи версом мирэм урңа!»
Муй щирн уӆты, манэма яста?
Охен вотом ханты ики,
Манэм ястаӆыя-сары:
«Муй щирн уӆопсаен питас,
Муй щирн верты верэн манас?
Наң моӆты потар этаӆтыя,
Наң матты айкеӆ тувиӆыя!»
Охсохӆан иса новия ювмеӆ,
Наң, ма итэма ищи, таңха,
Ар вещкат номас таиӆысан:
Муң мирэв уӆты верат эӆты
Хатнэху щиран ястаӆысан,
Ям уӆопсая нох вуратысан.
Туп опращ ясңев манты сыят
Арпелак эӆты иӆ нямарсаит,
Хантэта хуӆты ант масаит:
Муң уӆты мувӆав шукатсаит,
Хуӆ веӆты йиңкӆав нёхӆытсаит,
Уӆопса щирӆав нох вусаит!
Наң, охен вотом ханты ики,
Манэма щимащ ясаң вера:
«Муй щирн еӆӆы уӆты-хоӆты,
Муй щирн, номас тайман, омсты?
Наң моӆты потар этаӆтыя
Наң матты айкеӆ тувиӆыя!»
Опращ ясаң тувиӆыӆув
Ма мирэм тайты ясаң
Уӆӆыис умащ па тащаң:
Матты айкеӆ верыӆыты,
Нэпек щира ӆэщатыты,
Уӆты хуват потрэмиты.
Инпа опращ ёхӆам ясаң
Рущат кута ӆощиӆтыса,
Ар мир кута метшаӆыса,
Камын щирн кертаӆыса,
Няӆом шупан ястаӆыса.
Еӆӆы па щи йисаң ясңев,
Еӆӆы па щи нуптаң потрэв
Уӆты кутан уштаӆыӆэв,
Манты кутан ёрэмиӆэв,
Рущ хораса веромтыӆэв.
Кашаң номсаң хоят ястаӆ:
Муң туп ханты хорас тайӆув,
Щишан, ясңев хорас туӆув.
Ханты щирн хун уӆыӆыӆув,
Опращ ясаң тувиӆыӆув!
Оӆаң ясаң
Ома – щит оӆаң ясаң,
Мата от ястаӆан наң.
Ома – щит оӆаң куром,
Мата от пуромӆан наң.
Ома – мет мосты ясаң,
Муйсыр от тайӆом ма!
Щиканща уӆопсэн хуват
Кен юшан – еӆ манты кен.
Ӆавартаң, ёхартаң юшан
Щомӆыя питтэн кемн,
Омаен номсан ки тайӆан:
Еӆ манты ищипа кен.
Ома – шеңк рахи ясаң,
Муйсыр от ястаӆан наң.
Ома – щит еӆӆы юшен,
Муйсыр от манӆан наң.
Ома – мет тынаң ясаң,
Муйсыр от уитӆом ма!
