Тампуш 15-мет пуш шимӆаң рут мир хоятат Россия хон мувев ӆоват эӆты Москва воошан ияха актащисат

Москва воошан Щохр тыӆасьн 23-мет па 28-мет хатӆ унты ун вантапса «Сокровища Севера» нэмпи лот верыӆыса. Там вантапса лот 15 пуш верса. Щи тумпина шимӆаң рут мират общероссийская общественная организация «Ассоциация коренных малочисленных народов Севера, Сибири и Дальнего Востока Российской Федерации» 30 таӆ сэма питам хатӆ поснтас. Щи кеша хоӆна форум коренных малочисленных народов верса.

Сокольники нэмпи харн вантапса лот ӆарпиӆыса. Щита урхотат ӆонщсат муң Ямал мувев па Югра мувт эӆты. Чукотка па Камчатка эӆты рут хоятат ищи ӆув уӆты хотӆаӆ нох ӆощсыӆаӆ. Сишн кашң хоят хой ӆаңхас веритас кашң хота ӆоңты па каварам шай инщемиты. Мояң хоятат эпӆаң, камнхорпи сюняң ӆэтотатн ӆапатсаят. Умась вантыя хорам тэӆаң пасанат пеӆа. Кашң хотан потарса хоты хоятат ӆув мувӆаӆн уӆӆат, муй верӆат. Хорам ӆуматты сох таймеӆ. Мояң хоятата рахас сох ӆуматты па хорамаң хорт верты.

Ма вантэмн, муң Ямал мувев эӆты меет аршак хоят щи вантапса харлота ёхтыӆыяс: щит хантэт, саранат, урт па селькупат. Ариты па якты, хор ханшты, ёнтасты па туса нёхратты хоятӆув, па хоӆна ар тахаятн камн-хорпи вер верты па хошты тус хоятӆув. Ӆорвоош районэв ищи пуңаӆн ант хащаптас. Муң мувевн ар туск каркам хоятат уӆӆат.

Ӆорвоош районэв эӆты хуӆам хоят яңхсув, щит: Галина Лобанова, Дина Тарагупта па ма – Инна Лонгортова. Туса верам шоши хоятӆувн хорам пормасат патн тутӆисӆув. Емельян Кириллович па Альбина Николаевна Куртямоват арсыр мойӆапсаят шитсаңан. Конкурсан «Лучшее произведение национального искусства» номинацияян «Национальный костюм» Федосья Ивановна Дьячкова оӆаң места шитаптас. Елена Эдуардовна Куртямова ям нэпек хорт вермаӆ. Сишн ӆув фотоконкурсан «Северный взор – 2020» номинацияян «Сокровищница Севера», «Закат над Сыней» хор ураңна 2-мет местая ханамтас. Конкурсан «Лучшее произведение национального искусства» номинацияян «Вышивка и изделие из бисера» Дина Андреевна Тарагупта нэман ӆэщатам мойӆапсаян мойӆаса.

Галина Лобанова Казым-нёӆ эӆты ёхтыӆыяс. Ӆув таӆаң мастер-класс верас, хота хоятат утаӆтас хоты мосаӆ верты «Обработка и выделка рыбьей кожи из щуки и налима» па «Плетение бисера из 14 и более оленьих жил». Симась катра тус верат верты ӆув антиеӆ эӆты утаӆмаӆ. Умась ванты па хуӆанты.

Муң Дина Андреевна пиӆна ищи мастер-класс масман хоты мосаӆ ханты як якты. Ханты якат яксув па ханты арт арисув па щи тус верат ураңна лауреат нэпеканатн юкантсаюв. Щи тумпина якты марафонан яксув таӆаң щос. Па щи ураңна дипломатн па вурты хуӆ ӆытапн мойӆасаюв ительмен рут хоятат памув эӆты.

Кашң хатӆ фестивалян яӆап верт версув. Кимет хатаӆн кашң рут хорам ёнтам ӆуматты сохат этаӆтысат. Симась хорамат эӆты сэмат шуваңа ювантыӆат. Хуӆмет хатаӆн меет эплаң хатаӆ вус – кашң рут хоят ун хон Россия мувев эӆты эпӆаңа ӆэсятом ӆэ- тотат этаӆтасӆы па сараӆасӆы. Ямал мувев эӆты этаӆтас Зинаида Лонгортова. Па хоӆна ӆув яӆпа ханшам книгаяӆ «У рыбной реки» этаӆтасӆы. Щи книгаян ар катра эӆты верты ӆэтотат эӆты ханшман уӆ. Ма рецептӆам ищи сита ханшман уӆӆат. Катра йис пораян потам хот мутраят антом вусат па ищипа муң ханты опрасьӆув хошсат ӆэтот сопасӆыты, щи тумпина ӆэтотӆаӆ ант шаксат. Иса щи эӆты яӆап книгаян рахаӆ ӆуңатты.

Москва воош хоятат муң таӆаң хатӆ мойӆатыя ӆоңтыты вохиӆысӆув. Ӆув ураңӆаӆн арисув па яксув. Ар-сыр рут хоятат ун хон мувев эӆты муң пиӆэвн яксат. Щиты муң Ямал мувев вантапса лот олаң места шитас.

Моӆха, 2013-мет таӆн тамщ фестиваля ищи яңхиӆысам. Щи порана 2-мет места номинацияян «Дефиле костюма» шитыӆысам. Тампуш па ариты группаев «Сорни турам» ант шитас манты. Туп мин Дина Тарагупта пиӆан. Ма нумастэмн симась фестивалята мосаӆ талаң группаятан па аршак хоятан яңхты. Щи пораян арӆув па якӆув таканшак сясьты питӆат. Ясңев хувашк сыйты питаӆ. Муң ханты уӆапсаев мир ӆоватн моштаты питӆа!

Инна Лонгортова.
Рущ ясңа толмащсаӆӆы Иван Сандрин.