Пулңаватан 33-мет Съезд Ассоциации округев ӆоват эӆты ияха актащиса
Айтахайт потты тыӆащ 7-мет хатаӆн Округев ӆоват ун каш верты хотан ар шимӆаң рут мир хоятат ияха актащисат. Няӆъяң моӆтас делегатат па хольмаңкем ванты хоятат. Ӆув иса округев кашаң район эӆты ёхтыӆысат.
Региональное общественное движение «Ассоциация «Ямал – потомкам!» округев ӆоватан кашаң районан павошатн филиалат тайӆ. Щит ӆапат район па нийӆ ун вош. Щи тумпина энамты ёх кеша, хой ун вошатн утаӆтыӆат, ищи ӆувеӆаӆ нётты ураңна энамты ёх филиалат верман уӆӆат. 1989 таӆн шимӆаң рут мир ёх ияха актащсат па нумас понтсат хоты рахаӆ шоши хоятӆаӆа нётап верты, уӆапса кенашк верты. Щиты ассоциация этас. Хащам таӆатан кущаята вусат – Сергей Харючи, Хатяко Езынги, Александр Евай, Роман Яндо, Эдман Неркаги па Эдуард Яунгад. Куща няӆ таӆа пирыӆа.
Сишн тампуш няӆ таӆа хащас хоты Эдуард Яунгад пирыса. Ӆув хоят ин тампуш потремас хоты ӆув няӆ таӆ рупатсат, муй версат па хоӆта яңхсат.
– Хой там ассоциацияя ӆоңман уӆ – ӆув анта ох сахат, ӆув аӆ щиты нётӆат шоши хоятӆаӆа. Хой хуӆ веӆапасӆаман уӆ па вуӆы тащ шавиман рупатӆат па моӆты верат тайӆат хота нётап мосаӆ, иса веритӆат муң хосяев ёхтыӆыты. Муй кем веритӆув – нётӆув, – ястаӆ Эдуард Хабэчевич. – Округев ӆоватан хутсот моӆтас хот тайӆув, хой веритаӆ шоши хоятӆува нётап верты. Нэпек больницаята туңа-щира ӆэщатты, хот щир нэпекат яммаӆты, энамты ёх утаӆтыты лотатн нётап верты, антома ювам хоятӆува лоттыты нётап па верӆув. Рупатаев ар.
Ӆорвош районэв эӆты щита вусат Дмитрий Тарагупта, Василий Пасьмаров, Ольга Заваруева па Евгений Михайлов. Ёхтам хоятат пиӆн уща версат председатель Законодательного собрания ЯНАО Сергей Ямкин, заместитель губернатора Сергей Климентьев па шимӆаң рут мир хоятат департамент куща нэ Ульяна Каленюк.
Кашаң департамент эӆты ӆэщатам потрат хуӆантсаят. Па меет такан потарса вуӆы нёха эӆты – ӆув тынӆ эӆты, хуӆ веӆпасӆаты вер эӆты па вой веӆты вер эӆты. Щи тумпина Молм щарс пеӆа, ийңк иӆпийн мув ӆыӆ (газ) вучиӆа нох шепты. Сишн шоши хоятӆув нумас понтсат щи вер нох воӆытты мосаӆ, антом-ки хуӆэв век кеша нушая йиӆ. Ун тахаята нэпек ханшса.
Пирыты пора ёхтас па щи урңа кат хоят нох этас: Виталий Сатыков, ӆув Тазовский район эӆты, па Эдуард Яунгад – Пуӆңават эӆты. Щита арпелк хоят Эдуард Хабэчевич пеӆа ёшпос понтсат. Ӆув верты вераӆӆа такан ястас еӆӆы туты па шимаӆаң рут мир шоши хоятата нётап верты, уӆапса кенашк верты.
