Шимӆаң рут мур хоятат емхатаӆ кеша онлайн ЭТНОквест ӆэсятса
Кашң таӆ, Ӆуң кутап хатӆ юпина, 9-мет хатӆ Унтӆор тыӆасьн Шимӆаң рут мур хоятат емхатӆ поснтаӆа. Там емхатӆ Генеральная Ассамблея Организации Объединённых Наций ястам щирн 1994 таӆ эӆты кашң таӆ самаңа поснтаман тайӆа. Мур ӆоватн ӆапатъяң (70) шоши муватн шимӆаң рут хоятат уӆӆат. Кашң рут ӆув ясаң па ӆув щир уӆапсаеӆ тайӆэӆ. Сишн щи тамщ ар-сыр хорам ясңат ант ёрэматы ураңна ияха уйтантыӆат па емхатӆ верӆат па порыӆыӆат.
Тампуш па яӆап коронавирус нэмпи муш ураңна ар емхатӆ поснтаты эӆты нох вуямат. Ястаса ёӆан омасты, нэмоӆты тахая ант рахаӆ яхты. Ар хоят ияха актащты ищи ант эсаӆӆа. Сишн хоятат иса ёӆн омассат. Ин там шимӆаң рут мур емхатӆ хоятата ёӆн омасман поснтаӆат, па тахая ант яхӆат.
Емхатӆ ураңна онлайн конкурс «Семейный ЭТНОквест «Мы – коренные!» верса. Па хоӆна Ямал мувев 90-таӆ ураңна юкантам. Тамщь этноквест кашң районан округ ӆоватн верса. Кашң шимӆаң рутат эӆты – хантэт, урт, саранат па охалят – иса яха актащисат. Меет оӆаңн мосмаӆ нэпека ханшман кашң команда акатты. Командая рахс 3-7 хоят ханштаты. Щит арпелк рутат, вана уӆты хоятат, семьяят.
Сяӆта па 9-мет хатаӆн касапса верты пора ёхтас. Нэпека ханшман хус(20) команда этмаӆ. Па еӆӆы туп нийӆхус(18) семья этсат. Ӆувеӆаӆ мосмаӆ вет этап мантыя. Этапат тамиты питсат:
1) Этнографический – тата мосмаӆ яма, хорамаңа па эпӆаңа ӆэтот ӆэщатты. Хой хоты хошатӆ – ситы верас. Па си тумпина мосмаӆ хорамаңа па туса ёнтам сох нох ӆуматты па хора вуты.
2) Военно-патриотический – там этапн мосмаӆ видеоролик верты, хота мосмаӆ ар ариты, хой ӆытӆ ӆуңтар ӆуңатӆ.
3) Спортивный – тата меет ар хоята рахс наварты па камн щирн нянярӆаты. Ай няврэмат шеек яма аматман наварсат.
4) Творческий – там этап, ма ваттэмн, меет ӆаваршак уӆмаӆ. Мосмаӆ хорамаңа па туса пормасат верты. Щи ӆэащтты верӆ хора верты мосмаӆ.
5) Ямал – соханты этап. Кашң командая мосас хорамаң хор верты. Щиты верты мосмаӆ хун хората аңкармаӆан мохты рахас ястаты – там Ямал мувн верам хор.
– Ун пумасипа ястаӆам! Онлайн ЭТНОквест шеек яма верам. Тамщ конкурсат шеек мосӆат. Щи онтасн муң рутӆув пиӆн ияха актащсув па катра ханты уӆапсаев нумаӆмасув, – ястаӆ Елена Рочева, «Ямкурт Куртям курт» команда эӆты. – Рутӆама ун пумасипа ястаты вутчиӆам. Ям щи ияха уйтантысув, потремисув. Йи нумасн касапса рупатаев версув. Пумащипа. Еӆӆы тумтака!
– Шеек ун пумасипа хоятата хой тамщ ям ЭТНОквест ӆэсятас. Муң рутӆув пиӆна ханты ясаңна потарсув, щанька версув, юх нёхарсув. Ханты ернасат ӆуматсув па охшамат. Кашң верам ӆэтот па пормас хора вусӆув. Щи верам хорат интернета китсыӆӆув. Яӆп щирн щиты мосаӆ. Меет ям нумас щит – няврэмӆув ищи муң итэвн ханты ясаңан потарсат па вератсат, – умащӆыман потарӆ Татьяна Романова «Отляр ёх» команда эӆты.
– Там карантин ураңан муң ияха актащиты ант шитсув. Ма вантэмн, там иты муң хоӆна аршак хоят акатсув. Районэв ӆоватн кашң курт эӆты хоятат вусат. Овкурт, Ямкурт, Ӆопхар, Казым-Мыс, Питӆор, Ӆорвоош, Васьёханов па Мужи воош. Аӆ йишн щи арат курт эӆты хоятат йи лотн ант акатӆа, – ястаӆ член жюри Дмитрий Ильич Тарагупта. – Ин ма вантӆэм арпелк хоят щит энамты эвиет похиет ӆув семьяйӆаӆ пиӆна. Там иты айтэӆн утаӆӆат хорам ернасӆаӆ ӆуматты па шоши ясаңна потарты.Кашң семья шеек яма па туса верантсат па ётсат. Кашң хоят хорам ернас ӆумтас. Умась вантыя. Ищипа жюри хоятата мосмаӆ хуӆам команда сараӆыты мойӆапсаятн мойӆаты ураңна. Щи рупата ӆаварт уӆмаӆ. Йи хоят жюри эӆты ястаӆ там команда ямашк ӆэтот ӆэсятмаӆ. Китмет жюри хоят ястаӆ – там команда ямашк аримеӆ. Па киметӆан сорашк навармеӆ. Щиты пирыман оӆаң местая питсат – команда «Лобановы» Казым-Мыс курт эӆты. Еша ёхи хащсат Иосиф Никифорович Куртямов хиӆыӆаӆ, команда «Куртямовы» Овкурт эӆты. Па хуӆмет местая ханапсат команда «Михайловы» Асов эӆты. Щи тумпина хоӆна хуӆам команда приз зрительских симпатий юкантсаят: – команда Коневых «Колхоз Эдуарда» (Васьёханов), – команда Куртямовых «Ямкурт Куртям рут» (Ямкурт), – команда Чупровых «Дружная семейка» (Васьёханов).
– Там хорпи ям касапса шеек яма ӆэсятам. Карантин ураңан муң хувн ияха ант уйтантысув. Ӆуң сыс рутӆам па апсиӆам Овкурта сютчаты ёхатсат. Там ЭТНОквест муңев ияха акатсаӆӆы. Муң антиӆув хорамаңа ёнтам сохат ӆуматсыӆӆув, – потарӆ Татьяна Куртямова (Конкина). – Апсиӆам па опиӆам па эвием пиӆна ханты ясаңна потремисув, эпӆаң ӆэтот кавартсув. Яма сютчисув па хоӆна 2-мет места шитсув. Шек ям!
