Ӆорвош район сэма питам хатӆ кеша Андрей Алексеевич Артеев «Почётный гражданин Шурышкарского района» нэмн юкантам
Ӆорвош районэв сэма питам хатӆ кеша Мужи вош каш верты хота ар хоятат ияха актащсат. Кашң вош па куртат эӆты мояң хоятат ёхатсат. Районэв куща ху Олег Попов потартас хоты муң хащам таӆэвн усув па муй ям вер версув. Кашң таӆ муң яма па тумтака уӆты уратӆув, уӆты тахайӆув сыстама па вещката ӆэщатӆув. Кашаң хоят ки еӆӆы уратты питаӆ, ям верт верты питаӆ ки – уӆапсаев кенашк йиӆ. Щи щира мосаӆ яма па ошаңа рупатты.
Щи юпина хой яма вус па рупатас мойӆапсаятан мойӆаты па юканты питсаят. Ар хоят нох ӆойӆысат па ӆув урңеӆн такан ёшпат сэңксат. Щи кутан муң шоши хоятӆув, Андрей Алексеевич па Любовь Григорьевна Артеевңан.
Ар рупатам па вуӆы тащат яма шавиям па энмаӆтам ураңна Андрей Артеев нэмн юкантам – «Почётный гражданин Шурышкарского района». Щимащ нэм аӆ па кашң хоятата ант маӆа. Щи ураңна мосаӆ шеек яма рупатты па мосты верэн самаңа тайты. Андрей Алексеевич ветеран ЯНАО, ӆув уӆтаӆ хуват иса вуӆы тащ пиӆан рупатаӆ, уӆапсайӆ ай пора эӆты щита манаӆ. Ӆув опращӆаӆ вуӆы тащ шависат па энмаӆсат, ищиты щи вер ӆув еӆӆы туӆӆы. Рупатты тащаӆ иса оӆаң местаян уӆӆыяӆ, ёхи ант хащаптыӆат, план ищипа маӆат.
– Ма ай пора эӆты вуӆы шавиман рупатты питсам, куш пенсияян уӆӆам, ин ешауӆ 40 таӆа ванамӆ хоты ма рупатӆам. Иса арпелк ма 1-мет тащн яңхӆам, – ястаӆ Андрей Алексеевич. – Ма унащем па ащем ищи вуӆы хотан яңхсат па вусат. Ин па муң уӆапса верэв ай похэмн еӆӆы туӆа. Муң ӆувеӆ иса нётлэв, ӆув пиӆэӆн касаӆӆув. Вошн муң омасты ант веритӆув. Утаӆсув утан уӆты, щита каш па ям.
Ӆув иймеӆ, Любовь Григорьевна пиӆна вет няврэм энмаӆсатан. Ун эвеӆ Анастасия ищи опращӆаӆ вер еӆӆы туӆ – Приуральский районан семьяяӆ пиӆан вуӆы тащ хотатн яңхаӆ. Кимет эвеӆ Пуӆңаватн уӆ. Кат уншак похӆаӆ кинтак ляля манман уӆӆат. Александр тохи китам па Иван яйӆ ӆув юпеӆн манмаӆ шоши Хон мувев шавиты. Пётр, ай похаӆ, пастуха рупатаӆ. Щиты, няврэмат яма энмаӆтам ураңна Любовь Григорьевна район куща эӆты Благодарностян мойӆам – за заслуги в воспитании детей и укрепление семейных традиций.
Мужи воша вер сахат ёхтыӆысат па сора ёхӆы вуӆы хот пеӆа актащиты питсат. Вер версэн, нянь па шук ӆэтот ӆутсан па ёхӆы утӆам тахаена уратӆан. Нэмоӆты хошам хот ант мосаӆ. Щиты нумасӆат вуӆы хотан энмам па рупатам хоятат. Па щирн ӆув уӆты ант веритӆат, ӆув энмаӆты войӆаӆ самаңа тайӆыӆаӆ. Ат па еӆӆы Ӆорвош районэв хуват хоӆна хув вуӆы тащат уӆӆат па энамӆат!
